رواية صبرا يا قلبي الجزء الثاني للكاتبة روز الفياض الفصل الرابع عشر

رواية صبرا يا قلبي الجزء الثاني للكاتبة روز الفياض الفصل الرابع عشر

البيت كله ناس.
عمام ماجد واهله وكرايبه.
اكو ناس مااعرفهم واكو ناس مجرد شايفتهم من اتزوجت اجو باركولي.
منين هاي الناس؟ المن ملتمين؟
كلها تريد تاكل وتشرب وتنخدم واني روحي طالعة.
كل شوية اخذ اولادي وانهزم فوك حتى ارتاح من اسألتهم ومن نظراتهم.
كل شوية اشوف عيون النسوان تفتر وراي واسمع كلمات من اعبر بيناتهن. هاي مرته المريضة.
بس ذولي الجهال عدها وبعد متخلف.
من اخذها لليوم مريضة.
عشكها واخذها وعاف بت عمه.

خالته وبناتها مكابلات امه وكاعدات.
يتصرفن كأنما البيت بيهن كل شوية اشوف وحده منهن بغرفة شكل.
خفت. شيسون يدخلن للغرف؟
بس لا يخلن شي إلى لو لماجد؟ لو حتى لعمة حميدة؟
احس صار تلوث بدماغي.
البيت مثل خلية النحل والبنات ميلحكن عالتنظيف والطلبات والماعين.

عمة حميدة مستلمة المطبخ وكلما اريد اساعدها تكلي: لا يمه روحي لجهالج لايوكعون لو يتعورون محد يمهم محد فارغ يهتم بيهم كعدي يمهم واني والبنات هنا نسوي النكدر عليه.
مر اسبوع واني مضايكة النوم شلونه.
انام نص ساعة مرات ساعة بالنهار من ينامون الجهال. تغفى عيني غصباً عني من التعب.
امي كل شوية تتصل تكلي: تعاي عدنه ياماما عالاقل اساعدج بالجهال.
ذهب: لا ماما مااكدر. مالي خلك.

امي: وتبقين مشلوع كلبج بهالهوسه البيت يغص بالعالم وانت محبوسة فوك عليمن؟ تعاي هنا ارتاحي يومين ورجعي.
ذهب: مالي خلك ماما وبس اطلع هسه يكولون شافت رجلها مو هنا وراحت لاهلها تتونس.
امي: يطبهم حمس خيكولون. شنو كفيلين لو وكيلين عليج همه؟ ابوج بره يم الرياجيل اذا تجين اتصلي عليه حتى يجيبج وياه.
ذهب: الله كريم.

امي: لا اكدر اجي يمج مااريد اشوف هاي خالته هي وبناتها البرعات لان اطيح حظهن. ولا اكدر ابقى هنا واخليج هناك وادري بيج ممرتاحة.
ذهب: ماكو شي ماما لاتفكرين يمي عمه حميدة والبنات. ومااكدر اجي واعوف عمه حميدة وحدها هي هم مثلي مترتاح بهيج اجواء كلها نفاق وتمثيل. عالاقل اني وياها نكعد سوه.
امي: واني ابقى هنا اطحن بروحي عليج؟

ذهب: ماما الله يخليج لاتطحين بروحج ولاتفكرين ادري قابل اعوف بيتي الهن واجي؟ هن هيج وماخذات راحتهن لو اعوفه واطلع شيسون؟
اسبوع كامل مر ماكو كل خبر عن ماجد.
رايحين للمركز وراجعين من المركز ورايحيين للمستشفى للسايق وراجعين من المستشفى.
السايق مضروب على راسه وره يومين بالمستشفى دخل بغيبوبة.

ومكدرنه نعرف منه شي اكثر من اللي كاله اول موصل للمستشفى وهو: قبل منعبر الجسر طبكت علينه سيارة وبيها مسلحين واحد منهم ضربني بالمسدس على راسي والثاني اخذ السويج مني وشمره واثنين نزلوا الولد السيد وضربوه بعدين صعدوه بالسيارة وراحوا.
الناس بالشارع جابتني للمستشفى وبقت السيارة بالشارع.
عمام ماجد من سالوهم: اكو احد مشتبهين بي؟
تتهمون احد؟
كالوا ماكو غير هذا الموظف اللي ضرب ماجد قبل كم شهر.

