رواية صراع الجبابرة للكاتبة روز الفياض الفصل الرابع والعشرون
جنت حاطه ايدية بحضني.
مد ايده لزم ايدي، دكات كلبي عبرت المليون..
ردت اسحب ايدي منه بس مقبل، لزم ايدي حيل.
ايوب: باوعيلي عالاقل.
بقيت مثل مااني كبريائي وكرامتي منعوني احجي وياه لو اباوعله.
بقيت ساكته وامسح بالدموع.
هو هم سكت واسمع حسراته. بعدين كلي: تردين اروح؟
هم مجاوبته. حسيت بي كام وكف درت عليه كلي: الظاهر جيتي مناك لهنا بدون فايدة.
يالله اشوفج بخير.
شفتها صارت صدك لزمت ايده كتله: لااا. لتروح.
بقى واكف شوية بعدين كعد يمي ولزم ايدي كلي: هااا نحجي هسه؟ اريد اعرف معنى هالدموع هاي شنو؟
شمه..
مااتحمل دموعج.
محجيت رجع كلي: دموع الفرح لو دموع الحزن؟
شمه: الصدمة.
ايوب: ههههه ممتخيله اجي وراج مو؟
شمه: ممتخيله تتذكرني.
ايوب: دائما ظنج بيه سيء، دائما مخليتني بقفص الاتهام.
شمه: ماكو شي بدون سبب
ايوب: آسف حبيبتي، آسف على كل شي صار وياج بسببي
شمه: مصار شي.
مجرد رجع كل شي لوضعه الصحيح.
ايوب: شنو هو الوضع الصحيح تبتعدين عني؟
ترحين للبصرة وتشتغلين ويه واحد توه مصارلج، شكد صارلج من عرفتيه؟ شهر؟ شهرين؟
تنهزمين مني وتغيرين رقمج؟
وتخليني احتار شلون اكدر اتواصل واحجي وياج؟ هذا هو الوضع الصحيح؟
مجاوبته لان مجنت اريده يزعل ويروح مااريده يروح ويخليني شكد جنت مقهورة ومهضومه من اللي صار بسببه بسبب جذبه علي بس اشتياقي اله جان اكبر.
ايوب: جاوبي. ليش ساكته؟
شمه: تريدني ابقى مو؟ لان يمكن محصلت وحده تجذب عليها وتگول ممتزوج.
ايوب: لااا. اني ضميت عليج الموضوع اعترف بس مجذبت انتي مسألتيني اذا متزوج لو لا اكو فرق.
شمه: متأكد اكو فرق؟
المفروض المتزوج ميحاول يتعرف على وحده ثانية خارج اطار الزواج.
يعني كل ظني انت ممتزوج لان اذا متزوج معناها تريد تكضي وقت وياي وتتونس وبعدين من تمل تشمرني. تتذكر الكلام اللي كلته إلى عن الحجي من جان عبالك اكو بينه شي؟
نفسه اجه ابالي بساعتها.
ايوب: انتي دائما تخليني مع ابوي بنفس الخانه. هاي هي مشكلتج ماعندج ثقه بيه. من البداية انت ماعندج ثقة بيه وممصدكة حبي الج. يعني بأختياري ابوي انسان مريض بهيج مرض. ليش؟
باوعتله كال: اي مريض لتباوعيلي هيج هذا مرض. واذا انتي هاي نظرتج كانت وما زالت معناها جيتي لهنا مجان الها اي داعي.
شمه: اذاً ليش اجيت؟
ايوب: لان طايح حظ. عبالي تفرحين من تشوفيني. عبالي تحبيني مثلما اني احبج واريدج.
كلي بعصبيه، بقيت ساكته لان كلما احجي شي اعفس الدنيا واخليه يصير عصبي ويضوج. رغم الكل الحق وياي بس جنت بالضبط مثل المدمنين حتى اذيته احبها ووجوده يسكن علي المواجع.
ايوب: لاآخر مره راح اسألج هالسؤال وجوابج هالمره هو إلى راح يحدد مصيرنه. وراح تتحملين نتيجة اجابتج، شمه، تحبيني وترديني مثلما اني احبج واريدج لو لا؟
شمه: جنت.
ايوب: جذابة. عيونج تكول غير شي
شمه: لا هذا الصدك.
