رواية صراع الجبابرة للكاتبة روز الفياض الفصل السابع والعشرون
تتوالي الصدمات احياناً لتجعلنا في احدى الحالات: اما اكثر حذراً.
وإما اكثر حزناً.
او اكثر قسوةً.
الصدمة حين تأتيك الطعنة ممن حاربت لاجلهم كل من اساء اليهم ولو بكلمة ولو بنظرة، ولو بمجرد احساس..
اتصلوا بيه الجماعة وكالوا: يابة البنية طلعت مخطوبة
كرصاصة اخترقت تلك الكلمات قلبي فأحسست بالموت يسري في اوردتي وينتزع مني كل ذرة اوكسجين لاموت موتاً بطيئاً ليس فيه رحمة.
تلك التي احببتها خانت وعود الامس من اجل كلمات اليوم.
ايوب: لا ممخطوبة منو كال مخطوبة؟ ممخطوبه.
رد علي الرجال إلى يعتبر من عمامنه: لا بويه مخطوبة صارلها شجم يوم لابن خالة امها.
ايوب: عمي ممخطوبة لتخبلني. تحجي صدك انت؟
كلي: جا بويه اجذب عليك. هذا رد خالها بعد.
ايوب: تره هذا موبعقلة. رجال مريض.
كال: عمي يامريض يامو بعقله.
رجال مدرس يدرس بالجامعة.
لاهي صدمة لا هي ضربة لاهي موت الحسيت بي بلحظتها. من كلي يدرس بالجامعة عرفت الموضوع صحيح.
ايوب: ماشي عمي ماشي.
سديت التليفون واني احس نفسي راح اتخبل شنو معناته هالحجي معقولة هاي اتخبلت وقبلت باول واحد اتقدملها؟
لا مستحيل اكيد اكو اشتباه بالموضوع.
معقوله امها جبرتها؟
بقيت محتار شسوي هسه وكتج لمياء سافرتي؟
اروح للبصرة؟
لازم اروح للبصرة بعد مابيها مجال.
رجعت للبيت جهزت جنطة زغيرة بيها ملابسي واتصلت على البنات يجون يباتون يم امي لان اني طالع للبصرة.
بلغت امي وطلعت.
هالمره حسيت الطريق شطوله لان وحدي المره الفاتت جانت وياي لمياء واهلها وشبعنه ضحك طوال الطريق.
حسيت الطريق ماله نهاية.
كلبي محترك شسوي لو طلع الحجي صحيح؟
وصلت بالليل مااكدر اسوي شي هسه لازم انتظر لباجر الصبح واروحلها للجامعة.
بقيت لنص الليل كاعد وادخن.
الا شوية ردت اخذ السيارة واروح لبيتهم وادك الباب واگول لامها اريد بنتج واللي يصير خل يصير.
بس اتعوذت من الشيطان وحاولت انام.
---
شمه.
بليل الشتا البارد واني محتره بقيت كاعدة لنص الليل الف فكرة براسي كل شوية اتخيل سيناريو جديد مره اتخيل نفسي قابلة بحسام وصايرة خدامه مع حكم بالاشغال الشاقة المؤبدة.
واتخيل طريقة كلامه المتعالية وياي واسطر قائمة بطلباته واوامره يومية ماكو مكياج ماكو طلعة ماكو صديقات ماكو بنطرون ماكو صالون ماكو. ماكو. ماكو.
لحدما اختنكت من مجرد الفكرة.
وفوك هذا شخصيته مستفزة ويفرض نفسه ورأيه عالمقابل بدون خجل.
لا لا لا مستحيل اقبل بي لو شيصير.
بدون كل هالاسباب مااريده.
وارجع هالمرة لايوب.
مجرد مااتذكره احس باحساس يدغدغ كلبي.
فدوة لكلبه حبيبي الحنون.
صح هو جان شابعني رزاله هههه بس بعدين اتغير.
احب شخصيته ماخذ كل الامور بمنتهى الهدوء مو مثل باقي الشباب.
احب هدوئه وسكوته ونظراته وطريقة كلامه وكل شي بي.
احبه من يوكعني بالكلام ويحرجني.
احبه من يفاجأني بتصرفاته.
يتصرف بثقه وميهتم للحواليه تصرفاته غير متوقعه وصادمه بطريقة حلوة.
