رواية رحل همي حين عرفتك للكاتبة زهراء أمجد الفصل الثاني

رواية رحل همي حين عرفتك للكاتبة زهراء أمجد الفصل الثاني

تمارة خطيبتة محمد اخذوها اهلها مجرد ما انتهت الفاتحة...
حتى اليوم السابع هي ما اجتي ماقبلوا يجيبونها
تمارة تصير بنت خالي مرة اجتي علينا وبقت كل العطلة الصيفية هي كلش حلوة وطيبة وتنحب شافها محمد وحبها تقدم لخطبتها بس أمها رفضت وعاندت...

إلا هي تعاركت وي أمها وعافت اهلها واجتي علينا كالت ما ارجع والله شيسون خلي يسون اني احب محمد وهو يضحك ويكلها الله شكد حلوة هسة اهلج يكتلونة سوة...

حبهم جان مثل النسمه اثنينهم
روحهم حلوة وضحكتهم ما تفارك وجوهم
ادخل بابا وعمامي وكوة يلا قنعت مرت خالي ونخطبوا لبعض
تالي خطف الإرهاب منها حبيبها
وتسلط اهلها عليها
لدرجة منعوها تحظر السابع مالته...
صار وقت الفطور والكل انخبص يقومون بواجب العزاء، لان رمضان...

خلص الفاتحه هاي هية انتهى كلشي بعد وخلص يوم السابع وكل شخص رجع لحياته، لكن يبقى قلب الام ينعى لحد مماتها عله وليدها صعب من تفقد قطعه من روحها إلى نازعت الموت ياله طلع من احشاءها هيج بسهوله يروح من اديها بأجرام ارهابي مو هيه الاف الامهات ذاقت لسعت الفراق...

ازل: - بعد يومين كاعدة بالمرجوحة إلى سوالي اياها اخوي الجبير نعمان...
اتمرجح وصافنة على السماء صح الدنيا الضهر وحارة كلش لكن هالشي ما همني المهم ابقى برة ومادخل للبيت...

البيت يخنك، الضحكه مخفيه من كل الوجوه...
امي بعدها تبجي عله محمد وكذلك مرت اخوي فااضوج من اضل يمهم، تنقبض رووحي...
وبيت عمتي اخاف اروحلهم...
لأن كلساع تجي مرة على عمه
ويضلن يعيطن...
فبقيت كاعدة بمرجوحتي...
شوية وكمت اسمع صوت عياط من بيت عمتي
عبالي أحد اجة على عمة مثل العادة،
بس اتوضحلي هذا صوت عمه وهي تصيح...
رباب: - صخام بعينج انتي تردين تفضحيني كتلج اني اخسرلج كلشي بس اسكتي...

هسة خلص عزة ابني وانتي صوتج لآخر الدنيا...
سمعت سارة جنتها الجبيرة لعمتي تصيح...
سار: - والله ذهبي بي كيلو كله انباك بفاتحة ابنج ترديني اسكت...
سكتت لحد يوم السابع كافي أريد ذهبي شنو ذنبي
ذهباتي من بيت ابوي جبتهن وياي ينباكن والله هسة تلكولي حل، مالي دخل، لو انتو تخسرووولي فلوسه...

عمه رباب: - عمه سارة الله يخليج نصي صوتج انشالله يجي عمج ونلكه حل وانشوف ذهبج وانتي تدرين بحال مايسر والفاتحة كلفتنا هواي
وكذلك عمج انطلب عليها...
تدرين بي اخوتي رادوا يشيلون الفاتحة وما قبل هو كاللهم فاتحة ابني اني أقوم بيها...

سارة: - يعني وإذا مطلوبين اني شسوي
اشو اني حتى ذهبي نباك وربع ما عندي ويجي عمي وتشوفولي حل خوش...
رباب: - يابه نشوفلج حل بس اطينه صبر خل يجي ومايصير خاطرج الا طيب...
آزل: - جنت اسمع كل هالكلام إلى دار بين عمة رباب وجنتها بس عادي ما هتميت...