ايوب: ليش تكابرين؟ مو انتي الخابرتي قبل كم يوم من عرفتي بيه سويت حادث؟
شمه: شوكت؟ اصلا ماعندي تليفون. اتصور حتى التليفون اخذوه مني بسببك.
ايوب: هههه اي على اساس فاقده الذاكره هسه. اتصلتي شمه.
شمه: لافاقدة الذاكره ولا اي شي بس إلى تريده بعد صعب حيل صعب يصير ولو مااعرف انت شتريد بالضبط.
ايوب: اريدج تصيرين مرتي..
شعور صعب وصفة حسيت بي فرح على خجل على ماادري شنو مزيج منعش من المشاعر من مجرد كلمة..
ابتسمت غصباً عني كتله: تأخرت.
ايوب: لا كل شي يتم بوقته المكتوبله لاقبله ولابعده.
شمه: لو قبل جان بيها مجال بس هسه لا.
ايوب: ليش يعني؟ علمود شغلج؟ اصلاً لو اتزوجنه مراح اخليج تشتغلين.
كلما يحجي بصيغة الجمع او التملك كلبي يظل يدك.
شمه: ايوب كتلك مابيها مجال خلص.
ايوب: شنو مابيها مجال شنو جاي اشتري سيارة اني. شنو يعني مابيها مجال اتعرفتي على احد غيري؟
شمه: لاااااء، لاء. شنو هالحجي هذا؟
ايوب: لعد شكو فهميني؟ احجي خليني افتهم؟
شمه: اكو اشياء صارت انت متعرفها ومااكدر احجيها ولتسألني شنو لان مراح احجي شي..
سكت شويه بعدين كلي: قصدج على جيت منى الكم للبيت والمشكلة إلى سوتها؟
شمه: منو منى؟
ايوب: مرتي
سكتت وظليت صافنه هذا وين عرف معقولة هي حاجيتله.
ايوب: لتسكتين، جاوبيني. اذا قصدج هذا الموضوع فأدري بي كلولي.
شمه: منو كلك؟
ايوب: ناس
شمه: منو؟ محد يعرف بس لمييياااء. هااا لمياء هاي تنقلك الاخبار؟
ضحك على كيف كال: لمياء عميل مزدوج هههه.
شمه: مادام عميل مزدرج معناها ميحتاج احجي شي كل شي تعرف.
ايوب: كل شي اعرف. من جيت منى واللي سوته ولوكعة والدتج والي سوته بعدما اتحسن وضعها والي صار من اجيتوا لهنا كله اعرفه.
شمه: شنوالي صار من اجينه لهنا؟
ايوب: ضروري نحجي بهالموضوع يعني؟
شمه: اي مفهمت شنو إلى صار؟
ايوب: منو ضربج؟
اتفاجأت. وبنفس الوقت ضجت لان هذا شي خاص ومحرج..
لمياء حاجيتله كل شي، كله مني اني الحجيتلها.
شمه: رجال جبير ومو بوعيه..
ايوب: اممم. كم مره ضربج.
خنكتني العبرة كتله: مر. مرة، وحدة..
بقى يباوعلي مسحت عيوني ودرت وجهي كتله: عنده حالة نفسيه.
ايوب: زين، ليش بجتي؟
شمه: ايوب. كافي رجاءا لتفتح مواضيع مابيها بس نكد، ماله داعي نحجي بهالامور تره مالي خلك.
ايوب: لان هذا الصدك وجودج هنا بعيدة ووحدج ومع ناس متعرفيهم غلط شتتوقعين يصير طبعا الشغلات اللي تصير بس مشاكل ونكد.
شمه: المطلوب شنو مني هسه؟
ايوب: ماكو، ممطلوب منج شي الخطوة الجايه كلها علي. بس اريد عنوانكم ورقمج.
شمه: مو كتلك ماعندي تليفون اخذوه. شعجب لمياء مكايلتلك ماعندي خط تليفون؟
ايوب: مو مهم اني اكدر اوصلج بأي مكان مو صعبة بس اريدج تصبريلي بس هسه، بس هالفترة حتى المره الجاية اجيب امي وخواتي وياي.
شمه: وزوجتك؟
ايوب: واخيرا سألتي، شوفي حتى تبطلين ظنج السيء بيه وتقارنيني بالحجي..
شمه: اهوو لتكول تقارنيني بالحجي.
