رواية إطلاق سراح مشروط للكاتبة روز الفياض الفصل الثالث والعشرون
حسام: تمام. زين اني مشتاقلج شلون؟
حسناء: واني اكثر والله.
حسام: زين ميصير تجين اشوفج؟
حسناء: علواه، يصير؟
حسام: اي طبعا يصير اني دزيتلج واحد يجي ياخذج من البيت وجيبج هنا اشوفج وبعدين يرجعج. تمام؟
حسناء: اي. اي تمام تمام شوكت يجي؟
حسام: هسه يمكن يوصللكم لان اني دزيته من مساع هسه اكيد وصل انتي جهزي نفسج حتى بس يدك الباب تطلعيله.
حسناء: خوش هسه اكوم البس عالسريع قبل ليوصل.
حسام: خاف تتأخرين لبسي حجابج وعبايتج احسن عالسريع.
حسناء: كيفك يالله هسه البس.
حسام: ابقي وياي عالخط حتى اعرف من يوصلج. ولتكولين لامي بعدين تخاف عبالها اكو شي.
حسناء: واذا دورت علي وملكتني شلون؟
اخاف يظل بالها؟
حسام: لتخافين من توصلين يمي اني اتصل بيها واكوللها انتي يمي وشويه وترجعين للبيت.
حسناء: تمام. بس اكول؟
حسام: كولي.
حسناء: اخاف اتأخر وميدخلوني؟
حسام: شنو متأخره عن المدرسه هههه لتخافين ماكو هيجي شي.
حسناء: يالله معناها اني جاهزه بس منتظرته يجي صديقك.
طلعت ووكفت بالحديقه انتظرها تطلع.
حسام: يالله طلعي ديتصل بيه معناها وصل للباب ومنتظرج.
حسناء: يالله طالعه بس نسيت اسألك حبيبي محتاج شي اجيبلك وياي؟
حسام: لا ممحتاج اي شي غيرج.
حسناء: سوده عليه حتى ماكو وقت اطبخلك حاجه اكله اسويلك شي تاكله خاف تجوع لو متصل من وكت جان لحكت.
حسام: مااريد اي شي اريد اشوفج بس.
طلعتي؟
حسناء: اي هياتني دااطلع بس على كيف حتى خالتي ولاكيشا ليحسون بيه.
سمعت صوتها فتحت الباب وطلعت بقيت واكف وانطيتها ظهري.
اسمع صوت خطواتها جايه باتجاهي وصوتها تبسبس بالتليفون على كيف.
حسام: هاا وينج؟
سكتت واكفه وراي حسيتها ابتسمت ادري بيها ارتبكت ومافهمت هذا منو إلى واكف بالحديقه ويشبهني.
رغم المفروض تعرفني بس يمكن من ارتباكها ماانتبهت حتى على التليفون بأيدي واحجي وياها.
ردت علي بهمس: طلعت.
حسام: متأكده تردين تجين يمي؟
سكتت شويه بعدين كالت: طبعا متأكده.
درت وجهي عليها شفتها واكفه ومدنكه ضحكت على كيف مستحيه من صديقي الجاي ياخذها.
سديت التليفون وكلتلها: حسنائي؟
التفتت علي باوعتلي لثواني ظلت صافنه بوجهي متحركت اباوعلها محلوه ومبين عليها الحمل اكثر عبالك مو اسبوعين مشايفها عبالك شهرين شكلها متغير حسيتها مو حسناء الطفله لا شابه جبيره مره متزوجه وحامل حتى بطنها احسها كبرانه.
ابتسمتلها اجت تركض بحضني.
حسام: اف اف على كيفج هههه.
بقت شابكتني متحجي ولا اني حجيت حسيت هسه ارتاحيت وبرد كلبي من شفتها الحمدلله زينه ومابيها غير العافيه.
مشتاق جنت حيل اخذها بحضني وهسه احس روحي ارتوت.
طفلتي، بنيتي، حسنائي...
دخلنه للبيت بعدها امي نايمه رحنه لغرفتنه كلتلها: واخيرا.
كاعده يمي ومبتسمه ابتسامه عريضه وحاضنه ايدي.
