قصص و روايات - قصص هادفة :

رواية سوء اختيار للكاتبة اسماء عبد العظيم كاملة

رواية سوء اختيار للكاتبة اسماء عبد العظيم كاملة

رواية سوء اختيار للكاتبة اسماء عبد العظيم كاملة

الشخصيات
( هناء )- 25 سنة – خريجة كلية تجارة – لاتعمل
( سماح) 30 سنة متزوجة ولديها ثلاث ابناء ولدين وبنت وزوجها عادل موظف حكومى ، سماح ممرضه بمستشفى حكومى
( عليه ) والدة هناء 55 سنة – ست بيت
( فوزية ) شقيقة عليه وخالة هناء
( عمرو) ابن فوزية 33 سنة متزوج وصاحب محل ملابس اطفال
( احمد ) مهندس عمره 28 سنة ويعمل فى مكتب هندسى

 

( هشام ) 29 سنة خريج علوم ويعمل بمعمل تحاليل طبية
( اميرة ) 23 سنة خريجة حقوق
( حسين ) والد اميره
( منار ) 20 سنة بكلية تجارة
( ناهد ) والدة هشام ومنار 60 سنة سيدة منزل
( كريم ) ابن هشام
( ابراهيم ) صديق هشام

 

الفصل الاول
فى منزل هناء تليفون البيت بيرررن ..
( عليه ) : ردى على التليفون ياهناء ايدى مش فاضية يابنتى
(هناء ): حاضر ياماما .... الو : اهلا ياخالتو ازيك عاملة ايه
(فوزية) الحمد لله ياهناء ازيك انتى يابنتى عاملة واخبارك ايه كده مش بتسألى عليا
(هناء ) معلش والله ياخالتو حقك عليه المهم ازيك وازى صحتك وعمرو عامل ايه واولاده ومراته عاملين ايه
( فوزية ) كويسين ياحبيبتى ، الحمد لله
( هناء ) يارب دايما يبقوا كويسين ياخالتو
( فوزية ) ربنا يكرمك ياحبيبتى وعقبال لما افرح بيكى واشوف ولادك ياهناء
( هناء ) شكرا ياخالتوا ان شاء الله كل شىء فى اوانه
( فوزية ) ان شاء الله قريب اوى ونفرح بيكى ، ايه مامتك عند
( هناء ) ايوه هنا
( فوزية ) طب اديهالى اكلمها
( هناء ) حاضر ياخالتو هخليها تكلمك
( هناء ) ماما كلمى خالتو فوزية
( عليه ) الو ... ازيك يافوزية عامله ايه واخبار عمرو ايه ( فوزية )الحمد لله كلنا بخير ... المهم انا عاوزاكى فى موضوع
( عليه ) خير ياختى فى حاجة ...
(فوزية ) خير ان شاء الله ... بقولك .. فى واحدة جارتنا بتسألنى على عروسه لإبنها وانا طبعا فكرت فى هناء ....
( عليه ) اه .. وده ايه ظروفه يعنى ....
( فوزية ) مهندس وعنده 28 سنة وشغال فى مكتب هندسى واسمه احمد وانا اعرفه كويس بشوفه وهو خارج وداخل وبصراحة محترم وكويس
( عليه ) ووالدته ؟000
( فوزية ) يووه بقولك جارتى واعرفها من زمان ويااااما بينا عشرة عمر ولو انا مش شايفه ان العريس ده كويس مكنتش قولتلك عليه لهناء دى هناء دى بنتى ياعليه وانا بحبها وعاوزة افرح بيها..
( عليه ) طبعا ياختى بس انتى عارفه ان ابو هناء متوفى من زمان وانا اللى ربتها هى واختها وتعبت عليهم واحب اطمن عليها مع حد كويس زى جوز سماح اختها
( فوزية ) خلاص انا هرد على ام احمد واحدد معاهم ميعاد علشان يجى ويشوفوا بعض
( عليه ) ماشى وابقى عرفينى الميعاد امتى علشان ابلغ عادل جوز سماح يحضر القاعده واهو راجل معانا برده ...
( فوزية ) بس عرفى هناء وخدى رأيها علشان مش تفجئيها ..
( عليه ) طبعا هقولها ...مع السلامة
عليه وهى بتحط سماعة التليفون بتنادى على هناء اللى قاعدة الكمبيوتر ياهناااااء
( هناء ) ايوة ياماما جايه اهو .....
( عليه ) تعالى ياهناء .. اقعدى عاوزاكى فى موضوع
( هناء ) خير ياماما ...
( عليه ) خير ان شاء الله يابنتى دلوقتى خالتك جايبه ليكى عريس وهو مهندس وعنده28 سنة وخالتك بتشكر فيه وفى اهله وخالتك هتحدد ميعاد مع ماماته انهم يجو يشفوكى
( هناء ) يعنى خالتو عارفاهم كويس ياماما
( عليه ) ايو ياحبيبتى
( هناء ) طب يعنى اخلاقه كويسه دى اهم حاجة
( عليه ) يابنتى انا قلولتلك اللى اعرفه وعموما ادينا هنشوفه وانتى هتقعدى معاه
( هناء ) خلاص ماشى .....

