رواية نيشان للكاتبة روز الفياض الفصل الثامن
قيس: لا يمعوده مو هاي ويايه متزوجين عين الله عليهم نسوانهم مالهن حس لايشتكون ولايكولون دايخين ولايكولون تعبانين لا وبعد مخليهن حسره عليهن الفلس والطلعه واني كدي ومكدودي كله الها وبكيفها تطب وتطلع وكل إلى تريده يجرالها وميجي بعينها 24 ساعه تحجي وتشتكي وكل حجايه وكالت امده حظي قابل مثل فلانه قابل مثل علانه.
سكت اتنهد واني هم سكتت استحيت شحجي كل احنه نعرف حجيه صحيح بس مندخل بينهم امي جانت تكول من نحجي اني ونورس كلمن عقله براسه يعرف خلاصه.
وصلنه للبيت كالمعتاد امي تنتظرني حتى تساعدني اصعد بس هالمره من وصلنه شفت امي تبجي.
بس دخلنه سمعنه هوسه وصياح وعياط.
معروف المصدر مو جديد الوضع.
بس استغربت ليش امي تبجي نزلت ونزل قيس كتلها: شبيج ليش تبجين؟
محجت هزت راسها ماكو شي.
قيس: شكو عمه شبيج؟
امي: ماكو شي عمه فوت اتغده وارتاح.
صعدنه اني وامي وقيس فات للبيت.
مريم: شصاير؟
امي: روحي بدلي ملابسج وغسلي حتى نتزقنب.
مريم: ياستار يارب.
توني فتت للغرفه اريد ابدل ملابسي وسمعت صوت ابرار تلعلع عدنه.
ابرار: وينها الدكتوره وينها؟ شرفت مو؟
طلعت كتلها: شكو شبيج؟
ابرار: شبيه حبوبه شنو قلة زلم تركضين وره رجلي شباب الكليه مكفوج؟
صعدت مرت عمي وصعد زيد.
مرت عمي: نزلي خاله شهالحجي عيب متستحين؟
ابرار: لا والله بعد مااستحي مدام انتو عائله متستحون.
زيد: شهالحجي احترمي نفسج واحجي عدل.
ابرار: لا بالله؟ واذا ماحجيت عدل شتسوون؟
كون تكدرون تسوون شي جان سويتوا لبتكم جان ربيتوها مو مخلينها تركض وره واحد متزوج.
امي ظلت تبجي كلتلها: عيب عليج شنو هالحجي.
زيد صاح على قيس واني متفرجه ماادري شحجي بس دموعي صبت من حجيها وانقهرت اكثر على امي.
صعد قيس هي كالت: شبعتي من طلاب الكليه وشبعوا منج هسه كلتي خل ارجع على ابن عمي.
مريم: انجبي واكلي خ، ادب سز.
راسا قيس ضربها.
قيس: طايحت الحظ من ياطينه انتي؟
لزمته امي وزيد.
ابرار: اي متقبل عليها الدكتوره اسبوع عفتك وياها بس اسبوع شبسرعه اتصاحبتوا؟ شنطتك وخبلتك؟
اني شهكت من سمعت حجيها ظليت اصرخ: حيوانه انتي حيوانه متستحين اني اشرفج واشرف من عشره مثلج.
بس عاد قيس استلمها ضرب امي دخلتنه اني ونورس للغرفه وسدت الباب.
نورس فتحت البرده حتى تشوف بس قيس اخذها جوه ومرت عمي نزلت وراهم بقى بس زيد يم امي بالمطبخ.
اني تشلعت عيوني من البجي.
زيد يصبر على امي ويسكتها امي خطيه تخاف من المشاكل وعلى كولتها مالنه احد غير بيت عمي منريد نخسرهم نتحمل ونسكت لحدما الله يفرجها.
بعدين زيد نزل بقينه بس احنه لا اتغدينه ولا ارتاحينه ولاحجينه اي شي بس نبجي.
للمغرب صلينه وكعدنه امي كالت: خل ناكل لكمه كافي قهر ومغثه.
مريم: شصاير شبيها هالادب سز؟
امي: مو صوجها صوج بيبيتج إلى امشيتنه على مزاجها.
مريم: شسوت؟
امي: من رجعوا هاي ام لسان كل شويه تسأل على قيس تأخر وين صار ليش مااجه مدري شنو تعرفيها بعد شكد تحب تمثل وتتمضيك وبيبتج ماشاءالله عليها شكد تحبها جبت الزيت عالنار كلتلها راح يجيب مرته من الكليه وكبت العيطه.
مريم: يعني بيبي من كل عقلها يعني بالله هذا حجي؟ عبالها بكيفها شنو لعب هو؟
امي: اكلي واسكتي وخليني ساكته.
مريم: لا مااسكت شنو قابل على مزاجها تزوج وتطلك؟
امي: مو كلتي لميس والطلاب خطيبج؟ بعد ليش هسه استنكرتي؟
مريم: يمه تره هالحجي جذب وانتي تدرين كتلج قيس كلي ميخالف جذبي كدامهم.
امي: ولشوكت تجذبون انتي عبالج اذا كلتي فسخت لو تركنه اكو احد يجي يخطبج؟
مريم: ليش شبيه محد يخطبني؟
امي: كلهم مثل زيد اذا هو ابن عمج ومكدر يتزوجج ويدري محد اتدنالج شحال الطلاب الغرب إلى شافوج من انخطفتي اصلا هسه كلهم يحجون ويكولون مستحيل رجعوها سالمه.
بجيت كتلها: مدام تعرفون هيج الناس تحجي ليش خليتوني ارجع جان كتولي ابقي بمكانج لترجعين للبيت المن راجعه. جان بقيت بمكاني بلكي تاكلني الجلاب ولا هالوضع هذا وهالحجي اليقهر.
امي: بوسي ايدج وجه وكفه اذا بيبيتج كدرت تخلي قيس يقبل بيج.
باوعتلها كتلها: اني الما اقبل مو هو.
امي: معناها ظلي هيج بدون زواج وكلما تمر سنه من عمرج يزيد الحجي يكولون ابن عمها خطبها حتى يستر عليها وبعدين عافها وبقت هسه بدون زواج لان معيوبه.
ظليت ابجي وادك على رجليه.
ظلينه ثلاثتنه نبجي.
امي: ولج احنه بس نسوان ونمشي بصف الحايط ونكول العفو. مالنه حيل الناس وحجي الناس.
بالليل صعدت بيبي ومرت عمي وعمي يحجون بالي صار اني ساكته بس وامي ساكته بيبي تحجي وتألف بالنيابه عني.
بيبي: اني حجيت وياها وهي موافقه وين تلكه احسن من قيسان فدوه لعمره وحجيت وياه مكال شي بس كال خاف تسوي مشاكل ام لسان.
عمي: والله ماادري يعني شجاب هالفكره براسج حجيه. جان انتظرتي من نرجع وحجينه واتفاهمنه واتفقنه مو هيج فاجئتينه.
بيبي: اني اريدله الزين وهو هذا الزين بت عمه تقبل بي حتى لو متزوج هو دومه مداريهم ويحبهم واي شي تحتاجه هي بالذات ميقصر وين تلكه واحد بحنانه واخلاقه. وهو هم ميلكه احسن منها دكتوره مو شويه ان شاءالله.