رواية صراع الجبابرة للكاتبة روز الفياض الفصل الأربعون

رواية صراع الجبابرة للكاتبة روز الفياض الفصل الأربعون

كلما احسسنا بالسعادة لحظة بددتها قوة الصدمات.
اما آن الاوان لنستريح؟
يقولون ان المؤمن مبتلى فأي ابتلاءٍ لاينتهي هو ذاك؟
لايمكن لكلمة واحدة ان تصف لك مدى حبي.
اعتى كلامات الحب لاتكاد تصف حتى نصف مااشعر به تجاهك.
انت مني بمنزلة قلبي من الجسد.
بالليل رغم الالم العاصر كلبي حاولت اتناسى شويه لخاطره.
بالنهاية إلى صار صار واني مااكدر اتخيل حياتي بدونه مهما كان وضعه.
احبه.

فكانت ليلة امتزج فيها الحب مع دموع ذلك الشعور الذي يكسر كل شي جميل في داخلي.
امتزج فيها حبي لك مع خوفي الكبيرمن فقدانك.
ايعقل ان اصحوا يومياً ولااجدك؟
تباً لذلك الشيطان الذي يزرع تلك الصور في مخيتلي، حاشاه ربي ان يفرق بين قلبين في حبه اجتمعا.
بقيت للصبح اباوعله وهو نايم.
مااكدر انام من خوفي عليه. كل شويه تغفى عيني وافز وكل ميتحرك ويفتح عيونه يلكاني كاعده ويكولي: ليش كاعده؟
نامي.

ويحضني حتى انام بس ماانام.
كلبي محترك مو بيدي..
معقولة ايوب؟ معقولة كل هذا يصير بينه؟
معقولة بس هالليلة تبقى بينه؟
دموعي احسها وشلت..
مانمت الا وجه الصبح.
الساعة بثمانية حسيت بي من كعد، كعدت كال: صباح الخير
شمه: صباح النور.
ايوب: ممكن تجهزيلي غيارات اخذهم وياي فد اثنين كلش كافي.
شمه: ان شاءالله.
جهزت ملابسه وكعدت عالجرباية اشجع نفسي حتى لاابجي ولاابين شي كدام خالتي.

سحبني من ايدي كومني وحضني كلي: هذا اول صبح ينحسب بعمري.
شمه: ليش؟
ايوب: لان كعدت وشفت جهج بحضني من الصبح.
شمه: وان شاءالله مو اخر صبح، راح تمل من هالوجه بعدين.
ايوب: معقولة؟
شمه: صدكني. ياخوفي بس تصير زين تكول حبيت وحده ثانيه.
ايوب: هي وحده الحبيتها وابتليت هههه.
يالله خل ننزل نتريك ونمهد الموضوع لامي.
نزلنه لكينه خالتي متمدده بالصالة شافتنه كعدت كالت: صباح الخير.
شعدكم كاعدين من الصبح؟

ايوب: مؤيد راح يمر علي حتى نروح للمستشفى.
عندي فحص.
ام ايوب: فحصيش موتكول النتيجة طلعت زينه وراح الخبيث؟
ايوب: اي بس لازم اتابع وياهم واحتمال ينطوني بعد جرعة مخففه حتى ميرجع المرض.
سكتت خالتي واني كاعده ساكته مالي خلك.
رحت وياها للمطبخ جهزنه الريوك كالت: ترحين وياه؟
هزيت راسي لا كالت: شعجب؟
شمه: شتعرفيه. يقبل؟
ام ايوب: اي والله ميقبل.
ميقبل.
بعدنه كاعدين نحجي اندك الباب طلع ايوب فتحه اجت امل.

اول مدخلت سلمت وكالت: شنو هاي صدك اكو بعد جرعة وقائية مدري شنو؟
خابرني كلي تعاي ابقي يم امي وشمه عندي بعد جرعة مصدكت.
بقيت ساكته وبقت هي وخالتي يحجون.
اجه مؤيد كمت لبست حجابي.
كعدت بالمطبخ يم امل وخالتي وهو راح بالصالة يم ايوب.
من رادوا يطلعون اجه للمطبخ شافني كاعدة سلم عادي بس من راد يطلع كلتله خالتي: دير بالك عليه مؤيد عمه.
دار باوعلي كال: هذا كله من العجلة..
عبالك الزواج طاير هاي نتيجة الضغط.