 

فى منزل هشام
( ناهد ) يامنااااااااااار صحى اخوكى وقوليه الغداء جاهز
( منار ) حاضر ياماما ..
تدخل منار على هشام تلاقيه غارقان فى النوم .. اصحى ياهشام
ياهشااااام اصحى – وبتكلم نفسها اكيد سهران طول الليل بيكلم الست اميرة خطيبته ..ياااهشام
( هشام ) يووه يامنار صحيت عاوزه ايه
( منار ) اصحى علشان الغداء جاهز
هشام بيقوم وهو بيفرك فى عنيه حاسس انى جعان نوم ..... مش اكل
( منار ) لأ قوم بس ماما محضره لنا اكل إنما ايه .. نفسك هتتفتح على طول ...
( هشام ) حاضر .. اسبقينى وانا هحصلك ...
وبترجع منار تقعد على السفرة وبتسألها ناهد :
( ناهد ) صحيتى اخوكى ؟
( منار ) ايوه جاى اهو....
( ناهد ) انا مش عارفه ايه اللى شقلب حال اخوكى كده اكيد الست السنيورة بتاعته
( منار ) اسمها اميرة مش السنيوره..
( ناهد ) بلاش لماضه ياختى كفاية عليا اخوكى وخطيبته مش نقصاكى انتى كمان
( هشام ) صباح الخير ياماما
( ناهد ) صباح الخير يابنى ده العصر هيأذن وانت بتقولى صباح الخير ..
( هشام ) خلاص ياماما متزعليش .. مساء الخير
( ناهد ) انا مش زعلانه الا على حالك اللى اتلخبط من ساعة ما خطبت الست اميرة وانت حالك اتبدل
( هشام ) ياماما واميرة دخلها ايه .. كل ده علشان سهرت شوية واحنا بنتكلم فى التليفون ..
( ناهد ) ياريتها على قد السهر وبس ... انت كإنك لغيت عقلك ومعنتش شايف غير اميرة وبس ....
( هشام ) ياماما ايه لازمته الكلام ده بس .... ولا انتى علشان مكنتيش عاوزانى اخطب اميرة ..
( ناهد ) وهو انا يعنى لو كنت استريحتلها وحبيتها كنت هقولك كده .. انا مش مستريحه للبنت دى ياهشام وانا بقولك اهو... انت خطبتها وهتتجوزها انت حر انا مقدرش اجبرك على حاجة انت راجل ... لكن كل اللى عاوزاه منك انك تبص لها كويس وتشوف قد ايه هى اتغيرت وبالذات من بعد الخطوبه فى شكلها ولبسها والبوهيه اللى بتحطها فى وشها ... وكمان تعاملها معايا ومع اختك .. بتحسسنى كإنها خطفتك خلاص منى ..
( هشام ) هشام وهو بيبوس ايد ماماته ...متقدرش ياماما ده انتى دنيتى وحياتى وعمرى ومقدرش استغنى عنك ابدا ... وبعدين علشان اللبس والمكياج ده كله هغيره بعد الجواز لما تبقى فى بيتى ... هقدر امشى كلمتى عليها ....
( ناهد ) تفتكر هتقدر .. عموما ربنا يكتب لك الخير يابنى ولو منها شر يبعدها عنك
( هشام ) امين ياست الكل
( ناهد ) وانت على كده بقى حددتوا ميعاد الفرح ولا لسه
( هشام ) كمان شهر بإذن الله ياماما
( ناهد ) ياه بالسرعة دى .. انت مستعجل على ايه ....
( هشام ) سرعة ايه ياماما احنا بقالنا ست شهور مخطوبين ولسه كما شهر على الفرح يعنى سبع شهور بحالهم ..
( ناهد ) خلاص خلاص .. اعمل اللى يريحك ...