القوا القبض عليه وحققوا وياه لكن نكر معرفته باي شي اله علاقة باللي صار لماجد.
بقى محجوز بالتوقيف لان هو المشتبه بي الوحيد لكن مااعترف وبقى مصر على كلامه.
تخابرني نجلاء تبجي: ماكو حجز على عيني والله باقية هنا ومخليتكم بحدكم بس شسوي ماكو حجز.
ذهب: شتسوين تجين. بيتج واولادج. احنه هنا كاعدين ومخلين ايدنه على خدنه. ماكو شي نكدر نسويه اكثر من اللي سويناه.

نجلاء: سودة علي ياخويه سوده علي. انوب يكول فراس مضروب ليش تضربوه ليش ياجلاب؟ شمسويلكم؟ ماكو غيره هذا الحقير اللي ذيج المره ضربه بالسجينة واشتكوا عليه. هو هذا الكلب ابن الكلب ماكو غيره خليهم يشبعونه دك بالسجن وهو يعترف.
الحيوان يريد ينتقم. فوكما حرامي وسامحه.
ذهب: فدوه نجلاء بلا بجي تره كلبي خلصان ميتحمل البيه مكفيني.

نجلاء: مو بيدي والله مو بيدي، مااكدر اسوي شي بالبيت لا اطبخ لاانظف حسبه تاخذني وحسبة تجيبني؟
ذهب: ان شاءالله ماكو شي. الله ميكسر كلبي. اني متاكدة الله ميخليني ينشلع كلبي بدونه. صح لو لا؟
نجلاء:؟
ذهب: بلا بجي. كلبي يكول يرجع. ميعوف جهاله.
نجلاء: كافي لج كافي كطعتي كلبي وتكولين لاتبجين؟
مو اسبوع عبالك سنة.
حتى وزني نزل. بالكوة جنت اكل تفاحة لو برتقاله لو موزة خلال النهار.
كطعت الاكل. مااكدر ابلع اللكمة.

ماادري شلون تتحمل اللي زوجها عسكري؟
شلون تكدر تنام وهو بالجبهة وبنص الخطر؟
شلون تكدر تاكل وتشرب وتنام؟
شلون تكدر تكمل حياتها عادي؟
زين اللي يموت زوجها شتسوي؟ شلون تتصرف؟ شلون تكدر تستمر؟
كلما يندك الباب نطلع كل احنه نركض على امل نسمع خبر حلو ويكولون لكوه.
كلما يدك تليفون كلها تفز على امل يكولون رجع.
اليوم قبط اسبوع ومخلينه مكان مدورنه بي.

الولد يمشون ويوزعون فلوس ورشاوي عالشرطة حتى يدورون عدل ويحققون صدك.
بالليل جنت انوم الجهال وغفت عيني.
اتحلمت كانما اني ابيت اهلي. واجتني امي تصرخ من بعيد تكول ماجد مات.
رأساً فزيت.
فزيت مخنوكة. خفت ارجع انام مرة ثاينة.
اتعوذت من الشيطان وغطيت الجهال ونزلت اشوف عمة حميدة خاف محتاجة شي.
لكيتها كاعده تبجي من شافتني مسحت دموعها.
بلعت ريكي حتى لاابجي كتلها: ماكو خبر شي؟
عمة حميدة: كل شي ماكو.