ايوب: لعد شكول مجذب قابل مو بكل شغله تصير وكتلي مثله؟
شمه: انت تخلي نفسك بموقع شبهه. انت محجيت الصدك.
ايوب: لان اول مره اعرف بنية. اول مره احب وحدة. مردتج تعرفين لحد متبادليني نفس المشاعر مااريد اخسرج، لو اني صدك جذاب جان منقلتج ويه مؤيد ولا رجعت نقلتج يم سرمد..
ولو اني مثل الحجي جان محاولت ابعدج عنه بالعكس جان حاولت استغل الوضع. جان شفتيني يوميه مع وحده شكل. جان مبطلت هبة وخليتها سمسارة إلى مثلما جان تسوي لابوي.
شمه: بطلت هبة؟
ايوب: طبعا. لعد تردين ابقيها هي وقذارتها بعد إلى سوته. ولعلمج مو بس بطلتها خليهم يجرجروها للمركز.
شمه: لا ايوب لااا ليش هيجي اخاف متفك مني ياخه بعد.
ايوب: مو بكيفها، اصلاً انطوها فرصة اخيرة اي تصرف بعد يصدر منها راح اقدم بيها شكوى. هي اللي كايله لوائل يدزلج المسج وكايلتله اكو شي بينه.
شمه: اممم متريد تنكشف مو؟
ايوب: اول وتالي انكشف وتعرفين جان مو وقته جنت بعدني خايف اكولج.
شمه: وهسه؟
ايوب: شمه ماعندي طاقة بعد ابرر واعيد الكلام على كلمن يسألني ليش؟ فهالمره الاولى والاخيرة اللي راح احجيلج بيها عن علاقتي بمنى، منى تصير اخت مؤيد تعرفين. يعني بت عمي. واتزوجتها بناءا على رغبة اهلي واهلها مجنت مجبور ولاهي لكن كل مابالموضوع انه اني مجنت احب وحده ولا اعرف اي وحدة فمن اجيت اتزوج مجانت تفرق عندي بت عمي او غريبة، راح يصيرلنه ثمن سنوات متزوجين بس مااكدر اسميه زواج فعلي. لان كل مواصفات الزواج مابي. واولها المشاعر. اللهفة. الاشتياق. التضحية. وحتى المحبة مااحس نفسي احبها ولاهي ليش اني كتلج اول مره من حجينه كتلج لاول مره اجرب هالشعور لاول مره احب، هي بعالم واني بعالم ثاني واتحملت هالوضع لان مجان اكو بديل يعني ماكو وحده ابالي وجان الكل يكولي اتحمل باجر تتغير وبت عمك ومن هالحجي، بس من عرفتج وحبيتج اتغير كل شي بالنسبة إلى. تفكيري ومشاعري وشخصيتي رغم معرفتي بالمشاكل إلى راح اواجهها بس وصلت لمرحلة مااكدر اتخيل حياتي بدونج. مااكدر اخلص يومي بدون مااحجي وياج واتصل بيج واراسلج.
شمه: مر وقت طويل معقولة مكدرت تنسى وتتعود.
ايوب: مر وقت طويل لان جنت اريد اصفي حساباتي مع الكل هبة ووائل ومنى وامي وخواتي ومؤيد ياالله اكعد وياج وابررلج ونتفاهم. مجنت متصور امج ردها سريع وعنيف لهدرجة..
باوعت للساعة كلي: لتباوعين للوقت وتحسبين. خلينه ناسين الوقت شيصير؟
شمه: مااريد اتأخر انت صرت تعرف امي.
ايوب: هاي الساعات محسوبه من عمري وعمرج.
شمه: لتكول هيج اخاف
ايوب: ليش؟
شمه: اخاف. يتخيلي مااشوفك بعد.
ابتسم كلي: من البداية وكولي هيج الا تداهرين وتتعاركين يعني نشفتي ريكي.
شمه: هو منو إلى يخليني احجي واتعارك غيرك.
ايوب: خفتي علي من عرفتي اندعمت؟
شمه: لاء، ليش اخاف عليك؟
ايوب: يعني مو بيه ولابيك ولا كون اني ولا انت هههه.
استحيت فشلت هاي لمياء حاطه الحجي كله بحلكه آخ لو الزمج.