عرفته يقصدني بس سكتت لان مو وقت عتب وحجي ويمكن هو محترك كلبه على اخته بس اني مضغطت على ايوب ولاادري بي عنده بعد علاج.
امل ردت عليه كلتله: اخوك مو من النوع الينضغط عليه ولايسمع كلام احد يسوي إلى براسه وبس..
دارت علي كلتلي: جنتي تدرين عنده بعد جرعة.
شمه: لا حالي حالكم البارحة بالصدفة لكيت عنده باكيت جكاير وصار الحجي وكلي.
مؤيد: اكو واحد يتزوج وهو ثاني يوم عنده هيج علاج؟

شمه: والله العظيم ماادري وروح ابوي ماادري ومضغطت عليه عالزواج وامل تعرف اصلاً اني جنت معترضه عالسرعة إلى تمت بيها الامور ولوما البارحة اتعاركنه وزعلت جان مقبل يروح اليوم ياخذ الجرعة هاي خالتي تدري البارحة اكو مشكلة بينه.
سكت.
هو هم بعد معلق بس سلم وراح للسيارة.
نزل ايوب سلم علينه كال: ديروا بالكم على نفسكم واني اتصلت بايهاب ونور يجون يباتون وياكم اليوم.
دار علي كلي: شمه انتي روحي يم خالتي باتي.

باجر ان شاءالله نرجع.
سلم وطلع.
طلعت امل وراهم جبت طاست مي ورجعت.
ام ايوب: ليش كلبي يكول ابني مطايب بعده؟
بقيت ساكته كالت: يعني البارحة انتي جنتي زعلانه لان ميقبل يروح يكمل علاجه؟
ليش ميريد يكمله شنو شاف نفسه صار زين واتعافه؟
غير يكمل حتى يروح منه المرض ونرتاح.
راح يموتني ايوب.
كمت صعدت لغرفتنه ارتبها ومااريد احجي لان ضجت من تلميحات مؤيد.
اندك الباب امل: يصير افوت؟
شمه: هلو اي طبعاً.

امل: فهميني بالله شنو القصة؟
شمه: قصة شنو؟
امل: قصتكم انتي وايوب؟
المرض بعده؟ مو صح؟
دمعت عيوني كتلها: عفيه امل مااريد احجي بهالموضوع هذا كلبي خلصان.
امل: الله يساعدنه ويساعدج..
والله يساعده هو هم.
شمه: بس اني ماجنت اعرف بعده. البارحة يالله عرفت.

امل: ادري واذا علمود مؤيد لتهتمين طبيعي يتصور انتي ضاغطة عليه لان كل شي صار باسبوع او اقل ولتنسين زوجه ايوب الاولى وام ابنه تصير اخت مؤيد طبيعي ينظرلج نظره المسبب حتى لو يعرف الحقيقة كلش زين.
يالله المهم انجمعتوا واتزوجتوا هسه العليج انتي بس راحته هو لحد ميطيب ويرتاح وبعدين عذبيه براحتج ههههه.
حسيت البيت صار ضوجه رغم امل موجودة ومن النوع المتسكت بس تضحك وتتشاقه وتسولف.
بس مكانه فارغ.