عمج يكول التحقيق مستمر وممخلين واحد مشبهه بي مجايبينه يحققون وياه. بس محد يعرف شي.
ذهب: لاحول ولاقوة الا بالله.
عمة حميدة: الجهال ناموا؟
ذهب: اي توهم ناموا.
عمة حميدة: دروحي اكليلج لكمة مااتعشيتي. ضميتلج حصتج بالفرن اكليلج لكمة يمه انت عندج جهال وعندج طفله تريدلها حيل وتعب.
ذهب: مااشتهي.
عمة حميدة: كل احنه منشتهي. بس مجبورين.
مجبورين حتى نكدر نتحرك.
دسمعي الكلام.
ذهب: انت اتعشيتي؟

عمة حميدة: والله اكلت شوية بس سدت نفسي هاي النسرة هي وبناتها.
ذهب: شبيهن؟
عمة حميدة: مابيهن. تكللها يمه باجر نروح للبيت تكللهن المن رايحات ابقن واسن خالتجن. كتلها خل يرحن كل وحده عدها رجال وبيت شعدهن هنا باقيات تكلهن روحن روحن يمه عمتج مستثكلتجن علمود اللكمة.
اتنهدت وبقيت ساكتة.
عمة حميدة: ربي شمسوي وليدي وهيجي يصير بي؟ لو مسلط العصابة على سليمه حبايبها.
ضحكت.

عمة حميدة: دروحي اتعشي قبل متكعد بتج وتظل تبجي. عمت عيني عليج يابيبي تباوع على صورته بالصالة مساع وتأشر. اشتاقت لابوها؟
اتنفست حيل واستغفرت ربي ورحت للمطبخ طلعت العشا وكعدت اكلب بالخبزة بيدي مااكدر اكل.
دمعت عيوني من اتذكرت اخر شي حجيه على شموسه قبل ميطلع للمطار.
بقيت كاعده لنص الليل كلها نامت بس اني افتر بالبيت اصعد وانزل اكول عسى ولعل يندك الباب ويجي حبيبي.

عمو ابو علي والولد جانوا يبقون كاعدين بره يم ابو جبار للساعة ثنتين (2 ) ومرات لتلاثه ( 3 ) بعدين ناس تروح وناس تبقى تبات عدنه بالديوانية مال الرياجيل.
للفجر جنت نازلة اكعد عمة حميدة للصلاة وسمعت عمو ابو علي وعلي ابنه يسولفون بالحديقة يم الحمام الخارجي واكفين: الضابط يكول مادام لهسه محد اتصل بيكم ولا دزولكم خبر فمعناها احتمال مو شغلة خطف.
ابو علي: شغلتيش؟
علي: يكول تهيأوا لاي خبر.

يمكن الشغلة شغلة انتقام وتصفية مو مسالة خطف وفلوس.
سكت شوية ابو علي بعدين كال: ادري انتقام منو وراها؟
الزلمة هذا ومسجون ويكول مو اني وره الموضوع ولا ادري بي.
اهله يحلفون يكولون مو هو.
بعد منو؟ اكو شي انت تعرفه اني مااعرفه؟
اكو احد متعارك وياه واني ماادري؟
صاير بينه وبين احد مشاكل بالشغل واني ماعندي خبر؟
علي: لا ماكو.
هو على كولتك بس هذا ويكول ماادري.
ابو علي: اذن لاتكول اتهيأوا.

اللي يكلك هيج كله معناها انتم تاخذون فلوس بس مجاي تشتغلون وتدورون بضمير. اذا يصيرله اي شي اشتكي عليكم انتم.
رجعت كم خطوه كعدت عالكرسي بالمطبخ يم الشباك باوعت للشمس راح تطلع دعيت بكلبي: ربي بقت يمك بعد اذا مالي خاطر. لخاطر اولاده بعدهم صغار مااكدر اربيهم بحدي. لخاطر بنته توها عرفته.
ربي لخاطر اخته ماعدها اخ غيره. ولخاطر امه بس هالولد عدها ربي.