شمه: مادام تعرف ليش تسأل؟
ايوب: ردت اسمعها منج. ميصير؟ جرعة تشجيعية مقابل الطريق الگطعته من بغداد للبصرة والمشاكل إلى راح الكاها كدامي من ارجع.
شمه: اذا مالك خلك المشاكل ما لازم.
ايوب: هيجي يعني؟ اوك بس تره حتى لمياء ابطلها لو رجعت حتى بعد متنطيج اخباري.
شمه: اني مطلبت اخبارك انت تدور اخباري.
ايوب: عادي حتى لو ماكو لمياء اكدر اوصلج بالف طريقة تعرفيني متصعب علي شغلة.
شمه: يعني هذا تهديد؟
ايوب: تهديد ووعيد هههه انت تكولين انت تدور اخباري غير احبج.
شمه: واني هم.
ايوب: شنو؟
شمه: اني هم
ايوب: ادري. انتي هم شنو؟
شمه: اهووو لتحرجني
ايوب: والله مااروح اليوم اذا متكوليها.
شمه: بعد احسن اني مااريدك تروح
ايوب: كوليها.
شمه: اكولها بس بشرط.
ايوب: شنو الشرط
شمه: متجذب علي مرة اللخ مااريد تضم عني شي. مااريد اكتشف شي انت ضامه عني عن طريق ناس ثانية مثلما صار.
ايوب: ماعندي اسرار. ماعندي شي مضموم حتى زواجي مجان بالسر حتى يعتبر شي مضموم بس انتي مسألتي واني مجنت اريد احجيلج لحدما اتأكد من مشاعري ومشاعرج.
شمه: قصدك لحد متوكعني وتضمن حبي الك يالله.
ايوب: متندمه لان حبيتيني؟
شمه: مااكدر اتندم. مو بيدي احس هذا الشي غصباً عني مالي ارادة بي حتى لو ردت وفكرت انساك لو اكرهك مااكدر وهسه بهاللحظة راضية وقابلة بكل إلى صار بس المهم النتيجة وين راح نوصل اذا صدك تحبني ورايدني.
ايوب: والله احبج ورايدج واللي خلق محمد احبج ورايدج.
شمه: وزوجتك؟
ايوب: مالج علاقة بيها احنه راح نتزوج كدام الله وخلگة يعني بعلمها سواء وافقت او لا اني اللي يهمني امي موافقة ومؤيد هم مگال شي الرجال لان يعرف وضعنه اني واخته منتهي.
شمه: استاذ مؤيد يعرف؟ شكد عيب والله فشلة.
ايوب: لافشله ولاعيب ممسوين شي عيب هذا زواج على سنة الله ورسولة شفت حبيتج وخطبتج شنو العيب بيها، لتصيرين حساسة واصلا هو ميعرف منو إلى اني رايدها بس اول وتالي راح يعرف شكو بيها يعني.
شمه: وابوك؟
اتنهد وكلي: ابوي آخر واحد يحقله يحجي ويتدخل او يعترض. مباقي شي بس ارجع لبغداد ان شاءالله ابدي اشوف ناس من اهلنه هنا بالبصرة حتى يجون يمهدون الطريق مع امج قبل منجي. ميصير نجي هيجي فجأة وندك الباب خاف تكون بعدها عصبيه من اللي صار.
شمه: بعد هم انتظر؟
ايوب: شمه اني رجال مااحب اسوي شي بعجلة بدون دراسة وتأني لان مااحب اخسر. لازم انطي المقابل وقت يمكن يتغير او يغير رايه وبعدين اتصرف على هذا الاساس هذا زواج واني مو زغير حتى اتجاهل الاصول واسوي إلى اريده بعناد الكل. بالنهاية هذول اهلي واهلج مااريد اخسر احد من اهلي ولااريدج انتي هم تخسرين احد من اهلج. صار واضح؟
هزيت راسي اي وابتسمت..
ايوب: امج منين ترجع من بيتمن؟
جاوبته.
اجت لمياء كالت: جبتلكم عصير گلت اكيد نشف ريگكم.
ايوب: ههههه اي والله صدك نشفت ريكي صديقتج.
لمياء: عساني بمثل حالكم
شمه: هههههههههههه
ايوب: لاان شاءالله متصيرين مثلنه
لمياء: ياعمي اني اريد اصير مثلكم
شمه: هههههه لا هي قصدها غير شي لتلح وياها.