ماعبالك رجال جبير احسه تصرفاته عفوية مثل الاطفال رغم انه هو ميتصرف اي تصرف بدون ميحسب حساب ميتصرف بطيش ابد.
يفز كلبي من اتذكره شلون يكولي شمتي.
اووف ياايوب. وين صرت؟
وين اختفيت وخليتني انتظر.
مو خلص كلبي وتعبت..
كل يوم اكول اليوم تجي وماتجي.
وابقى انتظر.
وانتظر وهم ماتجي.
معقولة كل هالمشاعر جذب؟!
كعدت الصبح وجان آدم كاعد مكدرت اطلع كدامه لان يبجي.
اضطريت اخذه وياي.
وطول الطريق اباوع من الشباك بالباص عالناس عالبيوت عالشوارع والباص كل شوية يوكف بمكان حتى يصعد واحد من الموظفين والموظفات.
وصلنه للجامعة وداانزل وشفت واحد اعرفه واكف ويه طالب ويحجي وياه.
معقولة هو؟
محسيت الا برجلية اخذتني اله بدون وعي.
امشي واجر بآدم بأيدي.
يمشي على كيف واني كلبي فز وركض كبلي.
وصلت يمه واباوعله وهم بعدني ممصدكة عيوني.
معقوله هو؟
معقولة اجه للبصرة؟ معقولة اجه للجامعة علمودي؟
لو علمود شي ثاني؟
اخاف مو هو واحد يشبهه اكيد. بس لهدرجة؟
مندمج يحجي ويه الولد والولد يأشرلة كأنما يدليه على مكان.
اتحنطت مقابيله على بعد خطوات.
منتظرته شوكت ينتبه لوجودي.
راح الولد وبقى واكف وحده.
شافني.
بقى بمكانه يباوعلي بس اني احس طرت مبقيت بمكاني رغم خوفي يكون مجرد شبه مو اكثر.
ابتسم.
واني ابتسمت من اتأكدت هو هاي ابتسامته الحلوه.
اتحرك واجه بأتجاهي.
وصل يمي بس محاجاني دنك شال آدم وباسه وكله: شلونك؟
شتسوي جاي للجامعة؟ هاا؟
تدور بنات؟
باوعلي ورجع كل لادم: تلحك عالاذية وشلعان الكلب.
قبل مااحجي واسأله عن اي شي كلي: مبروك..
سمعت مخطوبة؟
بالبداية فزيت بعدين اتذكرت لمياء كلت يمكن هي كلتله يجوز خلت شريحة او كدرت تتواصل وياه بطريقة ما.
ضحكت كتله: اي، وافقت كله منك ليش هلكد تأخرت.
بس اتفاجأت بعصبيته: يعني لان تأخرت كم يوم مصبرتي؟ الناس تنتظر سنين وتصبر بس انتي كم اسبوع مصبرتي؟
شمه: على كيفك!
بالاول الناس تسلم تكول شلونكم شخباركم اشتقنالكم مو كبل تفتح مواضيع.
ايوب: جاوبي بالاول.
شمه: شجاوب شبيك ههههه هذا بطران عباله هو عريس لؤطه هههه.
ايوب: يعني شنو؟ وافقتي لو موافقتي عليه؟
شمه: ههههه شوافق شبيك من كل عقلك؟
ايوب: لتضحكين وتخليني اتخبل اني افور وانتي بقمة البرود.
شمه: ادري شبيك على كيفك ليش العصبية؟
ايوب: عمامي متصلين على خالج وكايللهم مخطوبة.
شمه: خالي منو؟ ياخال؟ اني منيلي خوال؟
ايوب: هذا اليدرس هنا بالجامعة إلى شغلج.
شمه: شبي؟ شنو كايللهم؟
ايوب: عمامي متصلين عليه حتى يكلوله نريد نجي نخطب كايللهم البنية مخطوبة لابن خالة امها.
شمه: يمه! اوكف خل استوعب.
يعني همه متصلين على حسام وكايللهم مخطوبة؟
همه كلولك متصلين على حسام؟
ايوب: مااعرف اسمه حسام لو صخام المهم خالج إلى يدرس بالجامعة شنو اسمه؟
شمه: هو اسمه صخام. الله يطيح حظه اذا صدك مسوي هيج.
