رواية صبرا يا قلبي الجزء الأول للكاتبة روز الفياض الفصل الرابع والعشرون
راح ماجد وراها اني كمت اتوضيت وصليت بعدين شلت السجاده واتمددت عالجربايه اسبح بالسبحه بس نعست مانايمه من البارحه غفيت.
حلمت امشي بطريق والدنيا ليل ومااندل وين رايحه ولا اكو احد بس اني وفجأه شفت العلويه ام ماجد واختها جايين عليه اني فرحت بس من وصلوا يمي انكلبوا وحده جلب ابيض ووحده جلب اسود ورفسوني ابطني.
فزيت مرعوبه رعب مو طبيعي جسمي كله ظل يرجف اريد انزل من الجربايه مااكدر انزل رجليه من كدما ارجف ردت اصيح على وحده من البنات نسيت حتى شلون احجي متت من الخوف.
ظليت بمكاني مخلوسه ردت اكوم اروح للحمام خفت وحسيت شي حار نزل ظليت مثل الصنم متحركت حتى ماوخرت اللحاف اشوف شكو ماردت اشوف شي.
بقيت على حالتي هاذي ماادري نص ساعه اقل اكثربس اقرا المعوذات واتعوذ من الشيطان لحدما سمعت صوت ماجد وعمه حميده عالدرج صاعدين دخلوا للغرفه بس شفتهم بجيت همه خافوا.
عمه حميده: اسم الله يمه اسم الله ليش تبجين؟
ماجد: شبيج شصار؟
اني عبالك لساني معكود جلبت بي اريده يكومني.
عمه حميده: شبيج يمه حبيبتي حلمانه؟ شبيج؟
هو سحبني اني راسا باوعت لمكاني لكيته فايض دم هي ظلت تصرخ ماجد سكت بس حضني ودار وجهي حتى مااباوع.
ماجد: احجي شصار؟
اني احاول اطلع الكلام بس مايطلع اخر شي
اخذوني للحمام سبحتني عمه حميده ولبستني طلعت اخذني ماجد لغرفته لان البنات جانوا ينظفون الجربايه.
عمه حميده: اسم الله عليج يوم شبيج شصارلج؟
غطيها وانطيني القران خل اقره عليها.
كعدت تقره على راسي قران وهو كاعد مدنك مايحجي بعدين نزل.
ذهب: جلاب.
عمه حميده: اسم الله عليج حبيبتي ياجلاب حلم لو منو شسوولج؟
حجيتلها الحلم ظلت ساكته اجه ماجد كعد يمي بعدين رادت تنزل صاحت لماجد وره شويه رجع يمي وهي نزلت.
اجه يمي ماجد عالجربايه باسني وظل يمسح بيده على راسي وعلى ظهري
بعدين كلي: موجوعه اكو شي يأذيج؟
تردين نروح للمستشفى؟
هزيت راسي لا.
هو اتنهد حيل وكلي: نامي ارتاحي لتخافين اني يمج.
ماكدرت انام الف فكره براسي ومخنوكه.
جابتلي عمه حميده العشا.
عمه حميده: حبيبتي كعدي اتعشي ماما يالله ماجد حبيبي صلوا على محمد يمه تعالوا اكلوا تره هي فقدت دم لازم تعوض يالله حبيبي لتضوج امي انت هاي قسمة ربك ميجوز نعترض عليها.
مر هالاسبوع بكآبه وبطئ فطوم من عرفت خطيه اجتلي للبيت.
ماما مكتلها اصلا على موضوع الحمل هم تنقهر وهم خطيه ماجد ينحرج مااكدر احرجه بالنهايه هاي امه وهو كاسر عيني مااكدر احجي مدللني ويحبني ويحب اهلي وممقصر ويايه بشي حتى اول فتره من زواجنه جان مينطني مصرف بعدين اجه بيوم كلي: انت ليش متحجين وتكولين انطيني مصرف؟
ذهب: عندي ماما تنطيني مااحتاج.
ماجد: انت من طبيتي هالبيت صرتي مسؤوليتي مااقبل تاخذين من اي احد حتى لو امج اني اصلا ناسي هالموضوع ولامنتبه لحدما ضياء اليوم سأل عالراتب كال نسرين ماكله راسي على مصرفها غير تنبهيني.
ظل وراها كل شهر ينطيني مصرف للكليه ومصرف إلى وهوايه وبالرايحه والجايه ينطيني اني مااصرفهم لان مااطلع لاي مكان وهو يوديني ويجيبني واذا ردت شي هو او ماما يجيبوه ولامره سألني وين مصرفج شكد صرفتي بالعكس.
