رواية من أكون للكاتبة أسماء صلاح الفصل الثاني والأربعون
-ابعد عن اختي يا جاسر، و بعدين موضوعنا خلص من زمان يعني مش مستاهل كل دا
-و مين قالك اني بعمل كدا عشان موضوعنا، ندى انا اصلا مش فاكرك، كل الحكاية اننا كنا اتنين صحاب ارتبطنا و بعدين محصلش نصيب فعادي و اختك دي مراتي دلوقتي.
-اومال اي السبب اشمعنا اختي، جاسر ميرال حالتها متستحملش انها تدخل في حوارات، احنا حاولنا نعالجها و للأسف دا محصلش و على الأقل اعمل حساب انك دكتور، انك قضيت سبع سنين في الكلية دي و المفروض انك عالجت ناس اعتبرها مريضة عندك.
-ندى انتِ ليه عمرك ما سألتني انا ليه دخلت القسم دا بالذات.
-طب انت ناوي على أي؟ ليه ميرال؟
-بحبها يا ستي دا انتي غريبة اوي
ضحكت ندى ساخرة:.
-بتحب اني شخصية فيهم يا جاسر؟ و بعدين بعد كل الستات اللي انت عرفتهم هتتجوز مريضة محدش يقتنع بدا
جاسر بتحذير:
-ندى شوفي انتي بتقولي اي؟ و بعدين انا حر اتجوز و لا لا هو حد قالك انتي اتجوزتي ليه؟
-بس انا لسه بحبك يا جاسر
-انا عندي شغل يا ندى و مش فاضي للكلام دا
نظرت له ندى و غادرت و هي تشتعل غضبا من حديثه...
مر شهر على زواجهم و لم يحدث اي شئ حتى ندى لم ترى ميرال، و كانت ميرال تتجنب الحديث مع جاسر بكل الطرق
شهقت دلال بدهشة و قالت:
-يعني لحد دلوقتي لسه مجاش جنبك
-ايوه و انا اللي عايزة كدا
-مش صح يا بنتي، انتي ازاي تعملي كدا دا جوزك و بعدين دا حقه و يمكن عشان هو كويس و محترم مرضاش يغصبك على حاجه لكن تعملي كدا و تبعدي نفسك عنه لمدة شهر مينفعش
ميرال ببكاء:
-مش عايزاها، و لا طايقها يقرب مني.
نظرت لها دلال بصدمة و قالت:
-ما انتي كنتي هتموتي عليه و مش عايزة غيره اي خليكي كدا.
-عشان...
صمتت ميرال و اخذت تبكي بشدة فمازال فكرة انه كان مرتبط بشقيقتها تسيطر عليها و قالت:
-لان جاسر متجوزني كدا و خلاص مش عشان بيحبني، دا اصلا و لا فارقة معاه بينزل الصبح بدري و بيرجع بليل و لا كأني عايشه معاه في البيت، تقربيا احنا بقينا بنشوف بعض بالصدفة.
-معلش يعني هو عنده حق و بعدين يا ميرال مفيش واحدة تعمل مع جوزها كدا، هو كتر خيره انه مش بيضايقك و بعدين انتي قولتي انه بيخلي واحدة تيجي عشان تساعدك في البيت و اديكي رايحة و جايه براحتك، جاسر عمر حد قال في حقه كلمة وحشة و شوفي جوزك بدل ما واحدة تيجي و تاخده و كدا هو يعتبر مش متجوز
زفرت ميرال بحنق و قالت:
-انا هروح عند بابا انهاردة، عايزة حاجه
-عايزاكي تشوفي بيتك و بلاش تخسري جوزك اللي بتحبي.
ذهبت ميرال إلى منزل والدها و هناك لم تجد احد غير ندى التي لم ترمي عليها السلام و قالت:
-ندى انتي بقالك شهر مبتتكلميش معايا
نظرت لها ندى بحقد و قالت:
-اكلم اختي اللي سابت كل رجالة الدنيا و راحت تحب الراجل الوحيد اللي حبيته
تماسكت ميرال و قالت:
-بس أنتي متجوزه.
-فوقي يا ميرال و شوفي نفسك، شاب زي جاسر مفيش حاجه ناقصها هياخدك على أي عشان حلوة شوية يعني هتلاقي عرف احلى منك و لو على كريم فأنا هطلق و اوعدك انك مش هتتهني به
ادمعت عيناها و نظرت لها بذهول فهي لا تصدق بأنها تسمع هذا الكلام منها و قالت:
-حقيقي انا مش مصدقة اللي بسمعه
-جاسر بيحبني و هيفضل يحبني و هو اتجوزك عشان يغيظني مش اكتر و في الاخر هيسيبك، و انتي يا حرام مش لاقيه حاجه تقولها.