في المساء
ابو محمد: - السلام عليم، شلونج رباب شلون صرتي...
رباب: - وعليكم السلام شلووون اصير من بعد وليدي شلون تريده حالي كلبي ملجووم لجم اريد اشوفنه قبل لا يندفن بس ششوف عباره عن حطام رماااد ااااخ كلبي شيصبرني، ربي ارحمه برحمتك الواسعه...

ابو محمد: - الله يرحمه كاافي بجي مو تعذبيه بلقبر كاافي فدوة رحتلج كلبي ممرود مرد ونوب انتي تزيديها.

رباب: - وفووك كل هذا وهاي ساره الضهريه كلها تتعارك دكول ذهبي نباك واريد تشوفولي خل لو تخسروولي بلفاتحه باكولياه، وتعرفها اهلها شرانيين، وعيب اذا سمعوو، انبااك هسه رأسن يكولون عدنه بواكه...

ابو محمد: - انووب هاي منين طلعتلنه سالفه ذهبها مبيووك البينه احنه مكفينه...
رباب: - شسوي يابو محمد شوفلها حل مابيه حيل مشاكلها...
سارة: - جنت اسمع كلامهم وطبيت الله يساعدك عموو
ابو محمد: - هلا يبعد عمج ويساعدج...
ساره: - عموو عدي حل اكو كشاف مره كلت صديقك يعرفه، تذكره ليش متروحله وتخليه يشوفلنه منو البااكه...

ابو محمد: - اي هم صدك لعد ماشي العصر فد شويه راح ارووحله...

ازل: - لحد الليل إجه زوج عمتي بلغ بابا بكلام سارة...
ابو ازل: - زين والحل شنو راح تسوي هو احنا جنة بحال نعرف منو باك ذهب صدك جذب...

ابو محمد: - والله يا أبو عيسى اني عندي اقتراح واحد هو الحل الوحيد ولا احنا شلون نعرف منو أخذ ذهبها ولاتنسى هي غريبة وعيب نتفاشل وي اهلها...

بابا: اي الله وايدك شنو الحل كلي خلي نخلص
تدري با أهل سارة راعين مشاكل وما يصدكون...
: - اني اكول انروح لكشاف ونخلي يشوف وين راح الذهب ومنو إلى باكة
اني عندي صديقي يعرف واحد خوش كشاف كلش
ابو ازل: - اي لعد بيها الخير بلكت الله تعرف منه ولو اني ما اقتنع بيهم بس شنسوي من قلت الحيلة.

ابو محمد: - والله يا أبو عيسى اني خابرتة للرجال
وكالي شغلتك سهلة ما يرادلها شي، بس يريد شغله...
ابو ازل: - شنو الشي شيراد مثلا.
ابو محمد: - يعني بس أريد تجيبلي بنية زغيرة وياك حتى هي إلى تشوف كلشي ويكون كلامها صادق اني...

اخليها تشوف كلشي وهي طفلة ما تعرف جذب وتدري اني ما عندي بنية زغيرة
شتكول لو نأخذ أزل ويانة...
بابا: على بختك ازولة زغيرة وتخاف وتعاند ما تطلع الا ويه أمها وهل تشوف أمها محتارة بعيسى ومرتة هم حامل وتعبانة...

ماكدر اخليك تاخذ أزل إلا وي أمها...
زوج عمتي: شنو السالفة يا عيني
اطمن عليها وبعدين لاتخاف...
قابل اأذي ازولة وإذ على العناد اني اقنعها اشتريلها واخذها وياي...
لا تشيل هم.
بابا: - هاي هية باجر تعال أخذها لعد بس تره اذا مقبلت بعد مالي دخل انته وياها...

أزل: - سمعت كل الكلام إلى دار بينهم وعرفت كلشي...
رحت أركض لبيبي
بيبي بيبي
بيبي: ها بيبي شبيج تصيحين شكو، يمكطوعه خبضتيني...
أزل: - هذا عمو يريد يأخذني وياة لكشاف حتى أشوف منو الباك وابوي قبل...
بيبي: - يمه اسم الله الرحمن كشاف شنو بنيتي معليج بسوالف الكبار وبعدين اني كم مرة كتلج حتى لو تكعدين المرجوحة كفشتج تغطينها بحجاب...

