رواية حكم القلب للكاتبة روز الفياض الفصل الثاني والعشرون

رواية حكم القلب للكاتبة روز الفياض الفصل الثاني والعشرون

دزلي مسج: ( مشتاقلج، شكد مشتاقلج وشكد احبج).
ماجاوبت رجع دز. : مشتاقلج. مشتاقلج. مشتاقلج. لو اظل اعيدها لباجر ميكفي.
ضحكت وطاحت دموعي وحنين كاعده يمي اكلت راسي تريد تعرف شنو كاتب كتلها: اقري وانتي ساكته.
حنين: خيعونج.
مسحت دموعي بسمه دارت علي من الكشن الكدام هم تريد تعرف كتلها: خلوني شويه عفيه ضجت.
ظل يدز مسجات واني مغلسه ماادري شنو الحل وياه، بعدين اتصل خليته صامت.
دزلي مسج: ردي لاتخليني ارجعج.

مروه: رجاءا بطل اسلوب التهديد هذا.
حيدر: معناها ردي.
اتصل رديت كتله: الو؟
حيدر: روحي؟
سكتت.
حيدر: الو؟
مروه: اسمعك.
حيدر: وين صرتي؟
مروه: موجوده.
حيدر: اذا انكطع معناها خلص رصيدي بس احصل رصيد ارجع اتصل احنه سيارتنه وراكم.
مروه: وين؟
حيدر: سيارتي مو باص..
هسه نوصل يمكم ظلي يم الشباك.
كتله: اشو متخبل؟
حيدر: انتي خليتي براسي عقل.
مروه: يالله لايخلص رصيدك.
حيدر: فدوه الج الرصيد وصاحب الرصيد.
مروه: موزين هيج تكول.

حيدر: فدوه. والله فدوه.
مروه: حيدركافي لتبجيني تره كوه ساكته.
حيدر: احبج.
دمعت عيوني، ردت اغير الموضوع فكتله: ماخذ راحتك مو اكو وياك ناس؟
حيدر: خيولون مو مهم.
اسمع اصدقائه يصيحون عليه لان كال خيولون ظل يضحك.
حيدر: على عنادكم اليوم احجي لحدما يخلص الرصيد لو تموتون مااسده.
ضحكت كتله: كافي يالله روح مصختها.
حيدر: والله لو يموتون مااسده.
مروه: هههه اني اسده.
حيدر: اهون عليج؟

حجايته رجعتني لذاك اليوم الاسود ضجت واختنكت.
مروه: انت اخر واحد يحقله يسأل هالسؤال..
حسيت سؤاله ظالم خنكني بي.
حيدر: هواي هواي عندي حجي.
مروه: من جنه بالمطعم لمحتك بس مصدكت كلت مو معقوله يطلعلي حتى هنا.
حيدر: ههههه واني شفتج تشترين من المحل ومن عثرتي شبعت ضحك.
مروه: هههه والله يمكن سمعت صوتك.
حيدر: والله اني هم مااتوقعت اشوفج رغم ادري بيج جايه.
مروه: منو كلك؟ زينب اكيد مو؟

حيدر: اوكفي، اوكفي، التفتي عالشباك وصلنه يمكم.
التفتت شفتهم يمنه يمشون بسيارتهم استحيت لان يباوعلي ووياه اصدقائه درت وجهي ضحكت.
حنين ظلت تكمز تريد تشوفهم كرصتها لاتحس خالتي.
حيدر: ليش درتي؟
مروه: استحي شبيك عيب هسه كل إلى بالباص ينتبهون واذا شافتكم خاله تاكل راسي بالحجي.
بعدين وياك ولد عيب شبيك اتخبلت؟
حيدر: حكريهم. حكريهم. اعتبريهم مو موجودين.
حجه وياهم: والله اليرفع عينه ويباوع اذبحه دوروا مناك.

همه يضحكون ويدردمون يكلوله: منباوع منباوع.
ضحكت كتله: يالله كافي مع السلامه.
حيدر: لا صبري شويه، ليش مستعجله؟
مروه: من نوصل نحجي هسه زحمه وحنين ذبحتني تريد تعرف شكو.
حيدر: معناها اليوم التليفون يمج متركينه ولا لحظه ومتنامين مو تخليه صامت؟
مروه: ان شاءالله يالله مع السلامه.
حيدر: احبج.
سكتت استحيت.
حيدر: شوكت تكولين اني هم؟
ضحكت كتله: ههه يالله باي فشلتنه.
حيدر: هههه مع السلامه.