ايوب: فهميني شصار من رحت لحدما رجعت منو هذا ابن خالة امج ومنين طلعلي بعد؟
شمه: هو هذا نفسه.
ايوب: منو؟
شمه: هو نفسه هذا الخ، ه هو اللي حجه وياي ويه امي بموضوع خطبه بس اني موافقت.
ايوب: يعني شنو؟
شمه: ايوب شبيك داكولك ماوافقت.
هو نفسه هو خطبني لنفسه وكللكم مخطوبة لابن خالة امها.
ايوب: يعني جان يضحك علينه؟ شكد ادبسز.
شمه: شكد حقير كول مو بس ادبسز لان ابد مكال متصلين بي بس اني من حجه وياي ماادري ليش ماارتاحيت وشكيت بأمره.
ايوب: شنو شكال؟
شمه: كلي اني احسنلج من الغريب ليش تقبلين بواحد غريب متعرفيه. بوقتها كلت ياغريب شيقصد.
اتنهد كلي: هذا منين طلعلي؟
شمه: منين طلعلي اني مو انت؟
ايوب: كله من امج جابتكم هنا وشلعت كلبي تدرين اني البارحة بس خابروا وبلغوني ركبت السيارة واجيت ووصلت بالليل لوما العيب جان اجيتكم للبيت كبل.
شمه: مو امي السبب ايوب. كله منك. انت السبب انت خليتني مثل العمية لحدما اجت مرتك شرشحتني وهزأتني وخلتني مااسوى فلس كدام امي. شلون تريد امي تتصرف وهي تسمع انه بتها وحده طايحة حظ وبلاشرف وماشيه ويه شكو واحد متزوج؟
ايوب: هسه طلعت اني الغلطان؟
شمه: اي انت الغلطان. انت جذبت علي من الاول.
ايوب: لااا. اخاف عجبج حظرة الدكتور اشوفج ظليتي تطلعين حجج هسه.
شمه: مااسمحلك ايوب، مااسمحلك ولااسمح لاياً كان يحجي ويايه هيجي مو شفتني حجيت وياك وحبيتك تظل تخربط بالحجي وكل حجايه وكتلي عجبج فلان وعرفتي فلان، انت اكثر واحد يعرفني، بس يمكن اني ماعرفتك زين..
فقدت اعصابي ومااتحملت اتهاماته المتكررة إلى مااقبل احد يشكك باخلاقي حتى لو جان هو.
بقى صافن بوجهي واني سكتت ودرت وجهي لان دمعت عيوني.
اخذ ادم بأيده وراح كعد على مسطبه.
بقيت واكفة بمكاني واباوعله يحجي ويه ادم وحاكرني.
وره شويه كعد ادم واجه كلي: هلوو
باوعتله بس محجيت كلي: شبيج ردي السلام
شمه: سلاميش بعد وكت
ايوب: لا هذا وكته. اول شي بدينه بالمهم وبعدين هسه نسلم. شلونج؟
ضحكت هو هم ابتسم كال: والله لو قابله بي جان ذبحتج وذبحته.
ضحكت كتله: شدعوه. على كيفك عيني الذباح.
ايوب: عبالج ضحك هاا؟ والله والله لو قابله بي جان الله يعلم شسويت.
شمه: شتسوي مثلا؟
ايوب: ماادري بس اكعد مراح اسكت، كل هالمشاكل وكل هالصبر وبعدين بكل برود ترحين لغيري لعب هو.
شمه: يعني علمودي اجيت؟
ايوب: لا جاي اقدم عالدراسات لان بغداد مابيها بس هنا.
ضحكت كتله: تأخرت؟ كل يوم اكول اليوم تجي. اليوم تتصل.
ايوب: صارت هوايه شغلات وانحلت كل الامور ان شاءالله بس وين اتصل وبيمن حتى رقم ماعندي الج.
شمه: عندي رقم بس خفت اتصل.
ايوب: عندج رقم؟ ومخليتني مشتعل ومشلوع كلبي؟
شمه: مو مااضمنك، ادري بيك متكدر متتصل اذا عرفت رقمي واخاف امي تعرف وهالمره هددتني اذا ذيج المره جابتني للبصرة فهالمره تمشيني عالصراط المستقيم..