أزل: - اسفة بيبي مو قصدي ولله مادري حجابي وين واني ما دخل بس لأن كالوا نأخذ أزل.

بيبي: - كومي ولج طبي ومعليج بها الحجي ويلا تعالي خلي نصلي اني وياج...
رحنا اني وبيبي...
شكد احبها من تكعد تحجيلي على قصص اهل قبل ولا أمل منها
ولا أتعب ابد ومرات تعلمني شلون ارتل...
مرات تعلمني على الحلال والحرام والي يستحب والي يصير والما يصير...
اني كل كلامي وي بيبي أخواتي اكبر مني كلهن
وامي ملتهية عني، كلش باامور البيت
اني دلوعه أخواني وابوي...
حتى إذا اغلط ما يعاقبوني...

رغم كونهم متحفظين بكل شي إلا وياي اني القاعدة الشاذة لكل قواعدهم...

أبسط شي كل خواتي وبنات عمي وعماتي لحد الأول متوسط يلبسونهن عباية حتى بالدوام
اني لا اني سافرة اطلع...
ملابسي بكيفي...

كل إلى اريدة اسوي بس عمري ما سويت الغلط.
فعلا ثاني يوم الصبح - اجة زوج عمتي
حتى أروح وياة للكشاف ما عرف ليش جنت خايفة ومرعوبة...
بنفس الوقت فضولي شجعني أروح وياة بدون لا امي ولا بيبي، فضل يحاول وياي وفعلا اقتنعت ورحت وياه بس بداخلي خوف...

من ردت اطلع من البيت...
صاحت بيبي وراي...

بيبي: - ازل أزل يالمطيورة اوكفي...
ازل: وكفت ورجعت عليها ها بيبي كولي.
بيبي: توضي يلا طلعين من البيت شمعلمتج اني ومن تشوفين نفسج ما مطمئنة رددي آيات بكلبج يلا توضي وولي تلحكين على الروحة...

ازل: - والله يا بيبي الحبيبة اموت عليج ولا تخافين متوضية والله بيباي...
عفتها وطلعت أركض رحت وي زوج عمتي.
مشت بينا السيارة مايقارب الساعتين...
لمنطقة ما عرف شسمها بس كانت حيل تعبانة
وأغلب بيوتها مدري شلونهن...
وصلنا يم بيت مهدوم على النص دكينا الباب
طلعنا رجال...

جبير بالعمر ويباوع علي ويحجي...
سلم على زوج عمتي وهو شكلة ابد ما يبعث الطمأنينة بروح مقزز ومرعب...
لون بشرتة الأبيض ومايل للحمار...

شوية بقع لونها اسمر متوزعة على كصته وخدة الأيمن.

شكلة خوفني حيل، مع ذلك احتفضت بأدق التفاصيل من نوع ذكيه ماانسه اي حدث يصير بحياتي صعب النسيان عندي...

دخلنا لاستقبال سبق وكلت بكل حدث اني أخذ دور المشاهد دخل زوج عمتي واني كذلك ضليت اباوع على كل تفصيل باستقبالة...
السكف تعبان بحيث لون الأبيض صاير جوزي بسبب التراب إلى بالسكف...

الباب خشب مكسور من جوة
اكو قنفات لونهم احمر اثنين حمارهم صاير ترابي تعبانات...

معرض بي كلاصات وشوية مواعين وحدة من الجامات مكسورة...

شخابيط اكو على الحائط إلى يشوفهن يعتقد مجرد شخابيط أطفال بس إلى يدقق بيهن راح يعرف
أن ماكو اي طفل يكتب بهل الطريق...

رموز واحرف مطشرة بطريقة غريبة
صوت البنكة مزعج حيل...
عبالك تحتاج دهن او حتى تبديل المبردة هواها حار ما بيها مي...
كاع صبة محفرة اكو ميز زغير بالغرفة ما عرف شنو عليه علاليك سود...

كل هالاشياء حفظتها بدقائق فقط بين ما راح جاب مي واجة...