سديته واستلمتني حنين اسأله واجوبه شكال وشحجه وليش ضحكتي..
وصلنه لاربيل نزلونه يم الفندق وصعدنه لغرفنه اني وحنين بغرفه وخاله وبسمه بغرفه شويه ودك تليفوني مسج دزلي رصيد.
دخلت سبحت وطلعت لكيته دازلي مسج: وصلتوا؟ احنه وصلنه، وباجر راح احاول اجي اشوفج ونحجي ان شاءالله؟
مروه: الحمدلله عالسلامه احنه هم وصلنه، احنه ملتزمين ابرنامج ويه الكروب.
حيدر: حاولي شوفي طريقه، او انطيني خالتج احجي وياها وافهمها.

مروه: شتحجي وياها؟ اشوف وضعي واذا كدرت وضبطت وضعي انطيك خبر.
حيدر: انتظر منج خبر.
مروه: ان شاءالله، يالله اروح امشط.
حيدر: بعده شعرج طويل، لو كصيتي هوايه؟
مروه: شمدريك كصيته؟
حيدر: اليحب يعرف كل شي عن حبيبه.
مروه: بعده بس مو مثل قبل.
حيدر: ديري بالج عليه لحدما تصيرين إلى واشوفه براحتي.
مروه: بعد عندك امل؟
حيدر: شتسمين كل إلى صار لحد اليوم؟
مروه: الله كريم، بعدين نحجي هسه خاله تنتظرني امشط وانزللهم.

حيدر: اوكي مع السلامه.
مروه: مع السلامه.
مشطت وبدلت ونزلت اني وحنين لكينه خاله وبسمه بالبهو كاعدين ينتظرونه نروح نتعشا واني افكر بكلامه، شسميه غير قدري إلى حاولت اغيره بس ماكدرت.
بس كعدنه ناكل خاله سألتني عن حيدر شنو كلي شنو كتله شلون شفته اليوم شنو يريد سألت عن كل شي.
خالتي: مروه بعدج متحبيه؟
هزيت راسي ماادري.
خالتي: وهو بعده يحبج ويريدج وعنده نيه بعد يحاول؟
مروه: يحبني ويريدني واكيد عنده نيه يحاول..

خالتي: ليش متقبلين؟ كافي ياماما عيشي وانسي الفات مات وصار ماضي وهو غلط غلطه ودفع ثمنها غالي.
مروه: خاله انتي تعرفين كل شي، بعد كل إلى صار نرجع؟ بهالبساطه يعني؟ والجرح إلى جرحنايه؟
خالتي: اذا هو عنده نيه وبعده لحد الان يحبج ليش لا واهلج واهله ميصدكون ترجعون، يدرون بيه يحبج..
والجرح يطيب ياحبيبتي المثل يكول اخذ إلى يحبك ولاتاخذ إلى تحبه وهو كل الناس تدري بيه شكد يحبج.

والغلط تره مو بس منه كل الاطراف غلطت مو سهله واحد ينتظر وحده سنين وبعدين تكوله مااريدك، ولاسهله تفضلين واحد ثاني عليه، وواحد ثاني صدكي مينسى وميسامحج انتي من الاول ماتنطيته مجال تتعرفين عليه بصيغة خطيب وحبيب، وهو غلط لان مستوعبج ولاحاول يقربج منه من الاول، لذلك يمكن انتي حبيتي عبدالله..
فكري بي حبيبتي فكري.
مروه: الله كريم، عود اذا شفته وحجينه واتفاهمنه يصير خير.

خالتي: علينه هالحجي، احجي وياه بالتليفون مو طول الطريق من المطعم لهنا تحجين وياه هههه.
استحيت يافشلتي طلعت تسمع واني خايفه منها واحجي وياه على كيف.
مروه: يريد يشوفني ويحجي ويايه.
خالتي: خل يجي اني اصلا هم اريد احجي وياه.
مروه: اشوفج متشجعه حيل.
خالتي: لا والله اذا يكدر يجي خل يجي حتى احجي وياه.

خلصنه ورحنه اتمشينه شويه واني افكر بكلام خالتي اني ماانطيته مجال ولاهو حاول يستوعبني ويقربني اله بس معقوله نرجع بعد هالسنين؟
وبعدين رجعنه اني قبل لا اروح خليت تليفوني عالشحن ورحت رجعت لكيته متصل 10 مرات..
دزيتله مسج. : هلو؟
ماجاوب وره تقريبا نص ساعه دز مسج.
حيدر: هلو جنت اتعشا هسه صاعد للغرفه ونحجي.
وره ربع ساعه دز مسج.
حيدر: روحي وينج؟
مروه: موجوده، اتصل عادي لو اكو احد يمك؟
حيدر: لا محد يمي اني بغرفتي.