ايوب: اهوووو، احنه شلون بأمج بالله؟ يعني اني اخلص من امي وابوي وتبقى امج عارضتلي بالوسطه؟ استغفر الله ربي.
شمه: عبالي لمياء اتصلت بيك وكلتلك على حسام.
ايوب: لا وينها لمياء راحت وكطعت بينه.
شمه: كتلها كوليله على حسام وكوليله امي بدت تلين.
ايوب: شنو بدت تلين؟
شمه: يعني خيرتني بينك وبين حسام كتلها مااريد حسام لو شيصير لو ابقى بلا زواج.
ايوب: لعد شتريدين؟
ضحكت كتله: مااريد احد ههههه.
ايوب: تعبت.
شمه: واني هم تعبت وكلبي خلص راح يصير سنه واحنه نركض بدون نتيجة.
ايوب: لا هانت خلص مبقى شي لوما هالحسام خرب الشغل جان اني بمكان مجاي بحدي جان جبت وياي امي والبنات.
شمه: عفيه مو تتأخر. امي متكدر تغصبني بس مااريد المشاكل بيني وبينها تزيد يوميه تكولي يضحك عليج لو يريدج صدك حان خطبج.
ايوب: امج راح تخليني ادز عليها جماعة يخطفوها اخطبج ونتزوج وبعدين يرجعوها..
شمه: هههههههههههه لا حرام عليك هي من خوفها علي عبالها انت جذاب.
ايوب: مثل بتها..
شمه: كلما اصدك حجيها ارجع اكول اذا هو ميحبني اني احبه. مااكدر اقبل بغيره.
ايوب: عفيه عليج هيجي ظلي فكري.
شمه: شوكت ترجع لبغداد؟
ايوب: هسه. شنو ترديني اروح؟
شمه: هسه؟ ليش؟، تجي بس اشوفك ساعة ساعتين وتروح وتختفي وتشلع كلبي..
ايوب: وعلى اساس اني كاعد هناك مرتاح وانتي هنا؟ وانوب طلع هالكلب هذا وهسه الف فكرة براسي. شلون اروح واخليج هنا وادري بي يريدج؟
شمه: خيولي واذا رادني اني مااريده.
ايوب: اخخ انوب تشتغلين هنا يمه حتى كل شوية جاي يمج يشرب چاي.
شمه: ههههههه لا ميجي هذا الچاي اختصاصك انت مااوديه لاحد غيرك.
ايوب: الله يقبل بهالاذيه؟
شمه: مااصدك شوكت تخلص كل هالمشاكل ونرجع.
ايوب: انتو بس لو ترجعون تصير الامور اسهل.
شمه: لا منين اجتها السهولة.
ايوب: عالاقل اشوفج يومية.
شمه: يومية؟ تره انت طماع وحقها امي تخاف منك.
ايوب: هههههه امج ربتلي عله بكلبي من جابتكم لهنا. بس يالله حقها ام وتخاف على بتها.
بقينه ساكتين شويه بعدين كال: هاا؟ نروح؟
شمه: وين؟
ايوب: نطلع؟
شمه: ودوامي وآدم؟
ايوب: دوامج اول وتالي راح تبطلين منه، بس اذا هاي روحي اخذي اجازة وتعاي.
شمه: ادري وين نروح؟
ايوب: روحي وبعدين اكولج بالطريق.
شمه: اخاف تخطفني؟
ايوب: ياريت واصير رئيس عصابه بسببج ههههه.
شمه: اوك خل اشوف وارجع.
بقيت ادم يمه ورحت، احس نفسي اكمز عالكاع من فرحتي مستعجله اريد ارجع اكعد وياه.
رحت اخذ اجازة زمنية ورجعت.
طلعنه واني كلبي يدك خوف على فرح على ترقب على حماس بس اتفاجأت من جابني لبيتنه.
هذا شارعنه.
شمه: ايوب وين جايبنه تره هنا بيتنه هذا شارعنه؟
ايوب: بالضبط
شمه: شنو بالضبط. تريد تسويلي مصيبه.
مجاوبني كتله: ايوب شبيك؟ لحد يشوفنه ويروح يكول لامي.
ايوب: هو اني اريدها تعرف.
شمه: اتعوذ من ابليس شبيك تره إلى بيه مكفيني لتزيد الطين بله.