-اتمنى انه يكون لسه بيحبك يا ندى
ذهبت ميرال و انفرجت في البكاء فهي تكره ذلك الوضع التي وضعت به
عادت إلى منزلها و بعد ذلك دلفت لتغسل وجهها، و اتجهت لتفتح الباب لتتفاجأ بقدوم ملك و وداد و قالت:
-اتفضلوا
دلفت وداد و قالت:
-معلش يا بنتي جينا فجأة بس انا كلمت جاسر و مردش
-لا يا طنط دا بيتكم تيجوا في أي وقت و انا هكلم جاسر دلوقتي
اتي جاسر و سلم عليهم قائلا:
-حقك عليا يا أمي كنت مشغول و معرفتش ارد.
-عادي يا ابني انا جيت من البلد عشان اطمن عليكم.
قبل أن يدخل جاسر نظرت لها وداد و قالت:
-ادخلي حضري الحمام لجوزك يا بنتي
دلف جاسر إلى الغرفة ليبدل ملابسه و دلفت ميرال خلفه ليبدو الوضع طبيعي بينهم.
أغلق جاسر الباب و نظر إليها ليقول مالك؟
-و لا حاجه
-ميرال حاولي تخلي الوضع طبيعي و تعالي على نفسك و كمان هتباتي معايا
-اها عارفه
دلفت ميرال لتحضر له الحمام كما قالت إليها وداد، و بعد ذلك وجدته خلفها و قالت:.
-في حاجه؟
-معلش امي عايشه في زمن قديم شوية انا نفسي معرفش يعني اي تحضير الحمام
ابتسمت ميرال و قالت:
-انا مش مضايقة يا جاسر بالعكس طنط وداد و ملك كويسين جدا و هي بتتكلم بحسنة نية
اقترب جاسر منها، فتراجعت خطوة للخلف و قالت بتوتر:
-انا جهزتلك الهدوم و هخرج احط الاكل عقبال ما تطلع
-انتِ هتفضلي كدا؟
نظرت في الأرض و قالت:
-كدا ازاي؟
تنهد بهدوء و قال:
-انتِ فاهمة يا ميرال
نظرت له و قالت بجدية:.
-عايزاني اعمل اي؟ و بعدين مش انت رفضتني في الأول و لا عايز تسلي وقتك بقا بدل الفراغ دا...
قطعها جاسر قائلا:
-اسلي وقتي بمراتي، و بعدين لو عايز اسلي وقتي كنت عملتها من بدري
تنحنحت ميرال و خرجت و هي تلتقط أنفاسها بصعوبة فهي مازالت تحبه رغم ما علمته و لكن لم تستطع ان تكمل معه
دلفت إلى المطبخ و قالت:
-بلاش تتعبي نفسك يا ملك انا.
قطعتها ملك و قالت:
-عادي هساعدك و بعدين احنا مش ضيوف يا ميرال و لا اي؟
ابتسمت ميرال و قالت:
-اكيد
-مالك يا ميرال شكلك مضايقه أو مش مبسوطة، دا حتى انتم لسه متجوزين جديد على الهم دا
-مفيش حاجه والله يا ملك و بعدين انا كويسه
نظرت لها ملك بشك و قالت:
-دا انتي لو متجوزة غصب مش هتبقى كدا، و بعدين دا حتى انتم متجوزين عن حب
ابتسمت ميرال بحسرة و قالت:
-حب، اها فعلا
تعجبت ملك من طريقتها و قالت:
-على فكرة واضح انك بتحبي و هو كمان بيحبك.
نظرت لها ميرال و ابتسمت بشرود و أدمعت عيناها و قالت:
-طب انا هكمل السلطة و انتِ طلعي الحاجة اللي جهزت
بدأت ميرال بتقطيع مكونات السلطة و شردت بحديث ملك حتى انها لم تنبه للسكين و قامت بجرح يدها
امسك بيدها ليتفحص جرحها و قال:
-الحمد الله سطحي، انتي سرحانة في أي؟
نزعت ميرال يدها و قالت:
-مفيش حد يا جاسر مش مضطر تمثل احنا لوحدنا
-و انا مش بمثل يا ميرال
خرج جاسر من المطبخ فهو قد سئم من اسلوبها.
دلفت ميرال إلى الغرفة لكي تنام فهي لم تكن مرتاحة بوجودها معه و لكن مضطرة ان تقبل بذلك
دخل جاسر إليها و قال:
-ميرال على فكرة انتي مزودها اوي
نظرت له و قالت بسخرية:
-بجد؟! جاسر انت مدرك الموقف و لا؟
-ميرال انتِ مضايقه عشان بايته معايا في نفس الأوضة
تنهدت ميرال بضيق و قالت:
-تصبح على خير يا جاسر انا هنام
جلس أمامها على الفراش و قال:
-ميرال انا و ندى مرتبطناش غير ست شهور بس
قطعته ميرال بجدية:.
-حاجه متخصنيش اصلا، كفايه المفاجأت اللي بعرفها عنك كل شوية
-طلبتي نتجوز ليه لما انتِ مش طايقني كدا
نظرت له ميرال و قالت:
-مش عايزة حد يضر، يمكن كدا كل حاجه بقيت بعيدة عنك
-ميرال طالما الموضوع كدا أحنا ممكن نتطلق...