بعد الغدا راسلني: حياتي؟
شمه: هلو حبيبي شلونك؟
ايوب: شتسوون؟
شمه: خالتي راحت تمدد بغرفتها وامل تسوي جاي واني كاعده واحاطة ايدي على خدي.
ايوب: هههه ليش حاطه ايدج على خدج تحبين؟
شمه: اي احب عندك اعتراض؟
ايوب: لا مادام تحبين واحد يبدأ اسمه بحرف الالف وينتهي بالباء وبالوسط حرف الياء و واو معناها ماعندي مانع هههه.
شمه: شعجب تستخدم التليفون؟
شنو بعدك مااخذت الجرعة؟

ايوب: بعدني. قبل كل جرعة لازم يسوون فحوصات بعدين يالله. اذا طلعت نتيجة الفحوصات العصر معناها بالليل ينطوني الجرعة.
شمه: بالسلامة ان شاءالله.
ايوب: الله يسلمج..
قبل من جنت اجي لهنا مااقبل ارجع بنفس اليوم علمود لحد يشوفني باسوء حالاتي بس هالمره احس نفسي كاعد على نار اريد اخذها وارجع.
شمه: ترجع بالسلامة حبيبي اذا تريد تاخذها وترجع ارجع لتبقى اهم شي انت ترتاح تعال واني هنا يمك واخدمك شتحتاج اني يمك.

ايوب: متكدرين..
صعبه عليج الرجال من يوكع لازم وياه رجال يالله يكدرله.
شمه: واني بمية رجال مو عبالك.
ايوب: ههههه انتي وين بيج حيل.
لا متكدرين اتعبين هنا احسن.
شمه: لا ايوب والله مااكدر تبقى هناك واني هنا مااتحمل اذا يصير تاخذها وترجع البيت تعال فدوه.
ايوب: الله كريم. نشوف.
شمه: مؤيد وياك مو؟
ايوب: اي وياي خطيه تعب.
شمه: ميخالف خل يتعب ابن عمك وحقك عليه يتعب وياك.
ايوب: ههههه شنو ابتلى بلوه..

شبيكم اليوم انتي وياه؟
شمه: مابينه..
ايوب: سمعتكم تحجون انتي وياه واني نازل؟
شمه: ماكو شي.
بس الظاهر هو يتصور اني جنت اعرف بعد عندك علاج وضغطت عليك علمود نتزوج.
كتله مااعرف وسكت.
ايوب: لاهو يعرف انتي متعرفين بس يجوز ضاج من شافج بالبيت بمكان اخته.
مهما كان تبقى اخته.
شمه: واني المتهمه المجرمة خرابت البيوت العامره هههه.
ايوب: وينها هي البيوت العامره؟
هو اصلاً مجان اكو بيت..

بس يالله المهم خلصنه واتزوجنه بعد شيفكرون مو مهم.
يالله حياتي خل انام شوية خاف بعد شوية تطلع التحاليل وينطوني العلاج.
شمه: اوك يالله حبيبي دير بالك على نفسك ولتشلع كلبي ايوب ومتاخذ الجرعة.
ايوب: اصورلج المستشفى حتى تصدكين هههه.
يالله مع السلامة.
شمه: امانة الله حبيبي.
للعصر ماكو اخبار كلت لامل: اتصلي على مؤيد وسأليه.
شوفي بالله انطوه الجرعة لو لا.
اتصلت امل كالت: اشو مؤيد يكول جايين بالطريق؟

شمه: معقولة اخذها ورجع للبيت؟
امل: ماادري. ننتظر ونشوف.
وره اقل من ساعة اجوا.
مؤيد بس شرب مي وراح ايوب محجه شي الا من صعدنه فوك.
ايوب: مااخذتها كالوا هالمره الجرعة قوية احتمال جسمي ميتحملها.
شمه: اسم الله.
والحل شنو؟
ايوب: والله ماادري. هي هاي الجرعة ممقسوم اخذها.
شمه: لتكول هالحجي تاخذها يعني تاخذها مو بكيفك ولا باختيارك.

ايوب: ادري مو جسمي ميتحملها بعدين اموت وانتي تصيرين مجرمة بجريمة القتل غير العمد ههههه.
شمه: شحدك تموت..
اذا يصيرلك شي معناها انت تدمرني.
فدوه لتكول هيج تروح وتاخذ الجرعة ونخلص وربك ميعوفك ولايكسر خاطري.
ايوب: وين اروح؟
شمه: روح لبنان روح لتركيا روح للهند لاي مكان بس لتضيع الوقت عفيه.
حضني كلي: لخاطر هالعيون الحلوة.
اروح لاخر الدنيا. مو اجيت وراج للبصرة ههههه.