رحت كعدت عمة حميدة صلينه وكعدن البنات بدينه نجهز الريوك لحدما كعدت العلوية واختها.
صبينه الريوك وابو علي صاح لعمة حميدة بره بالحديقة.
وره تقريباً نص ساعة اجت كعدت بصفي كلتلي بصوت ناصي: خابروا على عمج ابو علي.
درت عليها باوعتلها: منو؟
عمة حميدة: الجماعة الخاطفين ماجد.
فزيت كالت: انفضحنه. انفضحنه. عود كلولي لتحجين لاحد لحدما نتاكد.
هدأت وكعدت عدل كتلها بصوت ناصي: شكالوا؟ شوكت خابروا؟

عمة حميدة: قبل شوية داك رقم عبدالله واخابر لعمج.
ذهب: شيكولون؟ شيردون؟
عمة حميدة: عشر دفاتر.
ذهب: عايش؟
كتلها بصوت ناصي كوه حافظت على هدوئه لان العبره خنكتني.
هزت راسها اي وهي ساكتة.
عمة حميدة: راحوا هسه يجيبون الفلوس كلوللهم حدكم لباجر العصر.
سكتنه شوية بعدين كتلها: شلون ينطوهم الفلوس؟ وشلون نستلمه؟
عمة حميدة: واحد يجي ياخذهن. وراها همه يطلعون ماجد.

بالليل الكل اتجمع كلهم كعدوا بالديوانية واشتغلت الجايات.
صينية وره صينية.
يتفقون منو يروح يودي الفلوس.
لحدما اتفقوا انه عبدالله هو اللي يروح لان التواصل بينهم وبين الخاطف عن طريق عبدالله.
وحاولوا وياهم حتى يخفضون المبلغ الى ان وصلوا لخمس دفاتر.
جمعوا المبلغ وثاني يوم الظهر راحوا حتى يودون الفلوس.
صار الاتفاق انه عبدالله ياخذ الفلوس وياه بسيارته ويبقى كاعد بالسيارة وهمه يجون ياخذون الفلوس منه.

وهذا إلى صار.
طلبكت سيارة مضلله بدون ارقام نزلوا منها اثنين واحد راح لعبدالله فتح باب السيارة واخذ الفلوس والثاني واكف يراقب.
اخذوا الفلوس وراحوا.
بيومها الكل دخل انذار.
اني بقيت فوك مااكدر انزل. مااتحمل اسمع خبر ينهيني.
هم بقينه كاعدين لنص الليل وماكو شي.
كلها نامت، .
بقينه اني وعمة حميدة كاعدين.
هي لازمة سبحتها بيدها تسبح.
واني اروح وارجع.
اروح وارجع.
اروح وارجع.
نومت الجهال وبقيت برعب.

ابو علي والولد كلهم كاعدين بره بالباب يم ابو جبار.
صارت الساعة بالوحدة وماكوشي.
صارت بالثنتين وهم ماكو شي.
بتلاثه. ماكو شي.
عمة حميدة غفت بمكانها.
ندهتها: يمة كومي بفراشج نامي.
كمزت كالت: ماكو شي؟
ذهب: تؤ.
عمة حميدة: يارب عليك مو على غيرك يارب.
كامت تتمشى لغرفتها.
رحت وكفت بالمطبخ كبال الشباك اباوع عالباب اشوفهم كاعدين بره ينتظرون.

كمزتني عمة حميدة: لتبقين هنا وتنسين جهالج بحدهم فوك يمه يكعدون وميلكونج ويخافون.
ذهب: وكفتي كلبي.
عمة حميدة: هههههه.
بعدنه واكفين نحجي اني وياها وسمعنه هوسه بره.
التفتت شفت الولد ركضوا.
عمة حميدة: شكو؟ شصار؟
طلعت تركض للباب واني بقيت بمكاني.
مااكدر اطلع ولا ادري شكو.
اسمع صوت عمه حميدة تبجي: وليدي، ولييييددديييي.
نشف دمي.
كلت ذبوا جثته يم الباب.
مرت اكثر من ربع ساعة ومحد دخل.
دخلت عمه حميدة بس بقت يم الباب.