شرب زوج عمتي وانطاني
رفضت اشرب مي من عندة كتلة ماعطشانة...
باوع عليه وحجة: - امي هو شريان الحياة اشربي حتى تحين مو شرط تعطشين...
ازل: - حتى لو كان المي شريان للحياة يا عمو اني مو بحاجة وماعطشانة شكرا لكرمك...

الكشاف باسم: - باوع على زوج عمتي وكلة هاي العنيدة كللها خلي تدخل للحمام منو كلها تجي متوضية...

ماريد اي كلام منها...
باوعلي زوج عمتي وامرني أروح الحمام...
طلع الكشاف يدليني بي بعدها نظراتة علي ما عرف أحس كل نظرة من ترعبني أكثر...
جنت اردد وجلعنا من بين أيديهم سد ومن خلفهم سد فأغشيناهم فهم لايبصروون...
عاط بي...
الكشاف: - لا ترددين آيات قرآنية بيتي
حتى بداخلج فاهمه كااافي...
ازل: - متت خوف أكثر يمه شدراه اني أقرأ بداخلي من عاط عليه انصكعت بمكاني المهم
دخلت للحمام ورجعت
للاستقبال...

التفت عليه كلي اكعدي كبالي و مدي ايدج اليسرى...
انطيتة أيدي اليسرة، ولزمها بدأ يكتب...
ماعرفت شنو معنى للكتابة جانت عبارة عن نجمه
اي نجمه رسمها بشكل كلش حلو
واتقان الخط...
حيل حلو يعني اني بمسطرة ماكدر ارسم هيج نجمه عدلة،
لكن بداخلها رسم رأس حيوان،
صفنت بي وهو يرسم على كف أيدي فضولي أخذني حتى أعرف شنو هذا الحيوان
ازل: - عمو هاي بقرة لو شنوا!
هاي مو بقرة هذا ثور!
استغربت وسالتة هذا ثور بداخل النجمه مووو.

الكشاف: - اي مبين عليج ذكية فعلا...
عرفتي تحزرين باوعي على عيونة شلون رسمتهن...
كان داير مداير النجمه أرقام وأحرف
من ضمن الحروف جان موجود...
حروف اسمي.

ما عرف باي لغة كام يحجي كل ضني الانكليزية
ما كاعد افهم من كلامه اي شيء...
ما عندي اي احساس مجرد منتبهة علي
باوع علي وكال...

الكشاف: - اريدج تركزين وياي راح أرجع بيج للزمن بيوم الفاتحة تمام...
بس اريدج تباوعين على نص النجمه وتحجين لا تلتفتين لحد ولا تباوعين غير على ايدج
سالني.

كشاف باسم: - راح يجونج اتلاث زلم عبارة عن ابيض...
لابسين اطلبي منهم كولي أريد البساط أريد ترجعوني بالزمان ياخدم العالم السفلى ارجعوني
ازل: سويت إلى كالي عليه رغم اني كلشي مااشوف مجرد ايدي والرسمه بس احسة لساني ينطق وحدة مو بوعيي...

الكشاف باسم: شفتي إلى باك الذهب
سعدون مووو...
كاعد تشوفين شلون دخل للغرفة وأخذ الذهب كله
ازل: أريد أنطق اكول لا مو سعدون اصلا مو أحد كلشي ما شوف ماكدرت أنطق
غير إلى هو كالة...
بعدها كالي.

اقسمي أنو شفتي سعدون خلي زوج عمتج يصدك شكة بمحلة...
قسمت اي قسمت واني كلشي مادري
شلون سويت هيج ما عرف...
اني جذبت أو ماجذبت...

ليش ماكدر احجي واكول ماعرف ليش اكول شي مادااشوفه ولساني ينطق بكلامات من وحده ماكدر اسيطر وهل صدك هل شخص باك ضليت ماعرف بس مركزه عالرسمه واحجي...

لزم أيدي وجاب كلنس وطلع من الميز علبة بيها مثل الزيت بس ريحتها غريبة...
بدأ يمسح كل إلى رسمه على ايدي.

بعدها كتب على أطراف أصابعي...
بقلم احمر كلش مو جاف أعتقد زعفران مو حبر
أسماء غريبة جدا...