تمددت تعبان وفتحتلها ايديه كلتلها: تعالي عندي.
حطت راسها على ايدي كالت: هسه صدك صرت زينه واريد انام واشبع نوم.
حسام: شلونه الوحش؟
ضحكت كالت: زين.
حسام: رحتي للدكتوره؟
حسناء: لا مكدرت اروح مالي خلك جنت منتظرتك تطلع بالسلامه يالله.
حسام: يعني فوتي الموعد؟
حسناء: عادي حبيبي بأي يوم اكدر اروح.
حسام: وليش هالتأخير؟
حسناء: منيلي خلك اروح يوميه اكول اليوم ترجع وانتظر وماكو شي.
حسام: عبالي اطلع الكاج رايحه ومسويه سونار وعارفه ولد لو بنيه.
حسناء: خلص مدام طلعت بالسلامه باجر ان شاءالله اروح.
حسام: لا انتظري اني بس افرغ اوديج.
حسناء: ليش شنو تخاف؟
حسام: طبعا اخاف شلون مااخاف هديتي حيلي من اتمرضتي.
دمعت عيونها كالت: اسم الله عليك تعبتك ادري ماوراي بس التعب.
حسام: هذا التعب هو إلى مريحني.
حسناء: شمستفاد مني بس اذيه.
باوعت لوجها كلتلها: احلى اذيه وحسنائي يمي.
ومستفاد هوايه فوك متتصورين.
انتي بس ابقي مثل ماانتي اكبر فايده هي هاي مرايد منج اكثر.
حوطت خصري بأيدها وكالت: انت هم ابقى مثل ماانت لتتغير علي.
حسام: زين معناها حضنيني حيل اكثر بعد حتى مااغير رأيي واروح.
رفعت راسها باوعتلي كالت: وين تروح؟
غمضت عيوني ودرت وجهي حتى لااضحك وكلتلها: على اساس جنت مفكر وناذر اذا صرتي زينه اروح اتطوع بالحشد.
شهكت حيل وكعدت على حيلها كالت: عساني لا صرت زينه هو هذا هم نذر؟
حسام: اسم الله عليج ردت اموت عليج من جنتي مريضه وهسه تكولين عساني لاصرت زينه.
حسناء: تموت علي وناذر هيج نذر؟ تريد تروح للدواعش ومترجع؟
حسام: يجوز ارجع.
حسناء: لا مترجع هاي خواني وابوي وينهم تريد تلحكهم؟ مو اخذوهم؟ وهسه انت هم تروح وياخذوك واني ابقى هنا مكسوره ارمله وعندي طفل ويمكن حتى الطفل وديان تاخذه واظل.
طاحت دموعها ودنكت مستحيه تمسحهن كسرت خاطري كلتلها: تحبيني حسناء؟
دارت وجها مجاوبتني زعلانه مديت ايدي درت وجها علي كلتلها: حسنائي ليش البجي؟ ترى اتشاقى وياج شلون اروح واعوفج واعوف امي وابني المن اعوفكم؟
بقت ساكته بس دموعها تصب جريتها من ايدها كلتلها: هنا تعالي نامي يمي خليني اشوف إلى يخاف علي.
كشت بحضني دنكت بست عيونها ومسحت دموعها كلتلها: حسناء تحبيني؟
هزت راسها لا
ابتسمت كلتلها: والله متحبيني؟ لعد المن هالبجي؟
حسناء: شحب بيك؟
كالتها وغمضت عيونها.
ضحكت كلتلها: هيج صارت؟ شتحبين بيه ها؟ زين معناها خليني اروح ليش تبجين؟
مدت ايدها شبكتني بدون كلام وبقت مغمضه وكاشه.
حسام: يعني هاي شنو معناها؟ حبيتيني هسه لو تردين تسكتيني؟
ضحكت فتحت عيونها كالت: اول مره اعرف بيك هيج تلح.
حسام: متعرفين شي عني بعدج.
حسناء: احبك
حسام: واني اموت عليج ومااروح لاي مكان واعوفج وهذا ابنج مو ابن وديان حتى تاخذه منج. زين؟