مديت راسي عليها من باب المطبخ وصرخت: يمممه..
التفتت علي وهي تبجي بعدين ضحكت كالت: اجه.
اجه وليدي.
اجه ماجد.
راسا سمعت صوت اطلاق نار.
الولد بدوا يضربون نار بره انكلبت الدنيا كل البيت كعد.
كلها اجت تسال شكو واكللهم ماجد اجه.
اشتغلت الهلال ويه اذان الفجر.
والجيران كلها طلعت على صوت الرمي.
بس مشفت ماجد لهسه.
وره نص ساعة بدوا يدخلون للبيت ومن بين الزلم والرياجيل الدخلوا شفته بوسطهم واكف.
اخيراً.

دخلوا الديوانية وبدينه نجهز الريوك للكل.
رحت فوك اشوف الاولاد لكيت شموسه كاعده وتبجي بحدها.
خليتها بحضني كتلها: ياروحي اجه بابا. اجه بابا.
اخذتها ونزلت جوه.
توني نزلت ودخل للهول.
هلاهل وجكليت وبجي.
حضن امه وعمة حميدة وظل يبجي وياهن.
بعدين التفتت شافني ابتسم شوية.
مبين عليه التعب لحيته وملابسه كلها وصخه واكو دم بايده وراسه.
مد ايده على شموسه اخذها حضنها ويبوس بخدودها.
اتدنه وكف بصفي وخله ايده وره ظهري.

حضني على كيف بعدين دنك باس راسي.
طول الوقت اللي جان بي مخطوف جنت متماسكة.
احاول ماابجي.
بس من باس راسي بجيت.
ضحكت عمة حميدة: اول مرة يصير شي ومتبجين ولامرة بجيتي هههه هسه شبيج؟
ضحك هو كال: معقولة مبجيتي؟ مااصدك.
زدت بالبجي ضحكوا.
دار علي حضني حيل اني وشموسه.
حضنته كتله: شلعت كلبي.
خالته: هو انوب شلع كلبج؟!
عمة حميدة: عتب حبايب. يمه الله لايخليكم من بعض ويخليكم لجهالكم.
ماجد: صدك شلعت كلبها.

العلوية: كل احنه انشلع كلبنه.
اتنهد هو وسكت.
عمة حميدة: توه نور البيت يمه ماجد.
رجع حضنها ورجعت تبجي كلتله: شلون يصير بيك شي. ميصير بيك شي ان شاءالله. منو يدفني غيرك؟
بجه هو واني هم بجيت.
باس اديها كللها: عمرج طويل ان شاءالله وتزوجين فضيل ورائد وشموسه وتشوفين اولاد واولادهم.
ذهب: آمين.
صعد سبح وحلق وبدل ملابسه وتمدد.
نومت شموسه وجهزت ملابسه ونزلت سويتله ريوك لان مااكل وياهم.

صعدت لكيته متمدد عالجرباية ومغمض عيونه.
خليت الصينية يمه كلي: ليش صعدتيها؟
ذهب: بيك حيل تنزل؟
ماجد: لا والله.
مابيه حيل.
رجليه من جوه كلش تأذيني.
مورمه.
مديت ايدي على رجله كلي: لا لاتلزميها. تاذيني.
سويلي مي دافي وملح؟
ذهب: ان شاءالله.
هسه اسويلك بس اكعد اتريك بالاول.
كعد ياكل واني اباوعله.
ذهب: هذا الجرح البيدك يأذيك؟
ماجد: يعني. هسه طاب شويه. جان ملتهب لان ضربوني بحديدة مزنجره.

ذهب: يضربهم الله ان شاءالله. الله لايوفقهم.
ماجد: رجليه اكثر شي تأذيني يومية يضربوني على رجليه مااكدر ادوس عليها بالكوه.
ذهب: راسك هم.
ماجد: لا راسي هاي اول مااخذوني. ضربني الكلب خلاني يومين ماادري ليل لو نهار راسي مااكدر اشيله.
ذهب: حسبي الله عليهم.
الله ينتقم منهم.
خلص اكل نزلت الصينية وجبت طشت خليت بي مي دافي وملح وخليت رجليه وكعدت ادلكها على كيف بس جان موجوع.
كل شوية يكول آآآخخ.
.

‏وهبني الله حُبك ولم أعد اشعُر بالذين حولي منذ أن احببتك؟