ماجد: حبيبي اني مااريد شي يخرب حياتنه كل اللي صار اريدج تنسيه متذكرين بس الاشياء الحلوه.
ذهب: مادام انت وياي مااريد شي بعد انت وبس اذا تعوفني اموت.
ماجد: اسم الله عليج شلون اعوفج بس انت اللي خاف تعوفيني بعدين.
ذهب: مستحيل.
ماجد: لهدرجه تحبيني؟
ذهب: اكثر.
ماجد: زين بما انه عيد زواجنه الاسبوع الجاي شرايج نروح للزياره حتى ترتاحين هناك فد يومين او ( 3 ).
ذهب: كول والله؟
ماجد: والله.
ذهب: ياريت.
ماجد: ان شاءالله.
ذهب: حبيبي الله لايحرمني منك كول آمين.
ماجد: آمين.
وره اسبوع رحنه بس اني وماجد امه مقبلت تروح وعمه حميده خطيه كالت تبقى وياها انقهرت عليها جان عاجبها تجي.
رحنه ارتاحيت اخر راحه جانت سفره حلوه حسيت بالراحه نفسيتي اتحسنت.
وره مده جان عندي مقابله علمود وظيفه وماجد وداني بس طول الطريق ساكت ويتأفف.
اني ماحجيت اخاف ينفتح موضوع الشغل ويتحجج وتصير مشكله بعدين.
وصلنه جان اكو هوايه ناس جايه للمقابله وهناك شفت ولد جان ويايه اجه سلم علي وعلى ماجد وبقه يسولف ويه ماجد عالتعينات وهالسوالف بعدين دخل للمقابله وطلع وراه اني دخلت وطلعت مشفت ماجد باوعت ماكو شفت بس الولد فسألته على ماجد وشفت ماجد جاي من بعيد اترخصت ورحت.
رجعنه بس طول الطريق ماجد ولاكلمه ولاحرف بس حسيته يريد ينفجر وخفت اسأله شبي وصلني للبيت وراح.
رجع الظهر ساكت نزل للغدا بدون سلام ولا كلام خلص غدا صعد نام اني جنت حاسه اكو شي بس كلت اتحاشاه احسن بقيت جوه يم عمه حميده سوينه كليجه وخلصنه بعدين رحت سبحت العصر كعدته حتى يروح للمعرض كعد بدل وطلع بالليل رجع اني جنت احجي ويه بابا.
ذهب: مامحتاجه شي بس سلامتك.
دخل ماجد راسا اخذ التليفون خلاه على اذنه وبعدين رجعلياه اني استغربت بس غلست كملت حجي ويه بابا وسديت التليفون ونزلت للعشا اتعشينه وخلصنه هو صعد للغرفه اني بقيت شويه يم عمه حميده وامه نباوع عالتلفزيون بعدين سووا البنات جاي اخذتله الجاي وصحن كليجه.
فتحت الباب لكيته تشتغل فاتح اللابتوب.
خليت الصينيه يمه وكعدت انتظرته يحجي شي اي شي ماكو.
ذهب: حبيبي شبيك؟
ماكو جواب.
ذهب: ماجد شبيك مو احاجيك؟
ماجد: مابيه.
ذهب: شلون مابيك شي من الصبح وانت متحجي وياي؟
ماجد: كتلج مابيه شي.
ذهب: وليش اخذت التليفون من ايدي؟
ماجد: عادي.
ذهب: شنو العادي شلون يعني عادي؟
ماجد: تره عندي شغل لتدوخيني.
ذهب: ان شاءالله.
رحت لغرفتي عالسريع قبل لاتدمع عيوني وافشل روحي من اسلوبه بعدين لبست جلابيه ردن طويله وخليت على راسي شال وطلعت كعدت بالحديقه عالمرجوحه الحديقه جبيره وكلها خضار وورد بس محد يكعد بيها.
وره شويه حجيت ويه فطوم وكالت: هذا حمودي يريد يحجي وياج احجي وياه خل يفكني.
حمودي اخوها الزغير عمره ( 5 )سنوات واحبه حيل وهو هم يحبني لان دائما ادزله حلويات ويه فطوم.
ذهب: الو ها حبيبي حماده شلونك؟
اني كلت هالجمله وماحسيت الا واحد اخذ التليفون من ايدي وضربه بالحايط اني كمزت التفتت ماجد خفت هذا شبيه عيونه حمر لزمني من ايدي اجه يكسرها
اريد اعرف شبي شكو ماادري.
ذهب: آآآخ ايدي آآآآخ ايدي ماجد شبيك راح تكسرها؟
ماجد: منو هذا تحجين ويه منو؟ منو حماده هذا؟
ذهب: ايدي ايدي عوف ايدي راح تكسرها.