وصلنه لبيتنه طفه السيارة ونزل وكلي: ياالله نزلي.
نزلت اني كلبي يدك برعب وخوف.
شال آدم واني رحت دكيت الجرس واحس كلبي يرجف من الخوف.
شمه: قبل متطلع امي ميهديك الله وتروح؟
ايوب: هاا. ترديني اروح؟
شمه: ايوب عفيه مو وكت شقاك هسه
ايوب: اششش خالتي اجت.
شمه: هو شمخوفني غير خالتك.
فتحت امي الباب وشعور الصدمة بين على وجهها اول مشافت ايوب واكف على جهه وشايل آدم..
النظره إلى على وجهها مااكدر اوصفها.
هي دهشه هي صدمه هي عصبيه مااعرف. مااعرف شنو بس حسيتها متشنجه.
ايوب: السلام عليكم خاله شلونج؟
جاوبته امي بمنتهى البرود ولازالت النظره نفسها على وجهها: وعليكم السلام.
شمه: احم، ماما ايوب اليوم اجه يريد يحجي وياج.
بقت ساكته واني فتت للبيت وكتله: اتفضل.
دخل للبيت وامي وراه واني آخر شي اقدم رجل وأخر رجل.
كعد بالصاله وامي كعدت كباله واني على جهه.
تلاثتنه ساكتين وصافنين.
بعدين كتله: چاي لو كهوه؟
ايوب: والله ياريت لو چاي لان طالع من السبعة وممتريك.
شمه: ان شاءالله.
رحت للمطبخ اسوي الجاي بس اذني يمهم اريد اسمع حتى النفس.
سمعته هو بدا بالكلام: شلونج خاله؟
امي: الحمدلله نحمد الله ونشكره
ايوب: الحمدلله، خاله اني جاي اريد احجي وياج بموضوعنه اني وشمه. طبعاً اني البارحة بالليل اجيت من بغداد.
امي: الحمدلله عالسلامة
ايوب: الله يسلمج ويخليج، اول شي اني كل الشغلات إلى صارت بالماضي مااريد احجي بيها. غلطان اني اعترف بس لان احبها. بتج خوش بنية مؤدبه ومتربية عاشت ايدج على هيج تربية لهذا السبب خفت اكوللها متزوج.
امي: بس هذا مو عذر انت متدري.
قاطع كلامها هو كللها: ادري بكوولشي ادري كل اللي صار دريت بي. بس كتلج اني مااريد افتح سجلات ودفاتر قديمه يجي يوم وشمه تحجيلج كل شي ان شاءالله بس هسه اني جاي مناك لهنا علمود اخطبها منج.
سمعت الجملة الاخيرة وكع الاستكان مني وانكسر.
ظلت ايدي ترجف وامي صاحت: هاا شمه شوكع؟
شمه: ماكو شي ماما الاستكان انكسر، طار الشر..
سكتت امي واني ضحكت من فشلتي.
امي: شلون تخطبها يعني؟ اكو واحد يجي يخطب وحده؟ لا ام لا اب لاحد من اهله؟
ايوب: اول شي انتي وافقي واني اجيبهم واجي..
امي: شلون يصير هالحجي خير بالاول نتعرف عليكم يجوز احنه منوافق.
من سمعت امي كالت هالجملة وكع مني الاستكان الثاني.
كلت اهووو.
امي: هاا شمه خلص درزن الاستكاين ماما وانتي بعدج.
ضحكت كتلها: ماما طار الشر طار.
ايوب: مااريد مالازم اذا هيج.
شمه: لا لا اجيت صبيت شبيكم.
اخذت الجاي وايدي ترجف عبالك اول مره اقدمله بس هالمره مختلفة لان امي يمكن هسه تتمنى تحط متفجرات بالاستكانه ههههه.
اخذ الاستكان بس مشرب منه، خلاه عالطاوله وكلي: رحم الله والديج وعاشت ايدج.
شمه: بالعافية.
التفتت امي علي خزرتني انخلست.
كعدت يمهم ساكته وهو كال: اني قبل فتره اجيت للبصرة وشفت عمامنه هنا وحجيت وياهم وعلى اساس يوصولكم خبر وياخذون منكم الموافقه حتى نجي بس البارحة اتصلوا بيه كالوا البنية مخطوبة.