شمه: اي. والله ايام الله ليعيدها والله يذكر لمياء بالخير سوت إلى محد يسويه.
مااعرف شلون اجازيها.
ايوب: واني؟
شمه: انت شبيك؟
ايوب: بيش تجازيني؟
شمه: ههههه هم بعد تطلب جزاء وانت صارلك يومين شالع كلبي؟
ايوب: لج هو هذا الحب من اشلع كلبج معناها احبج.
كلي بضحك كتله: ههههه شوف اللواته مو كافي اهلك عبالهم اني مرضتك.
ايوب: هههههههه اي واحد يسألني اكول انتي السبب منا وهيج..

شمه: هسه تريد ترتاح بالاول لو اصبلك تتغدا؟
ايوب: لا هاي ولا ذيج..
اريدج انتي ??
وره يومين راسلوا مستشفى بتركيا وحجزوا هو وايهاب يرحون سوا
ودعناهم وراحوا.
ثاني يوم مر علينه عم ايوب ابو مؤيد سلم علي وكعد يسألني شنو الاخبار لحدما اجت خالتي جانت بالحمام.
رحت سويتلهم جاي وقدمته وبقوا يسولفون اني طلعت من يمهم بس واني طالعة سمعته سأل خالتي: هاي البنية مرت ايوب؟
ام ايوب: اي هاي مرته.

ابو مؤيد: وليش ضغط على نفسه واستعجل عالزواج اذا علاجه بعد ممخلص؟
ام ايوب: ميدري وراه بعد علاج.
بقيت كاعده بالمطبخ محبيت ارجع يمهم لان الظاهر كلهم عدهم نفس التصور اني إلى ضغطت عليه حتى نتزوج بهالوضع وراح اكون طول الوقت تحت المجهر.
بالليل اتصل ايوب كال: راح يخففون الجرعة.
شمه: وتأثيرها؟
اكيد راح يخف مو؟
ايوب: هو راح يخف اكيد بس بعد شنسوي راح يسووها جرعتين مخففه بدل ماجرعة قوية ونشوف النتيجة بعد الفحص.

شمه: الله كريم.
ايوب: بس اني وصيت مؤيد يحجزلج انتي وامي حتى تجون. اريد اشوفكم هالمره قبل مااخذها.
خاف جسمي ميتحمل.
شمه: يتحمل. يتحمل ان شاءالله لتفكر هيجي اتوكل على الله ولتفكر بشي مو زين.
ايوب: جهزوا نفسكم حتى تجون.
شمه: شوكت هي الجرعة؟
ايوب: بعدهم ممحددين من تخلص الفحوصات يحددون شكد الجرعة وشوكت.
تلحكون تجون قبلها.

طاحت دموعي بس مبينتله كتله: من نرجع بسلامة وترتاح ونطمئن عليك انوب اريد نروح سفرة نغير جو شوية.
ايوب: ان شاءالله وين تردين اخذج؟
شمه: اي مكان مادام اني وياك.
نروح لاربيل نعوض السفرة الخططتلها ومصارت ههههههه.
ايوب: هههههههه اي هواي خطط خططتلها ويه لمياء بس فشلت ههههه.
شمه: كلها تنفذها من ترجع. زييين؟
ايوب: تدللين، كم شمه عندي اني.
وره يومين سافرناله اني وخالتي وبنفس اليوم جان موعد الجرعة.

رحنه كبل للمستشفى خالتي من شافته انهارت ظلت تبجي خطية رغم هو جان كاعد ويضحك ويسولف.
ايوب: اني ليش مااحجي ومااريد احد يجي وياي ويشوفني لان اعرف هاي النتيجة.
كوه سكتنه خالتي وخليناها تهدأ حتى هو لايتوتر.
بقينه يمه ساعة وطلعنه مقبل نبقى اكثر.
بالليل اتصل ايهاب على خالتي كللها انطوه الجرعة.
فرشت خالتي سجادتها وكعدت تسبح وتبجي وتدعي.
على ماخلصت خلص كلبي وياها من البجي.

