رواية نيشان للكاتبة روز الفياض الفصل السابع عشر
الظهر اتغدينه وخلصنه كمت ويه البنات ساعدتهم غسلوا الماعين ونظفنه المطبخ وسووا جاي وراحوا يشربون اني رحت للغرفه اتمددت بلكي انام وانطمر.
دخلوا البنات سلموا علي وراحوا وبيبي راحت نامت امي واخواني صعدوا فوك عمي نام كمت باوعت محد كلهم رايحين بس قيس بالحديقه ومرت عمي تلم استكانات الجاي.
رحت ساعدتها ورتبت الديوانيه دخل قيس راح نام بقيت كاعده بالديوانيه بحجة اساعد مرت عمي.
المغرب رحت كعدته كعد راح غسل واتوضى وصلى وبعدين طلع للسوك.
اني سبحت ولبست وكعدت انتظر ميس تريد تجيني هي وامها انتظرت انتظرت ماكو تأخرت رحنه كعدنه بالحديقه اني ومرت عمي تسولف على ابرار من جايه بيوم العرس الصبح وشحجت وكالت.
دخل قيس شافنه كاعدين اجه كعد يمنه اني اخذت منه المسواك والصمون وديته للمطبخ ورجعت كعدت يمهم يسولفون اني ساكته بعدين مرت عمي دخلت يم بيبي.
قيس: مااجت ميس؟
هزيت راسي لا.
اتنهد حيل بعدين كال: باجر دوام مالنه خلك.
ماحجيت مالي خلك احجي شي وهو اصلا شمستفاد من كعدته يمي واني شمستفاده كل واحد منا بوادي يوم الاسود إلى انخطفت بي وصار بسببه هالمشاكل.
اتمنيت عندي جرأه واحجي وياه بصراحه بس استحي وكرامتي متسمحلي.
ردت اكوم ادخل جوه كلي: مريم اتحملي شويه.
مريم: شتحمل؟
ماافتهمت اصلا حجايته الها هواي دلالات ومعاني اي معنى بيهم يقصد اتحمل شويه شنو زواجنه لو شي ثاني؟ زين كلمة شويه يقصد بيها وقت لو كم لو شنو؟ اذا وقت هل معناتها زواجنه مؤقت ولازم اتحمل شويه لحد مينتهي لو شويه لحدما يكدر يتقربلي ويجبرنفسه لان اني بنظره مو بنيه؟
كم سؤال بسؤال خطرلي من كلمه بس سويت نفسي عادي كل شي طبيعي.
قيس: الوضع.
مريم: عادي.
هذا الرد الطلع مني مااكدر احجي اكثر لان هم مافهمت معنى كلمة وضع شيقصد بيها.
دخلت للبيت وره شويه اجت ميس وامها كعدوا يمنه ساعه وبعدين راحوا.
اليوم كله مشفت زيد ومسألت عنه ومااريد اسأل بس بعدين سمعت مرت عمي كالت راح هو وصديقه لايران.
مر هالاسبوع قيس الصبح بالدوام ويرجع العصر ومرات بالليل اني باجر اداوم الصبح بالمستشفى والعصر بالعياده.
داومت عادي ومن تسألني ميس شبيج ضايجه اكوللها بسبب ابرار لان مااكدر احجيلها استحي.
ظليت بالدوام ارتاح عالاقل التهي شويه بالشغل بس من ارجع للبيت اضوج وانقهر يعني اني من اليوم إلى لبسني بي حلقه نهيت زيد من حياتي وقررت اتعامل كزوجه عاديه هي وزوجها لدرجة اني ابادر باغلب التصرفات بس كافي كرامتي متسمحلي بعد افرض نفسي عليه وهو ولاعبالك ينام يمي مثل الصنم حتى ميلتفت علي.
ادري لحدما انخطبنه هو طبيعي لحد يوم العرس هو طبيعي تقريبا شبي هسه ويمكن لهسه طبيعي بس اني تفكيري اختلف من سمعت جملته ذاك اليوم عالنيشان ومن شفته جرح ايده وخله الدم على اساس نيشان على كولتهم.
بس هم لاحجه شي ولابرر ولاحاول يفهمني ولايشرحلي ولاحتى لمحلي من باب الاحترام مو اكثر يعني.
ابد مطنشني ولاعبالك اني مثله بالهوا سوا ولاعبالك جبيره وافتهم والحمدلله عندي شهاده واشتغل لهدرجه بعينه طفله لو شنو الموضوع؟
رجعنه للبيت بالليل بالطريق سولفنه عادي عن الشغل من وكفنه عالترفك لايت لزم ايدي غلست بس فرحت يمكن حس على نفسه مصخها.
وصلنه للبيت دخلنه شفت زيد سلمت عادي هو ظل يباوعلي دخلت اني للغرفه بدلت وطلعت غسلت ورجعت جهزت العشا ويه مرت عمي اتعشينه وخلصنه وكعدنه كل احنه نباوع عالتلفزيون ونسولف اني كعدت يم قيس اسولفله على شغله صارت بالمستشفى ونضحك بعدين خله ايده على جتفي فرحت. درت وجهي شفت زيد يباوعلنه غلست شويه وكمت رحت اجيب بقلاوه جابتها إلى وحده من المراجعات عندي بمناسبة الزواج.
قدمتلهم كلهم واخذت جزء صعدته لاهلي فوك.
واني نازله لاكاني زيد عالدرج اتصرفت عادي كلي: ليش هيجي سويتي؟
مريم: شنو؟ شسويت؟
زيد: تعرفين. مو كتلج اخوي لا.
مريم: ليش بالله؟
زيد: تدرين من اشوفج وياه شيصير بيه تدرين مساع من خله ايده على جتفج شحسيت؟
مريم: زيد عيب هالحجي وماله داعي اني متزوجه هسه وعلى وذمة رجال وهالرجال اخوك لو مو اخوك مو مهم المهم اني متزوجه واحب زوجي وحتى لو مااحبه مااسمحلك تحجي ويايه بهيج مواضيع وتحاسبني زوجي من حقه كل شي يسوي لان زوجي ويستاهل احبه واصونه وماافكر باحد ثاني غيره لان محد مثله ولا يسوه ظفره بنظري.
زيد: شلون كدرتي تخلينه يلمسج؟
مريم: احترم نفسك. بعدين زوجي واحبه ليش مااكدر هاي انت كدرت وكدرت.
عفته ونزلت شكد جنت مغثوثه بس هسه ارتاحيت من وضحتله الصوره.
ولو مو حقيقه لان زوجي اصلا زوجي بس كدام الناس بالغرفه لايعرفني ولااعرفه لحد اليوم من خله ايده على جتفي ماادري شعجب.
رغم جنت طول هالفتره مقهوره من قيس وكرامتي مانعتني احاول اتقربله او اكسر الحاجز البيني وبينه بس هسه بعد تصرف زيد وكلامه لازم ادوس على كرامتي واحاول ويه قيس.