شمه: جذب
امي رجعت خزرتني وكلتله: منو المخطوبة شمه؟
ايوب: اي على اساس متصلين بخالها ماادري منو استاذ جامعي وهو كايللهم مخطوبة لابن خالة امها.
شمه: حسام كايللهم هيج.
امي: اي حجوا عليها بس بعدنه موافقنه منطيناهم جواب لهسه شمه بعدها تفكر.
شمه: فكرت وكتله لا بنفس اللحظة.
امي: وهو خالج شمدريه انتي كلتي لحسام هيج عباله موافقه اكيد لان حسام رجالوالنعم منه ميتفوت.
باوعت لايوب شكله معجبه الحجي. كتلها: ماما همه مخابرين لحسام مو لخالي لا. لحسام نفسه وهو كاييلهم مخطوبة.
امي: يااا. منو كال؟
شمه: مو هاي كدامج الولد يكول.
ايوب: اي هو كايل مخطوبة هو مو استاذ جامعي؟ معناها هو.
بقت امي ساكته شويه بعدين كالت: والله دخت مااعرف شفكر معقوله حسام يسوي هيجي؟ حتى مكال اكو احد من طرفكم متصل بي.
ايوب: بعد هذا اللي صار، بس كلولي اني ركبت واجيت لهنا.
امي: اممم
ايوب: هاا وهسه؟
امي: شنو؟ انطينه مجال نفكر نستشير اني لهسه قلقة منك ومن زوجتك بعد اللي سوته ويانه بصراحة اخاف على بنتي تتورط وتتزوج واحد متزوج.
ضحك هو كللها: لتشيلين هم احد اني رايدها بالحلال على سنة الله ورسولة لامرتي ولاغيرها يكدرون يأذوها واني موجود.
امي: لاحبيبي ميصير كل شي بالاصول هسه انت طرحت وجهة نظرك بس احنه لازم نعرف رأي اهلك موافقين مموافقين؟
ايوب: موافقين موافقين
امي: لا غير لازم نتأكد خومو بس حجي هو.
ابتسم كلتله: اي بعد هذا الصدك الحق ميزعل واني ماعندي غيرها اريد اتطمن عليها وعلى ابنها قبل مااموت بس مو معناها اشمرها بالنار.
ايوب: حقج
امي: بعدين ياماما ابوك والي سواه والي صار هذا الشي صعب شلون يعني تتزوج واحد ابوه حاط عينه عليها.
حسيت ايوب انحرج واني هم من يمي انحرجت. وامي حقها.
ايوب: خاله بنتج بعيوني احطها. لتخافين لامن مرتي ولامن ابوي. ابوي اصلاً طالع من حياتنه وضعه بالنسبة النه منتهي، هاي من الاخير كتلج، والوالده هم من عرفت اني رايدها لشمه وعرفت باللي سواه الوالد يعني مااعرف شكولج المهم صارت مشكلة جبيرة عدنه بالبيت وعلى اثرها امي بعد طلبت منه ميرجع للبيت. لان هو البيت بيتها بأسمها. وانتي هم ان شاءالله تشوفيها وراح تعرفين منها شكد هي عانت وياه واتحملت سوالفه بس بعد شنسوي نبقى شايلين اسمه غصبن ماعلينه..
امي دارت صفنت علي شويه بعدين كالت: الله كريم، يصير خير ان شاءالله كل شي قسمه ونصيب محد ياخذ غير نصيبه.
ايوب: اني حبيت اوضح الصورة كدامج حتى متفكرين اني العب عليها لو اجذب عليها الله يشهد على كلامي اني جنت ناوي عالايام اجيب الوالده واجي بس الخبر اللي كالوه البارحة خبلني وخلاني اجي وحدي بس حتى اتأكد واحجي وياج. والحمد لله طلع الخبر مو صحيح.
امي: بس انت وين اندليت بيتنه؟
اني هنا انخلست..
يبووي بس يحجيلها على العميل المزدوج وتحط عقلها ويه لمياء!
---
---
غريب هو ذلك القلب.
غريبة تلك المشاعر التي نشعر بيها.
غريب هو الحب.
كل شي يتعلق بك فهو غريب.
فلولاك ماكان هذا الشعور ولاعاش قلبي ولا نبض.
---.