لان ايهاب كل الدكتور كايللهم رغم انه الجرعة مخففه لكن يبقى بمرحلة الخطر لمدة تلث تيام.
تلث تيام منعونه نقترب منه جنه يوميه نروح نشوفه من وره الجام بس.
تلث تيام هو ميدري بالدنيا شبه غيبوبة.
يكعد يتقيأ ويرجع مثلما كان عبالك ميت.
جنت اظل صافنة عليه نص ساعة ومرات ساعة يتخيلي ميت ابقى اراقبه لحدما اشوف منه حركة او اكدر اميز حركة صدره من يتنفس او يتقيأ حتى اتأكد بعده عايش..

امي خطية وآدم بقوا بحدهم وبيتنه قفلناه بقى فارغ.
بعد التلث تيام وعى وبدا يحجي وسمحولنه ندخل يمه للغرفة.
ايوب: تعبتوا؟
ام ايوب: شتعبنه انت تعبت يمه انت تعبت سوده علي.
ايوب: مابيه شي. لتخافين.
كاعده واباوعله مثل الطفل الزغير يم امه سبحان الله.
بعدين مد ايده إلى وكلي: شلونج؟
هزيت راسي كتله: الحمدلله زينه مادام انت زين.
ايوب: اني زين. لتخافون. الجرعة مخففه.

بقينه شهر كامل بتركيا منتظرين الفحص والنتيجة والجرعة الثانية.
خلص كلبي جنت اتصل على امي تكلي آدم يفتر بالبيت ويدور عليج ومرات يبجي يريدج.
ينمرد كلبي من اسمع هالحجي وابقى ابجي.
ومنا القلق من النتائج مال ايوب ماكل كلبي..
من طلعناه للشقة بعد الجرعة الاولى ايهاب رجع للعراق وبقينه بس اني وخالتي وياه.
وضع صعب خالتي مره جبيرة متعرف تروح وتجي ولاتعرف تتصرف وخوافة بشكل.
وهو تعبان وخلكه ضيك وعصبي.

جنت انزل جوه اتسوك الشغلات إلى هو ياكلها وكوه افهم الحجي وافهمهم شنو اريد.
وجنت اطبخ كله وجبتين بكل وجبه وحده اله ووحده إلى ولخالتي.
خالتي جانت تكعد عالسجادة بالساعات تبجي وتدعي خاف اني ناقصني قهر..
هو جان اذا نايم ابقى كاعده يمه خاف يكعد ويحتاج شي او مرات على نومته اكوم انظف واغسل ملابس واكوي ومن يكعد اكابله واكعد مثل الطفل اكعد اسولف وياه واتحمل عصبيته إلى مرات ميكون الها سبب.

اتحمل مزاجيته إلى هو مرات يشتكي منها وينتقدها.
ماالحك انام بالنهار والليل كله ابقى اراقبه خاف يصخن خاف يتقيأ خاف يبرد خاف يحتر..
متغفه عيني الا وجه الصبح من يسيطر علي التعب والنعاس.
مر الشهر واجه موعد الجرعة الثانية ورجع ايهاب تحسباً لاي طارىء ممكن يصير لاسمح الله.
ونفس التعب والمعاناة تلث تيام يالله وعى.
وبعدها هم رجعنه للتعب بالبيت.

اول ايام اخلصها اغسل ملابس واغسل الجراجف كل شوية وجبه على كدميتقيأ واسوي كمادات من احسه حار وقوه ماعنده حتى يسبح لو يغسل بالفراش جنت ابلل اسفنجه وامسح ايديه ورجليه وجسمه.
من يريد ينام جان يكول جسمي يوجعني جنت اسويله مساج حتى لاصابعه زيت زيتون دافي وامرخ ايده ورجليه.
كل هذا وجان من يفقد اعصابه عبالك مو اني وعبالك مو هو.