ايوب: اعرف قصدها ههههههه
لمياء: تره مباقي وقت هوايه لحكوا احجوا اخاف اكو شي اني نسيت انقله لاحد بيكم ههههههه.
شمه: حسابج بعدين على هذا الموضوع.
راحت لمياء كتله: شوكت ترجعون لبغداد؟
ايوب: باجر راجعين
شمه: يعني بس يوم واحد.
ايوب: تردين نبقى بعد؟
شمه: ياريت
ايوب: المشكلة لمياء واهلها زحمه اعطلهم ويحتاجوها بالمكتب لان مؤيد ميلحك على شغلي وشغلة.
بقينه نحجي تلث ساعات مروا عبالك تلث دقايق.
بلمح البصر خلص الوقت.
ايوب: همم، حان موعد الرحيل.
هزيت راسي اي، خفت ابجي لان اكو بداخلي خوف بعد مراح اشوفه.
ايوب: لا لتدمعين وتبجين معناها مراح اكدر اروح اذا بجيتي.
ضحكت ومسحت دموعي كتله: معناها لتروح
ايوب: لا كولي روح حتى ارجع اخلص كل شي وارجعكم وياي لبغداد.
شمه: ياريت.
ايوب: وبعدين لتخليني ابطل وابقى وياكم بالبصرة هههه.
شمه: لا مااريدها اريد ارجع راح اموت من الخنكة.
ايوب: هانت.
مشينه سوه لباب الخروج وهو لازم ايدي.
اول مره انتبه على نفسي من اكون وياه هواااي افقد من حرصي وانتباهي واهتمامي للناس.
ليش ياترى؟
مع العلم متأكدة من نفسي لو شفت اثنين يمشون كدامي ولازمين ادين بعض راح انتقدهم.
ومع العلم اول مره اليوم يلزم ايدي.
ليش العيب وياه يصير مباح ومو عيب؟
ايوب: ميصير اني اوصلكم؟
شمه: لاا يمعود ابعد عن الشر وغنيلوا.
ايوب: ياشر قصدج امج هههه لامااسمحلج تحجين عليها راح اصير نسيبها وتصير خالتي ام مرتي هههه.
اجت لمياء وامها وهو راح وكفلنه تكسي.
صعدوا واني بقيت واكفة مينطيني كلبي اروح واعوفه.
شمه: شلون بگلبي؟
ايوب: شبي؟
شمه: ميخليني اروح اولي.
ايوب: تره انتي هيج دتغريني اخطفج ههه. ياالله عمري ديري بالج على نفسج وانتظريني.
مدت لمياء راسها من الشباك كالت: بعد شتردين كلج عمري. بخت.
امها ظلت تضحك واني انحرجت وايوب مغلس.
شمه: دير بالك على نفسك وانتبه للطريق.
ايوب: صار.
صعدت بالسيارة وكتله: مع السلامة.
اشرلي بيده مع السلامة.
ظليت شوية ملتفته اباوعله بعدين صبت دموعي.
لمياء: هاا عيوني ليش البجي توه راجعه من موعد ولا بالاحلام شنو اتعودتي مبين على الكلام الحلو ههههه.
مجاوبتها كالت: لج شبيج فهميني صار شي بينكم؟
شمه: لا
لمياء: لعد شكو تبجين خوفتيني كلت راح الايفون.
شمه: هههههه عابت.
لمياء: لا والله صدوك شبيج؟
شمه: ماادري شبيه يمكن من كدما دكت مصايب على راسي صارت عندي خوفة من افرح اخاف وراه تجيني مصيبه.
لمياء: لا انجبي ماكو هيج شي لتفكرين بتشاؤم كلها عشر تيام او اسبوعين ويجي اوبي يخطبج. اووي فدوه. بس عفية عود من يصير خطيبج ذكريه عالايفون مو يغلس.
شمه: هههههههههههههههههههههههههههههه مخبله والله.
لمياء: اني مخبله لعد انتي شنو صار ساعة تبجين بدون سبب بس بسيطة هسه اراويج.
طلعت تليفونها واتصلت اباوع على شاشة تليفونها. جاري الاتصال بأوبي..
شمه: ههههههه لايا خبلة حتى بالتليفون مسميته اوبي هههههه مسحيه مااقبل. ولتدكين عليه.