 

فى منزل اميرة ..
اميرة قاعدة قدام التسريحه وعماله بتجرب الميك اب الجديد اللى اشترته
( سعاد والدة اميرة ) ايه يامرمر بتعملى ايه
( اميرة ) ابدا بجرب شويه حاجات كده
( سعاد ) قوليلى يامرمر اخبار هشام معاكى ايه ...
( اميرة ) كويس بس .. كلمنى امبارح وهيجى النهارده بليل علشان يقابل بابا ويحدد معاه ميعاد الفرح
( سعاد ) والله ...الف مبروك يامرمر ...،،،،، وحماتك واخته مبيتصلوش عليكى
( اميرة ) لا وانا مبسألش .. انا اصلا منفضه لهم المهم عندى هشام وبس ......
( سعاد ) ماشى ياميرو ربنا يسعدك ياحبيبتى .. اما اروح انا اقول لابوكى ان هشام جاى النهارده علشان يسرع فى ميعاد الفرح وميقفش زى العقده فى الزور ....
( اميرة ) ربنا يخليكى ليا ياسوسو ياحبيبتى ...

 

فى منزل هناء :
( عليه ) خلاص ياهناء نضفتى الصالون
( هناء ) ايوه ياماما نضفت وخلصت كل حاجة
( عليه ) ماشى ياحبيبتى .. ادخلى خدى حمام وغير هدومك بقا علشان تبقى جاهزة على ما الجماعة ييجوا
( هناء ) متعرفيش مين بالظبط اللى هيجى ياماما
( عليه ) اكيد هو ومامته وخالتك ... ما اظنش ان فى حد ثانى ممكني يجيى خصوصا ان دى اول مرة يجى فيها ...
( هناء ) بتهز راسها .. ماشى .. انا داخله علشان اخد حمام
الساعة السابعة : جرررس الباب بيرن
( عليه ) إيه ياعادل اتأخرت ليه يابنى الجماعة زمانهم جايين ...
( عادل ) معلش ياطنط والله .. انا آسف بس الحمد لله لسه ما حدش جه ..
( عليه ) اومال سماح فين والعيال ..
( عادل ) سماح فى البيت عندها دور برد ومقدرتش تنزل وتيجى معايا ... وبتقولك ملحوقه وتيجى المرة الجاية ان شاء الله... أومال فين العروسه
( عليه ) فى اوضتها ... اتفضل يابنى .. هنادى عليها ... ياهنااااااء
(هناء ) ايوه ياماما
( عليه ) تعالى سلمى على جوز اختك
( هناء ) خارجة من اوضتها مكسوفه ... ازيك ياعادل ...
( عادل ) الله يسلمك ياهناء ...
شويه وجرس الباب بيرن ......
(عادل ) انا هفتح خليكى انتى ياطنط وادخلى انتى ياهناء على ما نبقى ننادى عليكى ...
عادل فتح الباب ...( عادل ) اتفضلوا
( فوزية ) اعرفكم عادل جوز اخت العروسه وباشمهندس احمد / العريس وام احمد والدته
( احمد ) اهلا وسهلا استاذ عادل / اهلا بيك يابشمهندس .. اتفضلوا
( عليه ) فى استقبالهم ...اهلا وسهلا وبتسلم على احمد ومامته وفوزية
اتفضلوا .. اقعدوا .. اهلا
احمد وعادل بيتكلموا فى امور عامه وشويه فوزية بتسأل ( عليه ) فين هناء ...
( فوزية ) اومال فين هناء ... هروح اشوفها
فوزية بتخبط على هناء ..
(فوزية ) ياله ياهناء علشان تخرجى وتشوفى العريس
( هناء ) انا مسكوفه اوى ياخالتو .. مش قادره اخرج
( فوزية )هههههههههه معلش ياحبيبتى كلنا حصلنا كده ياله بقا علشان منسيبش الناس كده ياله تعالى معايا ..
دخلت فوزية الصالون تعالى ياهناء سلمى على الحاجة ام احمد واقعدى
( هناء ) السلام عليكم ….
الجميع وعليكم السلام …..
هناء قعدت من غير ما تبص على احمد سلمت بس على مامته وقعدت
( احمد ) بيبص على هناء من طرف عينه وبيحاول يلفت انتباهها وهو بيتكلم مع عادل وبيفتح فى مواضيع علشان هناء تتكلم بس هى متكلمتش ومبصتش عليه ...
( فوزية ) ماتيجوا ياجماعه نقعد شوية فى الصالة علشان هناء واحمد يتكلموا شويه مع بعض ...
خرج الجميع وتركوهم لوحدهم ... ،،هناء مكسوفه ومش قادره تبص ..
(احمد ) ازيك ياانسة هناء ...
( هناء ) الله يسلمك ...
( احمد ) واضح انك مكسوفه اوى ...( هناء ) بخجل وتبص للأرض ... طب انا هتكلم عن نفسى ولو فى اى حاجة عاوزة تسألى عليها انا تحت امرك ..
( احمد ) انا مهندس وعندى 28 سنة والحمد لله ملتزم الى حد ما واتمنى ان شاء الله يحصل بينا نصيب
( هناء ) طب ايه اللى تتمناه يكون فى شريكة حياتك
( احمد ) طبعا تكون ملتزمه وتعرف تربى الاولاد وآمن عليها على نفسى واولادى وانتى بقا ايه اللى بتتمنيه يكون فى شريك حياتك ؟
( هناء ) اهم حاجة طبعا الاخلاق ...
( احمد ) الاخلاق وبس !!!
( هناء ) لأ طبعا .. بس انا شايفة ان اهم حاجة الاخلاق .... لإن دى اللى بتدوم وبتخلى الحياة تدوم بين اى اثنين حتى لو فى مشاكل الانسان اللى اخلاقه كويسه هيقدر يتعامل مع الطرف الثانى كويس وبحكمه وهيقدر يحسن التعامل مع الطرف الثانى .
وبعد شويه من الكلام بين احمد وهناء .. دخل الاهل وسلموا على بعض وانتهت المقابلة
( فوزية ) بتكلم )عليه (وبتقولها هعرف رأى الجماعة وهرد عليكى ؟
)عليه ) ماشى ... مع السلامة ..بتقفل (عليه) الباب وراء اختها وإلتفتت لقيت هناء لسه قاعده فى مكانها
( عليه ) فى ايه ياهناء إيه رأيك ؟
( هناء ) معرفش لسه ياماما هصلى استخارة وربنا يسهل
( عليه ) ماشى ياحبيبتى بالتوفيق يارب ياماااا نفسى اطمن عليكى يااااهناااء