مره من المرات جنت داشربه مي ووكع شوية عليه وتبللت ملابسه رأساً اخذ كلاص المي من ايدي وضربه بالكاع..
ظليت متفاجأة كتله: على كيفك.
اتحركت اشيل الكزاز محسيت الا ضربني بظهري بريموت التلفزيون.
مو ضربة حسيتها طلقه زرفت ظهري.
صدك بهذا اليوم شبعت بجي بعدما نام..
خالتي حست اكو شي ولحت علي كتلها: ماكو شي بس ابجي على ابني راح يصير شهرين مشايفته.

ام ايوب: هانت هانت ان شاءالله. الله يبرد كلبج على زوجج وعلى ابنج ان شاءالله.
ثاني يوم من كعد جانت نفسيته احسن وعبالك جان مو بوعيه ميتذكر اي شي من إلى صار.
ايوب: شبيج؟
شمه: مابيه.
ايوب: مو على بعضج؟ اكو شي؟ اتصلتي بأمج؟
شمه: ماكو شي..
ايوب: لا والله شبيج؟ ليش احسج ضايجة ومالج خلك؟
شمه: مابيه شي تعبانه.
ايوب: من هالناحية اكيد، تعبتي. تعبتج.

بقيت ساكته رغم اعرف هو يصير عصبي لان مريض بس مرات شغلات زغيرة تكسر خاطرك حتى لو ممقصوده.
بعدها بكم يوم طلعت نتيجة الفحص مالته.
اتصلوا بي جنت اني بالمطبخ ويمي خالتي وصاح علي: شمه. شمممه.
شمه: جايه.
جايه دقيقة.
ام ايوب: روحيله شوفي شيريد.
غسلت ايدي ورحت لكيته واكف يم الشباك وبيده التليفون كتله: هاا؟
شمر التليفون عالجرباية واجه حضني وشالني.
ضليت اصيح: ياا ياا ايوب ايوب نزلني مو زين عليك وهو يضحك.

اتعجبت منين اجته هالقوة وهو قبل ايام مابي حيل يمشي اذا مااني اتجيله واسنده..
سبحان الله حلاة الروح.
نزلني كتله: ههههه شبيك؟
ايوب: كلي باجر نرجع لاهلنه.
شمه: شكو؟
ايوب: خلص هالمره التقرير نظيف. نتيجة الفحص نظيفة.
شمه: كول والله؟
ايوب: والله هسه اتصلوا بيه من المستشفى كالوا طلعت النتيجة والفحص نظيف.
شمه: احلف؟
ايوب: والله العظيم وعيونج.
ظليت اطفر ورحت لخالتي اركض ابشرها ولمت العمارة علينه بالهلاهل.

احلى يوم بحياتي كل التعب راح وانسه من شفته طيب.
وفعلا بعدها رجعنه للعراق.
امي خطية من شافتني ظلت تبجي وآدم من دخلت ظل صافن علي معرفني بعدين اجه يركض شبكني.
ماادري شبوس وشخلي بي جنت احس نص من كلبي عايفته ورايحة.
بيومها التموا خوات ايوب وخلص اليوم استقبالات وهلاهل.
جنت تعبانه تعب بس الله يعلم بي وهسه زاد.
من اول يوم لوصولنه بدت وفود الخطار والزائرين.
ادم جان مجلب بيه ميقبل يعوفني.
اشتغل وهو وياي.

كل خواته وازواجهم اجوا الا مؤيد ونوارس.
بالليل صارت الساعة بالتسعة تقريباً صبينه العشا واندك الباب.
دخل مؤيد ووياه نوارس.
طول الفتره الفاتت جان ايوب ميحجي وياها ولاحتى خواتها.
من دخلت كلها سكتت.
جنت كاعده يم خالتي راحت هي سلمت على ايوب وظلت تبجي كسرت خاطري.
كللها هو: لتبجين.
كعدت يمه تسولف وياه بعدين اجت سلمت علي سلام عادي.
كعدوا اتعشوا ويانه وبعد العشا كلها كاعده ويسولفون.
حسيت نفسي تعبت ونعست.