مجاوبتني لان رد عليها كلتله: مرحبا. بتك مدري مرتك خلصتها بجي علينه تره هاي مو حالة شوفلك حل.
ماادري شنو جاوبها بس انطتني التليفون كتله: الو
ايوب: الو ها شمه. ليش تبجين؟
شمه: جذب انت تصدك بلمياء
ايوب: اوك ماشي. اني وراكم بالسيارة.
شمه: صدك والله
ايوب: اي والله. هاي شفتي راح اندل بيتكم والرقم اخذه من لمياء مو كتلج مو صعبة.
شمه: راح اشتاقلك
ايوب: راااح تشتاقيلي؟ اني اشتاقيتلج قبل متصعدين بالسيارة. شفتي شكد احبج.
لمياء: شنو مصدكتوا؟ ادري هسه الاسلام يكول الكلمة الطيبه صدقة يعني بس وحدة مو هلكد. يعني ناس تشبع حجي حلو وناس حسرة عليها الكلمة. وين العداله؟
ضحكت كال: شبيج؟
شمه: يالله تره لمياء راح تنتحر ههههه.
ايوب: اوك يالله ديري بالج على نفسج
شمه: وانت هم.
سديته وكل شوية اتذكر حجينه وابتسم ولمياء كاعدتلي بالمرصاد: شتذكرتي عليج الله احجي؟
شمه: مااكول. عيب هاي اسرار
لمياء: باع هاي ام اسرار تره كل اسراركم عندي هسه انشركم بالجرايد.
شمه: لمياء؟
لمياء: شكو؟
شمه: ليش اني احبج؟
لمياء: لان اني ام المهامات الصعبة ولان ماانتظر منكم تعليمات اتصرف بناءا على الحاسة السادسة عندي وخبرتي بالحياة واحساسي المرهف.
طول الطريق لمياء تحشش ونضحك وامها ملتهيه بالسوالف ويه السايق عن وضع البلد وبغداد والمحافظات.
وصلنه لبيتنه نزلت وسلمت عليهم مقبلوا يدخلون كالوا باجر ورانه طريق سفر.
راحوا واني بقيت واكفة منتظرته يعبر علي وراهم.
بس وصل اشرلي افوت للبيت.
دخلت للبيت واشرلي مع السلامه وراح.
ثاني يوم رجعوا لبغداد.
كل شوية جنت اتصل على لمياء اطمئن عليهم لحد موصلوا لبغداد.
جنت احس الايام بطيئة اليوم الواحد شطولة يصير اريده بس يخلص ماكو.
احسب الايام لجيته.
كل ميندك الباب اكول هو.
فات اسبوع واثنين وماكو شي.
كلما تتصل لمياء يتخيلي مخابرة حتى تكول باجر يجي.
ذاك اليوم جنت اسوي عشا واندك الباب واني اغسل ايدية.
وامي جانت تصلي خبصتني: الله اكبر، الله اكبر..
شمه: صبر شويه ماما جنت اغسل ايدية.
لبست حجابي وطلعت صحت منو؟
محد جاوب فتحته الباب على كيف شفت دكتور حسام.
سلم بعدين كلي: ليش تفتحين الباب بسرعة؟
شمه: لان مسمعت جوابك اتصورتك مسمعتني من كلت منو
حسام: مره ثانيه لاتفتحينه بدون متسمعين الجواب، الدنيا ليل وانتم بحدكم.
شمه: صحيح، اتفضل. اتفضل امي دتصلي.
حسام: ردت احجي وياج بموضوع مادام الوالدة تصلي، ولو هي عدها خبر لان اني حجيت وياها قبل فترة، ماادري اذا حجتلج او لا؟
شمه: موضوع شنو؟ محجتلي اي موضوع.
حسام: شعجب؟
شمه: ماادري، خير صاير شي؟
في صراعنا مع الحياة قد نفقد الكثير.
قد نفقد برائتنا. وقد نفقد نقاء نفوسنا..
وقد نفقد كل شيء حتى انفسنا..
الا شيء واحد..
مشاعر الحب الصادق..
ربما لانها تأتي رُغماً عنا.
وترغمنا على عيشها بحلوها ومرها..
والحمد لله اننا لانستطيع منعها. والا لكنا حكمنا على انفسنا بالموت المحتم..