رواية إطلاق سراح مشروط للكاتبة روز الفياض الفصل الخامس
ثاني يوم من رحت جبتلها موبايل سيم كارت ومن رجعت للبيت جانت لابسه ربطه وشاده شعرها ومشغله المكناسه تكنس الصاله.
دخلت حاجيتها ماسمعت اتنديت يمها خليت ايدي على خصرها بصوره عفويه.
كمزت صرخت وذبت المكناسه.
حسام: هههههههه شبيج كمزتي.
ظلت تباوعلي بعدها مرعوبه بعدين حضنتني حسيت نفسي اتحنطت ماادري ليش مااكدر اتصرف بصوره طبيعيه وياها مثل اي اثنين متزوجين.
بعدين ابتسمت وخليت ايدي على جتفها ورجعت ضحكت.
حسناء: هههه دوم.
حسام: يدوم غلاج.
سكتت ماحجت بس جنها ضاجت ماادري ليش كتلها: هاج.
انطيتها العلاكه إلى بيها التليفون.
اخذتها وفتحتها باوعت كالت: شنو هاي؟
حسام: تليفون وخط.
حسناء: المن؟
حسام: لامي.
حسناء: هاا اي هسه بس اشيل المكناسه اوديه الها.
حسام: هههه صدكتي انتي لامي؟ الج هذا انتي مو ماعندج تليفون.
فتحت عيونها ممصدكه رجعت باوعت بالعلاكه كالت: صدك عود هذا التليفون إلى؟
حسام: اي الج شبيج مو كلتي البارحه ماعندج تليفون؟ خلص هذا الج حتى اذا ردتي شي تتصلين بيه او اني احتاج اتصل بيج او تتصلين بأهلج صديقاتج كيفج انتي بعد تليفونج وبراحتج.
ظلت تباوعلي بعدين ابتسمت ابتسامه عريضه ورجعت حضنتني كلتلي: شكرا الله لايحرمني منك.
ابتسمت من حجايتها وفرحت لان شفتها هيج فرحانه بالتليفون.
خلص اليوم وهي تضبط تليفونها وفرحانه بي ودخلتها رمز النت ونزلتلها البرامج المهمه وهي مبتسمه مامصدكه.
حسناء: اول مره يصير عندي تليفون لا وحديث بعد وبي نت.
حسام: شنو تردين وشنو تحتاجين كولي لاتستحين.
حسناء: مشكور عمرك طويل.
حبيت اسلوبها بالكلام عمرها وديان ماكلتلي شكرا على اي شي جبته لو سويته الها.
بالليل اباوع للساعه 10 وديان لهسه مااجت اتصلت عليها مترد.
وره نص ساعه اتصلت كالت: اليوم راح ابات عد اهلي لان باجر معزومه بعرس جيرانه واريد الصبح اروح للسوك وبعدين اروح للصالون ماالحك خاف ارجع هنا.
حسام: زين تمام براحتج سلمي على عمي وعمتي.
وديان: يوصل يالله باي.
هاي على اساس اليوم اني يمها وهيج مامهتمه راحت باتت عد اهلها.
يالله بعد احسن خل اروح يم حسناء.
طلعت من الغرفه رحت لغرفة حسناء مالكيتها.
كعدت انتظرها طولت كمت رحت للمطبخ ماكو بالحمام ماكو رحت لغرفة امي ظلمه فتحت التليفون اباوع على ضواه شفتها فارشه فراش بالكاع ونايمه.
استغربت بس ضحكت اتدنيت يمها ندهتها كعدت مستغربه.
طلعت واجت وراي للغرفه دخلت وسدت الباب.
حسناء: شكو حسام شبيك؟
حسام: ماكو اجيت يمج مالكيتج دورت عليج لكيتج نايمه يم امي.
حسناء: ليش شكو وديان نايمه؟
حسام: لا وديان اليوم تبات عد اهلها.