كلت لخالتي: خاله اني راح اصعد شوية اسبح وارتاح صرت كلي وصخ.
ضحكت كالت: كل احنه نحتاج سباحه على ركضت اليوم.
روحي يمه روحي.
بعدني عالدرج حسيت شي نزل على رجلي باوعت. دم!
اتذكرت الشهرية من اتزوجت بعد مااجتني.
معقولة جان عندي حمل ومحسيت بي!
وهسه نزل!
ماادري ليش انقهرت.
يمكن لان هيج خبر جان ممكن يزيدنه فرح خصوصاً ايوب..
دخلت سبحت وطلعت عالسريع.

اتمددت عالجرباية رجليه توجعني من الحركة بالبيت طول اليوم حتى ملحكنه نرتاح من الطيارة للبيت للخطار.
وره شوية الاغلبيه راحوا بقت عدنه سهاد حتى تساعدني بالبيت علمود جيت الخطار والناس.
نزلت لكيت خالتي نايمه وسهاد هم كالت راح تنام بس ايوب كاعد يشوف الاخبار.
شمه: هاا تريد تسهر اليوم؟
ايوب: لا والله نعسان وتعبان بس جنت منتظرج عبالي بالمطبخ.
شمه: لا فوك.
صعدنه لغرفتنه كلي: مبين على وجهج التعب.

شمه: صارت شغلة قبل شوية.
ايوب: شنو؟
شمه: الشهرية من اتزوجنه بعد مااجت بس قبل شوية نزلت.
ايوب: ويعني؟
قصدج جنتي حامل؟
شمه: ماادري.
حضني كلي: اني من بديت اخذ الكيمياوي الدكتور كلي احتمال العلاج يأثر على مسألة الانجاب.
فاذا جنتي حامل وراح ميخالف لتضوجين لان المفروض منسوي طفل هسه..
اخاف يطلع عنده تشوهات لو شي بسبب علاجي، دتفتهميني؟
هزيت راسي اي.
ايوب: اني مادام انتي عندي مااريد بعد حتى اطفال مااريد.
انتي كافي.

باوعتله كتله: بس اني اريد.
ضحك كال: ههههه صار على امرج. ان شاءالله بالمستقبل.
يالله نامي وارتاحي تعبتي كل هالفتره وياي واليوم التعب تعبين صار.
باجر هم اكيد يجون بيت عمي وبيت خالتي والجيران..
وراج تعبت خير من الله ههههه.
شمه: مادام طبت التعب مو مهم الحمدلله ربي مضيع تعبنه وصبرنه..
بس هسه بعد مالك عذر تصيح وتصير عصبي كافي تره دلعناك هوايه..

باس خدي كلي: مااكدر اصير عصبي عليج بس شسوي غير جنت رجال مريض قابل متعمد اصيح عليج. والله حتى مااتذكر شوكت صيحت.
شمه: والله متتذكر؟ كل هالعصبية والمزاج البرتقالي ومتتذكر؟
من ضربتني بالريموت هم كول متتذكر.
ظل صافن بوجهي كلي: مستحيل..
ماكو هيجي بدماغي كله..
مستحيل هههه لا ماكو هيجي شي دتتشاقين.
شمه: ههههه والله مااتشاقه..
اشمعنه هالسوالف متتذكرها؟
ايوب: هههه والله صدك مااتذكر..
شوكت ضربتج؟
شلون ضربتج؟

شمه: هسه بعد صارت قديمة.
ايوب: انتي صرتي بالنسبة إلى جزء من روحي.
من اءذيج يعني اءذي روحي اكو واحد يأذي روحه..
انتي سويتي وياي اللي مسوته بت عمي وام ابني.
كلما افكر شكد تعبتي وياي احسد نفسي. والله احسد نفسي.
---
---
حبيبي.
انت هو ذلك القلب الذي ينبض بين اضلعي. ??.