اتصلت رد هو: الو حبيبتي.
مروه: الو هلو.
حيدر: اشتاقيتلج.
مروه: شبسرعه.
حيدر: اريد احجي، بس براحتي متكليلي كافي ولاعيب مصختها، متكليلي مااحبك. مااريدك.
مروه: مو حجيت الظهر.
حيدر: ونحجي بعد، عن كل إلى صار. وتحجيلي شكو شي بكلبج حتى لو يأذي.
مروه: مالي خلك.
حيدر: لا احجي اريد اعرف.
مروه: حيدر، مااريد احجي بهالموضوع مااريد اتذكر شي من إلى صار. اريد انساه بأي طريقه.
حيدر: بعدج كارهتني؟.

سكتت اذا هو مجرد الكلام بهالموضوع مؤذي شتتوقع بعد.
حيدر: مراوي؟.
اتنهدت كتله: نعم؟
حيدر: احاجيج. اسألج. ليش متجاوبين؟
مروه: لا.
حيدر: زين ليش متردين تحجين؟
مروه: اسوء فتره بكل حياتي لحد الان، واتعس ذكريات، واسود ايام، واسوء الم ممكن يحس بي بشر، هيج زين؟
سكت بعدين كال: لا مو زين، شسويلج؟، شتردين اسويلج؟
مروه: سويت وخلص، طلكتني.
حيدر: يعني من طلكتج ارتاحيتي؟ نسيتي؟

طاحت دموعي واختنكت مااكدر احجي، شحجي هو شي ينحجي هم صعبه ومؤلمه وهم عيب شحجي.
حيدر: الو؟، مراوي؟، الو؟
بجيت كتله: اسمعك.
حيدر: احجي لتسكتين، ماصدكت سمعت صوتج.
مروه: شحجي؟، شتريد تعرف؟
تريد نحجي بصراحه واحجي كل شي بكلبي؟
بس اذا حجيت تتحمل وماتزعل..
من طلكتني بجيت لان مو سهله وحده تطلك وهي ماشافت شي من زواجها ماشافت بس ايام سوده..
وانت مو اي واحد بالنسبه إلى..

ماادري اذا حبيتك بيوم لو لا بس اتذكر كرهتك باليوم اللي صار بي كل شي..
كرهتك لدرجه حتى صوتك كرهته.
اسمك كرهته.
من عرفت بيك اتزوجت ماتأثرت عادي جان الموضوع بس من شفت ساره بزواج زينب وفرات ماادري ليش ضجت وحسيت نفسي اراقبها، ولو هي حبابه..
وضجت من عرفت انفصلتوا وهي حامل ومتريد الطفل، حسيت بالذنب وتأنيب الضمير لان كلتلي يكوم ويكعد وياج مو وياي..

بس لليوم بعده ذاك اليوم واللي صار بي مااكدر انساه ولا انسى تفاصيله بعد لهسه..
سكتت مااريد ابجي بعد اخذت نفس، ورجعت كملت كتله: مسببلي غصه بكلبي وماادري احقد على منو بيكم انت لو فرات لو حسين لو زينب لو ابوي وعمي كلما اكول هذا المسؤول ارجع اكول لاخطيه، مااتحمل اكره احد بيكم.
حيدر: وبعد؟
مروه: مااتصور اكدر انسى الصار، ولهسه كل حجايه حجيتها بأذني من اتذكر عبالك هسه اسمعك تكولها.
حيدر: شحجيت؟
مروه: تعرف.

حيدر: مااعرف شي كولي شحجيت؟
مروه: كل خير.
عصب مني كلي: مروه احجي. تره اذا انتي الموضوع يأذيج اني يموتني احجي لتخبليني.
دخلت حنين.
مروه: مااريد احجي حيدر، مااريد احجي، انت تعرف شحجيت ماله داعي بعد هذا الحجي.
ظل يصيح: احجييي، احجي، خلصيني.
بجيت. حنين خافت اشرتلها ماكو شي.
مروه: حيوانه، يكرم الحيوان، ميسوي سواتج، قندره، طايحت حظ.
سكتت خنكتني الدموع هو ساكت بعدين كال: وبعد؟
مروه: نكسه، انتي وحده نكسه.

وخرت التليفون حتى لايسمعني ابجي..