ماجدمنو هذا؟
ذهب: حمودي اخو فاطمه شبيك اتخبلت.
ماجد: اتخبلت مو؟
اخو فاطمه طالعه بهالليل تحجين وياه؟
ذهب: والله حمودي اخو فاطمه الزغير طفل شبيك عوف ايدي عوفها تأذيني تره.
ماجد: والصبح شنو جنتي تحجين ويه هذا؟
ذهب: منو ماحجيت ويه احد.
ماجد: دقيقه عفتج بالمقابله رجعت لكيتج واكفه ويه هذا السلم علينه وتسولفين شحجيتي وياه؟
ذهب: آخ أيدي ايدي والله ماحجيت شي طلعت مالكيتك سألته عنك كال مااعرف وانت اجيت ماحجيت شي بعد والله.
ماجد: ماحجيتي شي مو؟
دك تليفونه فاطمه صديقتي اكيد استغربت لان انكطع الخط وماحصلتني بعد لان هو كسر التليفون.
شاف رقم فاطمه هو عرف نفسه غلطان ترك ايدي وانطاني التليفون اني بعد ياتليفون يا فاطمه يابطيخ خليت ورحت لغرفتي دخلت وقفلت الباب.
بليلتها حسيت عيوني بعد مااشوف بيها من البجي وهو هم مادك الباب ولا حاول يفتحه..
مامتخيله ممكن يشك بيه هو بنفسه ياما كال سألت عنج وكلولي هنياله الياخذها.
هسه هو اللي يسوي هيج ويايه؟
مامستوعبه ولا مصدكه اجه يكسر ايدي لهسه تأذيني اصابعه عبالك بسامير الاثر بأيدي احمر كلما اشوفه ارجع ابجي بحياته ابوي ممصيح علي ولاضاربني.
منمت للصبح اذن الفجر واني كاعده كمت اتوضيت وصليت سمعت صوته راح للحمام بجيت وكمت كلت خل انام لان راسي حسيته راح ينفجر من كدما بجيت.
الصبح كعدت على دكة الباب باوعت للساعه (ب11 ) ونص فتحت الباب عمه حميده.
عمه حميده: ها حبيبتي صباح الخير شنو اليوم ماكو كل هذا نوم؟
ذهب: صباح النور يمه مانمت البارحه وره الصلاه يالله غمضت عيني.
عمه حميده: ليش شبيج خوماكو شي؟ حتى ماجد كعد اتريك وراح مانزلتي وياه مو من عوايدج.
ذهب: لايمه ماكو شي بس ضجت البارحه انت نمتي من وكت وماجد بقى يشتغل عاللابتوب وخاله من اكعد يمها تضوج تطفي الاضويه والتلفزيون واني وحدي ظليت لحدما طارت النومه.
عمه حميده: شسوي يايمه دواي مال الشقيقه ينوم والعلويه الله يسلمها مدري شبيها يالله هسه كومي غسلي وصلي ونزلي يمي اريدج اليوم تطبخين بمكاني دايخه.
ذهب: سلامتج. ان شاءالله.
صليت ونزلت طبخت وخليت البنات يكملون الباقي ورحت اسبح لان ريحتي اكل صارت.
صعدت سبحت ايدي بعدها تأذيني واصابعه طابعه على ايدي رزك خلصت لبست البرنص وطلعت لكيته ينزع قميصه شمر التليفون عالجربايه كلي: خابري على فاطمه كل شويه تتصل.
مااخذت التليفون اخذت ملابس من الكنتور ورجعت للحمام لبست فستان لونه نيلي ومشجر ربع ردن اتعمدت البسه حتى تبين بايدي لزمت ايده البارحه خلي يشوف شسوه بايدي.
نزلت لكيت البنات يصبون غدا وكفت يمهم ساعدتهم اصلا مااريد اشوفه خليني ملتهيه بالمطبخ احسن.
اجو كعدوا هو كعد واني يمه كالمعتاد وكبالنه عمه حميده والبنات.
عمه حميده: هاي شنو بيدج؟
ذهب: شنو؟
عمه حميده: هذا الازرك شنو بالله اشوف؟
ذهبماكو شي عمه اثر قديم.
هو ساكت باوع لايدي ودار وجهه.
عمه حميده: شصاير بينكم؟
اني ساكته وهو ساكت.
عمه حميده: احجوا لتسوون نفسكم كدامي ماكو شي اعرفكم اني لاقديم ولاغيره البارحه مابيها شي ايدج واليوم راح للدوام منزلتي وراه مثل كل يوم شصاير؟