----
فى منزل هشام :
( هشام ) انا نازل ياماما هتعوزى حاجة
( ناهد ) رايح عند خطيبتك ؟
( هشام ) ايوه وهحدد مع باباها ميعاد الفرح وان شاء الله يكون على آخر الشهر
( ناهد ) بتمط شفتيها ... ماشى ياهشام ..
فى منزل اميرة :
هشام قاعد مع والد اميرة الحاج / حسين
( هشام ) قولت ايه ياعمى فى الميعاد ده ...
( حسين ) وماله يابنى مادام انت جاهز وشقتك جاهزة على خيرة الله
( هشام ) يبقى بإذن الله نكتب الكتاب الاسبوع الجاى ياعمى ..
( سعاد بتبص لحسين بنظرة حادة تعنى له انه يوافق )
( حسين ) : ماشى يابنى اللى تشوفه
(سعاد ) مبروك ياهشام ، مبروك يامرمر
( هشام ) الله يبارك فيكى ياطنط ... وبيستأذن ويمشى علشان يروح ويبلغ ماماته واخته بميعاد فرحه ..
ثانى يوم فوزية بتتصل على عليه اختها وبتسألها على رايها فى العريس وعلى رأى هناء وتبلغها ان احمد موافق وطالب يحدد ميعاد للخطوبه
( عليه ) هناء ايه رايك النهائى علشان الجماعة عاوزين يحددوا ميعاد للخطوبه
( هناء ) بكسوف ... انا موافقة ياماما
( عليه ) الحمد لله ربنا يبارك لك يابنتى .....اما اقوم اتصل على خالتك علشان تبلغ الجماعة ونحدد الميعاد ..
( هناء ) من جواها مبسوطه .. اخيرا هتتخطب ولشاب محترم وهتحصل زمايلها اللى اغلبهم اتجوزوا واللى اتخطبوا من وهما لسه فى الكلية .....وكمان بتحمد ربنا انها هتتحرم من كلام الناس اللى كل اللى يشوفها يسألها امتى هنفرح بيكى ؟!! وكإنه شىء بإيدها ..

 

- رواية سوء اختيار للكاتبة اسماء عبد العظيم ف 2

قصص مشابهة:
الآراء والتعليقات على القصة