رواية نيشان للكاتبة روز الفياض الفصل الرابع عشر
المفروض افرح من قهرته هسه ومن رديتله جزء من الوجع إلى وجعنياه بس مو فرحانه كلبي معصور ومخنوكه حيل.
قيس: شرايج؟
مريم: امم عاشت الايادي.
قيس: شبيج؟ معجبتج؟
مريم: لاحلوه بالعكس.
قيس: لعد شبيج غيمتي.
مريم: مابيه شي بس ضايجه شويه.
قيس: امم من شنو ضايجه؟
مريم: ماكو شي بس شلون اعوف امي وغرفتي وانام هنا.
هذا العذر إلى دبرته بس هذا إلى خطر ابالي.
قيس: هههه امج فوك وانتي جوه. وغرفتج اول وتالي حتركيها من تتزوجين قابل تاخذيها وياج هههه.
مريم: بعد عقليتي هيج.
باوعلي شويه بعدين كال: شرايج نطلع نتعشا بره؟
باوعتله اول مره احسه يريد يعيش جو الخطوبه.
مريم: وين نروح؟
قيس: اكو مطعم تركي جديد وحلو شرايج تعزميني؟
مريم: اعزمك؟
قيس: اي تعزميني شبيج اتعجبتي غير انت الدكتوره اني علي اخذج وانتي عليج تعزميني هههه.
مريم: ميخالف بس اكول لامي اول وبعدين نروح. تمام؟
قيس: تمام التمام.
الايام الوراها جنت مشغوله ماعندي وقت لاي شي قيس كالمعتاد يوديني ويجيبني من الدوام جنت احاول اتقرب منه لان خلص صار الموضوع امر واقع مسألة ايام ونتزوج بس جنت احسه يستحي مني.
حتى من يتصل بيه جان حجينه عادي ماكو اي حجي رومانسي او حجي حلو مثل اي ثنين مخطوبين.
ومجان يتصل اصلا الا اذا اكو شي يعني ميتصل لان مشتاقلي او يريد يسولف وياي او يريد نتقرب من بعض.
من احجي لامي تكلي هو ولد ثكيل ومؤدب ويستحي ميعرف يسوي هيج انتي صيري شاطره وخلي يحبج انتي غيريه انتي اتقربيله وكسري الحاجز إلى بينكم.
بعد اسبوع زواجنه واني خايفه حيل من نفسي ومن قيس ومن زيد ومن ابرار ومن الكل مااحس نفسي مرتاحه.
والكوابيس لهسه احلم بهذا إلى لزم خدي وبده ينزل بايده اكعد مخنوكه واشهك عبالك جنت غركانه. واركض امسح خدي بديتول يالله ارتاح واحس بالنظافه.
الله يعين البنات إلى يعتدون على شرفهم شلون حالهم بعدين.
قيس: مريم محتاجه شي؟ ناقصج شي؟
مريم: لا ممحتاجه شي سلامتك.
قيس: ابد؟
مريم: ابد.
قيس: اذا تردين شي كولي بعد عدنه وقت.
ردت اصير جريئه واكسر الحاجز إلى بينه على كولت امي لزمت ايده كتله: مشكور مامحتاجه شي بس انت.
لزم ايدي هو باسها. اتعجبت خطوه جيده دنتطور كتله: قيسان ممتردد؟ مخايف؟ محاس بنفسك اتورطت او استعجلت؟
اتنهد بعدين كال: دكتوره اخاف انتي متردده وحاسه نفسج اتورطتي واستعجلتي؟
كتله بكلبي شدعوه جان بكيفي.
مريم: بالعكس متأكده مستحيل احصل احسن منك. بس يعني مااجذب عليك اكو خوف شويه.
قيس: الخوف شعور طبيعي اني هم خايف.
رحنه اني وميس وامي نشوف بدلات الزفاف اني مااحب البدلات إلى لونها ابيض فاختاريت وحده اوف وايت وميس إلى اشترتها إلى هديه منها.
اليوم امي تريد تسويلي حنه بما انه مجان اكو خطوبه ومهر وحفله.
لبست فستان اخضر بدون ردن مفتوح كله من الظهر مخصر عالجسم من فوك لحد الركبه بعدين يصير حوريه.
ولبست وياه كعب عالي نفس اللون ومكياج بسيط اخضر فاتح وذهبي وحمره لون وردي فاتن زوجة غيث خلتلي وسشورت شعري ورفعت جزء زغير وخلتلي مثل البروش كرستال على شعري.
محد غريب امي ونورس وصديقات نورس 2 وكم وحده من جاراتنه وميس وامها ومرت عمي وبيبي وفاتن زوجة غيث واحلام زوجة ليث.
صح حفله بسيطه بس اتونسنه حنتلي بيبي ايد وحده وكالت الثانيه لازم العريس يحنيها.
مرت عمي وبيبي دخلوا قيس كعد يمي مباوعلي ولارفع عينه بيبي انطته الحنه اخذ شويه وخلاها بيدي وسد ايدي بعدين باس راسي وطلع.
خبصتنه مرت عمي بالهلاهل الفرحه الجبيره جانت لبيبي ومرت عمي وامي.
خلصت الحفله ورحنه اني وقيس ونورس للتصوير.
دخلنه رتبتني نورس عدلت شعري وطوخت الحمره.
دخل قيس ميباوعلي ردته بس يلتفت شويه من باب المجامله ماكو.
بعدين باوعلي لاول مره اليوم محجه شي ولاحتى ابتسم ظل يصب عرك.
ابتسمتله ابتسم شويه.
شعور غريب ومااكدر اوصفه ماادري حلو لو لا. حسيت دمعت عيوني شلون الناس تتزوج زواج تقليدي بدون حب بدون مقدمات بدون مشاعر حلوه وقويه ولهفه واشتياق وسهر. شلون؟
خلصنه تصوير ورجعنه للبيت زيد اليوم اجه بس ماشفته ولاشافني وحتى تليفوني غلقته مااريده يتصل او دز مسج.
الليل كله مانمت فكرة تاخذني وفكره تجيبني بعدين كلت افوض امري لله والله كريم مليت من التفكير.
نمت والصبح كعدت واجت علي ميس رحنه للصالون شعري رفعوا وخلوا خصل رقيقه نازله ويفي عريض ومكياج اختاريت الوان الحلويات وردي وبنفسجي.
طبعا العرس بالبيت مو بالقاعه. خلصنه اجوا قيس وليث نزل قيس فتحلي باب السياره وساعدني بالبدله ميس كعدت كدام واني وقيس وره.
ليث مشغل اغاني ويسولف ويه ميس وقيس عالسايلنت.
وصلنه للاستوديو ودخلنه نزعت البرنص هو يحجي ويه امه بالتليفون مباوعلي.
ميس طلعت حتى تصيح المصوره هو التفت شافني حسيته اتفاجأ ظل يباوعلي استحيت سويت نفسي اعدل الاكليل.