حسناء: هاا.
طفت الكهرباء وكمت اشغل المولد مااشتغلت ظلينه بالظلمه بس اللايتات الشحن.
حاره الدنيا متت كمت سبحت حتى شويه ابرد نفسي طلعت لكيتها نايمه اتعجبت شلون نامت بهالحر وجماله متغطيه.
اتمددت يمها وخرت الغطا فزت.
حسام: اسم الله شبيج وخرت الغطا منج حاره وانتي متغطيه.
حسناء: مااعرف انام بدون مااتغطى ومتعوده عالحر.
حسام: اكو واحد يتعود عالحر؟ انتظري خل اروح احاول من جديد اشغل المولد بلكي تشتغل ونامي.
حسناء: اذا علمودي عادي تره متعوده احنه ماعدنه مولد بس امبيريه من الجيران منطينه امبيرين.
حسام: امبيرين شتشغل؟
حسناء: البنكه عالاقل واللايت قابل شعدنه احنه سبلت لو ثلاجه.
سكتت ظليت صافن شحجي وشكول.
دنكت بست كصتها كتلها نامي الصبح نحجي ماخليتج اليوم تنامين.
مغمضه وتحجي: لاعادي احجي اني هم امل من الهدوء واضوج الصبح عالاقل التهي بشغل البيت ومن اضوج اروح يم خالتي اكعد بغرفتها ونسولف بس من تنام اضوج وماادري شسوي بحدي.
حضنتها كتلها: حقج بس شنسوي شغلي هيج ووديان هم موظفه تدرين واتصور عدم تواجدها بالبيت احسن مو صح؟
فتحت عيونها باوعتلي كالت: مو مهم اني مايهمني حجيها المهم انت علمودك اتحمل اي شي.
حجايتها غثتني وضجت وحسيت كل كلامها وتصرفاتها تزيد علي الحمل وتأنيب الضمير وتشيلني ذنوب اكثر.
بقيت ساكت وهي هم ساكته بعدين كتلها: انتي طول هالمده مارحتي لاهلج مااشتاقيتيلهم؟
حسناء: طاك كلبي عليهم.
حسام: زين اذا تردين تروحيلهم روحي اني اوديج او اذا يردون هم يجون يشوفوج هنا هذا بيتج يعني بيت اهلج يجون باي وقت.
سكتت ماحجت.
حسام: حسناء احاجيج.
حسناء: ان شاءالله اروحلهم بس شوكت اروح شوكت ارجع.
حسام: بكيفج شكد تردين تبقين ابقي.
حسناء: والغدا والعشا منو يسويلك اكل منو يبقى يمك؟
ابتسمتلها كتلها: لتخافين مااموت من الجوع اكل اي شي عادي متعود.
حسناء: لا ماينطيني كلبي.
بستها كتلها: هيج اتعود عالدلال واخرب تره.
ضحكت على كيف كالت: ميخالف اني قابله.
حسام: يالله نامي حتى باجر الصبح اوديج لاهلج تشوفيهم.
حسناء: باجر؟ صدك؟
حسام: اي والله مو تردين ترحين وتكولين طاك كلبج عليهم خلص باجر الصبح اوديج ان شاءالله وابقي براحتج.
حسناء: وبعدين؟
حسام: بعدين شنو؟ اني اجي عليج اجيبج متجين انتي. تمام؟
حسناء: تمام.
نامت مبتسمه اليوم جان يوم مفرح بالنسبه الها تليفون جديد وحديث واتصلت بامها وخواتها وحجت وياهم واطمنت عليهم.
وباجر الصبح ان شاءالله تروح تشوفهم وتكضي وقت وياهم.
شلون اني ماموديها لاهلها طول هالمده مو هاي وديان عبالك ساكنه عد اهلها 24 ساعه عدهم.
واني هم مااتحمل يوم مااشوف امي بس هالمسكينه لان ساكته محد بحالها.