رواية نيشان للكاتبة روز الفياض الفصل الثالث والثلاثون
وصلنه للمستشفى لكيناهم ناقليه لغير غرفه دخلنه لكيناه مغمض عيونه بس حس يينه فتح عيونه.
راسا مرت عمي شبكته وبجت بجي كل احنه بجينه على بجيها.
هو حاضنها ويبجي وياها.
وخرها بعدين عمي حظنه وظل يبجي.
انوب غيث بوسه وحضنه باس راسه وباس ايده.
ظليت واكفه مثل الصنم ماادري شسوي وكلهم واكفين وصل سراي هسه دوري اسلم عليه بس مااريد اسلم اريد افتح كلبي واحطه بنص قلبي حتى ارتاح وأمن.
اتدنيت يمه دنكت بست راسه وبعدين كعدت يمه عالحافه امسح وجبة دموع وتطيح غيرها.
قيس: شلونج؟
هزيت راسي زينه مااكدر احجي من دموعي.
قيس: زينه؟
هزيت راسي اي.
مرت عمي: توها وكعت على بطنها ومردت الولد.
كمز هو كال: لا والله؟
ضحكت كتله: والله موكعت على بطني على ركبتي جلبت رجلي باللحاف ووكعت بس هي متصدك.
قيس: تأذيتي؟
مريم: لا شالقضيه شنو حجه؟
قيس: غير تنتبهين.
مريم: كمت بسرعه اركض اريد الحك عليهم قبل ميجون ويعوفوني.
قيس: ليش اجيتي جان بقيتي نايمه؟
مريم: منيلي كلب ابقى وادري بيك كعدت مو اسبوع 7سنوات سود مرن عليه.
ضحك على كيف كال: مثل سيدنا يوسف.
مريم: اي والله.
لزم ايدي وضغط عليها.
بقينه نسولف ونحجي بس مطولنه كالوا لازم يرتاح.
وحاولوا يكوموا يمشي بس مكدر.
رجعنه للبيت كوه بقيت امشي واتلفت وراي ومن ردنه نطلع من يمه لزم ايدي: ديري بالج على نفسج وعلى علاوي.
مريم: اهم شي انت لتفكر بشي ثاني.
طلعوا عمي ومرت عمي وغيث وبقينه اني وياه بسته من خده وطاحت دمعتي على خده مسحها وباس ايدي كلي: لتبجين الحمدلله عدت سلامات. بس بساعتها من كطعوا علينه الطريق اول ماصرتي انتي كدام عيني واتخيلت علاوي والبنات بيدج.
دمعت عيونه مسحها كلي: فكرت شلون بيكم منو الكم وراي.
مريم: اسم الله عليك عساني اني ولا انت. لتفكر باحد كل احنه يم الله. وبناتك بعيوني لتفكر وتخاف عليهم بيوم. قيسان بناتك بناتي الله شاهد على محبتي الهم. حالهم من حال علاوي ان شاءالله.
قيس: اعرف، يالله كومي روحي نامي وادعيلي اكوم بسرعه.
كمت امشي واباوعله حسيته تعب حجه هوايه.
طلعت غصبن عني.
من رجعنه للبيت ظلوا يتناقشون علمود رجله لان الدكتور يكول احتمال ميمشي عليها لان العمليه مجاي تلتئم.
فقرروا ياخذوه للهند.
الايام البعدها جنت يوميه اروحله للمستشفى الظهر وبالليل هلكت المستشفى الصبح والظهر اروحله وارجع للبيت العصر بالعياده ومن اخلص اروحله.
وره اسبوعين قرروا يطلع للبيت.
من شفته يمشي ويعرج عرج قوي انقبض كلبي وانعصر عصر عليه.
متت من القهر. بس مبينت هالشي المهم عندي عايش وموجود كولش كافي.
كلت لغيث: ليش يمشي على عكازه؟ ميكدر بدونها يعني؟
غيث: لتحجين وياه بهالموضوع خلي براحته.
مريم: ليش شبي؟
غيث: ميتحمل ويتحسس خلي براحته هو اصلا كلها كم يوم تكمل الاوراق وناخذه للهند يسوي العمليه وان شاءالله حتى العكازه ميحتاجها.
مريم: يارب.
خلوله جربايه بالديوانيه والخطار وجبه رايحه وجبه جايه اني مداومت من يومها لان مرت عمي وامي ميلحكون وحسيته مكتئب وماله خلك.
جنت بالنهار مكابلته وكاعده اسولف وياه واضحك احاول اطلعه من الجو إلى هو بي بس ماكو فايده.
حتى ماله خلكي بعالم ثاني.
بس من جابوله بناته بيومها فرح وحسيت رجعت بي الروح.
فكلت لمرت عمي لو تحاجي ابرار تخلي البنات يبقون كم يوم يمنه واني ادرسهم واخليهم سايق يوديهم للمدرسه ويرجعهم.
حجت وياها مرت عمي مقبلت.
خلصت اوراقهم وساهمت بجزء من فلوس عمليته ماعندي وسافروا للهند قيس وغيث وزيد اجه وراح وياهم.
رجعت للدوام بس كلبي وعقلي وكل تفكيري يمه ليل ونهار ادعي كون تنجح العمليه.
جنت اتصل بي ميرد وادزله كومه مسجات كل ساعه مسج زين اذا جاوب على واحد بأخر النهار لو بأوله.
جنت اتصل على غيث اسأله عنه واتطمن عليه جان يحجي ويه الكل من يتصلون الا اني.
اشتعل واطفى ومااكدر احجي كلها تكول تعبانه نفسيته وماله خلك.
زين اشمعنه اني إلى نفسيته متتحمل يحاجيني ويطمني عليه.
ظليت مغثوثه وضايجه بقوا شهر هالشهر انشلع كلب كلبي بيه لا ليلي ليل ولانهاري نهار.
سووله العمليه ونجحت الحمدلله وخلال شهر بدا يمشي الحمدلله واني دخلت بشهري.
بس بقيت مااعرف شنو وضعي يمكن اتندم لان اتزوجني وحن لمرته وبناته من شاف الموت.
من كدما افكر ظل ضغطي يوميه صاعد وياخذوني للمستشفى حتى يركبولي مغذي بلكي ينزل.
وينزل وثاني يوم لو ثالث يوم يرجع.
اخر شي قررت الدكتوره لازم ابقى بالمستشفى احسن.
بقيت بالمستشفى اسبوعين بعد الاسبوع الاول رجعوا من الهند.
اجاني هو لمستشفى مصدكت من شفته محد كلي راح يجي للمستشفى.
يمشي الحمدلله بس شويه يعرج بس بعد عنده علاج طبيعي طبعا مستعين بعكازه لان عمليته تحتاج وقت العظم جان متهشم وهسه خلوله بلاتين.
من دخل للغرفه يمي اتفاجأت وماادري شحسيت بس بكلبي اله اشتياق مو طبيعي وفرح مثل طفل وشاف ابوه بعد غياب وسفر....
سلم وكعد واني ممصدكه عيوني.